相信好多人都聽過「雁行者結伴同行計劃」，呢項計劃其實是由大埔富善邨路德會中心聯同新界北防止罪案科舉辦的一項年度計劃，今年已經踏入第三屆，目的係透過舉行不同嘅活動，由領航員（警察義工）近距離將正確訊息灌輸俾飛行員（參與計劃嘅青少年），令其領略正確嘅人生觀，咁有意義嘅計劃我當然唔會錯過啦，能够成為當中嘅一份子我亦感到好榮幸。
喺2009年3月14日，計劃就舉辦咗一個名為「積極人生歷奇訓練營」嘅活動，當日中午我哋一行五十人乘坐旅游巴士到達位於西貢嘅白普理營，由新界北防止罪案科主管總督察致辭後，為期兩日一夜嘅訓練營正式開始。
第一個項目就係考驗膽量同信任嘅「二人走鋼線」，見到有啲「雁仔」（即飛行員）玩之前就喺度笑人哋細膽，點知到佢玩時就腳都軟晒，甚至乎坐咗喺條綱線上面郁都郁唔到，真係令人蹄笑皆非。
六點鐘食過晚飯後，就開始第二個項目：「黑夜定向」，青年人精力多，最鍾意就係玩呢個遊戲喇，佢哋拎住枝暗到差唔多無電嘅電筒，地圖都唔睇就係咁跑係咁跑，走咗好多冤枉路，但經過由領航員協助計劃路線後，大家就揾得順利好多了，呢次就帶咗個訊息俾班年青人，凡事有計劃先會事半功倍。
過咗一晚好似無瞓過嘅夜晚之後（因為啲雁仔根本就唔想瞓，喺度玩天光），食過早餐就開始進行第二次嘅團體活動∶爬高牆，每一組各自用各樣嘅方法爬上七尺高嘅牆，全組都爬到上頂先為之完成，當然有啲身手敏捷嘅就好容易完成啦，但有啲又肥又笨嘅就成為咗其他人嘅負累，不過講明係團體活動當然團隊精神最重要啦，大家互相幫忙同合作最後都可以完成任務。
就係咁樣，兩日一夜嘅「任務」就好不簡單咁完成咗，箇中體驗嘅滋味既喜且怒，但能近距離將人生正確嘅價值觀同一班年青人分享，確係比平時返工做嘅搜截停搜查有用得多，希望大家日後有機會嘅話都一齊參與啦！
