http://football.on.cc/cnt/news/newa/20151004/fbnewa0101x0.html
超級星期天最爆重頭戲，非英超「仙魔戰」阿仙奴主場對一哥曼聯莫屬。兵工廠近期表現極度飄忽，歐聯兩連敗令出線機會危危乎，球隊士氣跌落谷底。相反，曼聯剛喺歐聯反敗為勝開齋之餘，聯賽拿下3連勝後時隔兩季再登榜首，大有「費氏王朝」重臨之勢，加上近8次於聯賽交手未嘗一敗，今仗造訪酋長球場至少可全身而退，仲有得受讓半一咁筍，下盤乃不二之選。
（now 621周日晚11時直播）
兵工廠防線多甩漏
阿仙奴近期征戰頻繁，但近5仗輸咗3場，只有作客李斯特城一役贏得較輕鬆，如果話輸畀車路士嗰場係對方箭頭迪亞高哥斯達出「那渣」招搞到打少個所致，咁兩場歐聯先後不敵薩格勒布戴拿模同奧林比亞高斯，就係自己打得曳冇得抵賴，而且兩連敗後令出線形勢岌岌可危，難怪主帥雲格日前罕有地鬧爆球員冇鬥心啦。兩大主力阿歷斯山齊士及禾確特狀態不俗，不過兵工廠防線卻非常鬆散，副隊長梅迪薩卡剛復出即甩漏頻頻，其拍檔哥斯尼上仗更傷出，今仗唔使預佢，冇咗呢位法國鐵衞包抄執漏，隨時死多二錢重，今次遇上曼聯，縱有施治復出把關，亦難止近3戰共失6球嘅頹勢。
曼聯經過開季不穩後，現時已完全上力，「新亨利」安東尼馬迪爾近3仗聯賽入3球，狀態火爆，雖然朗尼墜後一格打進攻中場表現麻麻，好彩桑馬達及時挺身而出，呢位西班牙中場近4仗入3粒，又交出多次助攻，簡直踢到曉飛。中後場方面，一對「2S」防中舒韋恩史迪加同舒尼達連愈夾愈熟，中堅基斯史摩寧今季大熟大勇，喺防線一夫當關，加埋神龍迪基亞守尾門，紅魔嘅綜合戰鬥力已漸復「費氏王朝」舊觀。
格食格作客未驚過
足球比賽往往有「格食格」現象出現，曼聯近年實屬阿仙奴剋星。自2011至12年球季、曼聯主場以8比2屠殺兵工廠開始，連續4季8次聯賽對陣，紅魔一共取得5勝3和不敗佳績，作客成績亦攞到2勝2和。上季英超首循環對戰，曼聯更以2比1作客力克阿仙奴，球隊心理上完全佔優。今仗阿仙奴竟然要讓半一咁多，實在有啲離譜，斯維強捧紅魔下盤。
