難忘的錯誤
這是一個發生在三年前的真人真事，為免被起底，名字和背景都會有一點改變，而內容是真實的。我叫Rex，28歲，在一間公司任職市場推廣，自己帶一條team，有一個由中學開始拍拖的女朋友Grace，大家有共識30歲會結婚，這幾年先專注在事業，為將來打好基礎。每日都幾乎要ot，間中我也要到外地公幹．我們見面的時間少之又少，一般都是靠電話/whatsapp維繫，但大家都理解，唔會有太多怨言。有一日如常返工，老闆叫我入房。
老闆：下星期會有一個新同事入你條team，係我世姪女，你同我好好睇住佢。
我：老闆，你知我條team係全男班喎，你世姪女入會唔會唔方便呀？不如去Alice邊啦。
老闆：跟你學到多嘛，我睇好你，幫我教下佢啦。
我：..............老闆大石壓死蟹，我無奈要接受。但這一次接受，原來就是錯誤的開始。
我係呢間公司做四年，由散仔一個做到部門主管，靠唔係我特別聰明，而係我做夠拼搏，或者係我偏見，我覺得女性係比較感性、同埋容易受情緒影響，如果要搏起上話一定唔夠男仔好，所以咁多年來我都只係要男下屬，但係今次冇辦法，老闆係都要安排一個世姪女入，唯有接受。呢個消息好快俾我啲同事知道，佢哋當然好興奮，因為終於可以有一個女同事一齊做嘢，但係我特別提醒佢哋，呢個係老闆世姪女，大家千祈唔好亂來。我有個同事叫Alex，係一個天文台，經常收到好多唔同風聲，今次佢都特別提提大家。
Alex：大家唔好咁多幻想啦，老闆呢個世姪女叫Emily，上兩個月先結婚咋，你哋死條心啦。另一位同事
Ronny：嘩，人妻仲正呀！
聽到呢度我更加唔開心，結婚仲唔戀愛大過天？做一定唔上心啦！
有一日如常返工，大約九點鐘，有人敲我房門，我叫佢入嚟之後，繼續望住手頭上嘅文件，有一把女聲開口同我講。
女：Rex你好，我叫Emily，今日第一日返工。
我繼續望住我啲文件：得啦， 15分鐘之後去Room A開會，你出去叫我Alex幫你安排個位，順便幫我叫Ronny入嚟。
Emily：哦，咁我出去做嘢先。
Ronny入到黎之後，同我講：喂，呢個Emily好得喎，嬌滴滴咁，真係得人鍾意。
我：Ronny哥，我哋做嘢唔係溝女，同埋呢個係老細個世姪女，你唔好亂來，一陣間傳返去比老細知道我都保你唔住。
Ronny：得啦，你都知道我係口痕姐，邊會嚟真吖。我：今次呢個係大project，不容有失，好好去準備下啦。
正式開會嘅時候，我第一次正面望Emily，咪又一個普通嘅女仔，弱質纖纖咁，真係唔方佢會幫到我咩手。期間仲比我發現咗佢一樣非常之唔好嘅嘢，就係成日都顧住望手機，但係要俾面老細，我都忍住唔出聲話佢，點知佢突然間舉手。
Emily：唔好意思，我想問吓幾點放lunch ?我個胃有啲痛。
我望一望個錶，原來都已經兩點幾，咁我就話而家放lunch。到而家為止，Emily比我嘅印象都係唔捱得、唔專業，所以我都係俾啲行行企企嘅工作佢就算。
就咁過咗兩個禮拜，有日Alex同我講：你係唔係好唔滿意Emily嘅表現呀？
我：又冇話滿意嘅，不過又唔諗住比去負責啲重要嘅嘢，我覺得而家嘅安排幾好呀。
Alex：嗰日我見到佢喺茶水間喊呀，你有冇鬧過佢？
我：佢同你講我鬧佢呀？
Alex：冇，我問佢咩事佢冇出聲，所以我咪問吓你咋嘛。
我：咁一個人喊咁有好多原因嘅，唔一定係為工作架，唔好理人咁多啦，嗱嗱聲幫我搞掂呢一個project呀。
都話女人容易受情緒影響啦。
[ 本帖最後由 Magicsevenday 於 2018-3-9 11:48 AM 編輯 ]
