落雨濕濕嘅第67話~
Abby LXVII
阿星揸住桶啤酒,真係唔記得點樣穿過啲慕名而嚟睇Gina打碟嘅人,行番入去貴賓房度。一嚟個謎團未解開,阿星冇辦法正常思考;二嚟阿星俾呢個人迷得一陣陣,頭先攬完,依家又見到,啲眼神接觸仲要有千言萬語,你話啦,如果你係阿星,你會點做?
Elly一早已經坐低咗,同呢位不速之客兩個握住手傾緊密偈,完全冇理會過阿星嘅出現,咁阿星唯有放低雪桶,攞咗三支啤酒出嚟,一支俾佢,一支俾Elly,一支俾自己,坐喺Elly隔離自己飲悶酒囉。阿星見Elly一路握住不速之客嘅手一路喺度密斟,講極都唔停,都只有自己一個飲悶酒一條路行,喺Elly背後望下呢個人,見到佢不時會由望住Elly嘅角度再去望下阿星,一望到阿星又即刻避開阿星嘅目光。望下望下,終於望到Elly都開聲:「你睇下佢,又想望又唔敢望,做咩你搞到佢咁咗?」呢句說話係Elly同阿星講嘅,然後又有人插咀:「我早叫你面對自己㗎啦,個衰公走咗之後就冇得見㗎喇,見埋呢幾個月,大家收心養性啦!」
講呢句說話嘅人,著住一對黑色皮製唔過膝短靴;一條淺藍色牛仔短裙,露出咗健美結實,冇多餘脂肪嘅大脾;一件黑色吊帶背心,顯現哂左臂上面戰跡輝煌嘅圖騰,同埋半隻收埋喺胸前嘅蜘蛛,唔使講,又係無阻隔上陣。蜘蛛女Gina行埋嚟阿星度,一個蘿柚坐咗落阿星大脾,然後就雙手攬住阿星條頸,一啖錫落阿星個咀度。一輪激烈嘅咀舌交纒之後,Gina回一回氣,再次開聲:「我唔理㗎,佢一日未走我都唔會放開佢,你自己諗清諗楚。」
不速之客咬住下唇,顯得非常之倔強,阿星見過幾次佢呢個表情,每次有啲事要認真落一個兩難嘅決定,佢就會有呢個動作。你唔好諗爆頭啦,俾阿星折磨下你先啦。
正所謂:
擁抱離別復再現
千言萬語未曾講
雙妹牽手訴不絕
英雄冷板坐一旁
幸得蜘蛛舌戰來
不速之客神情異
金翅超級老尷鳥
(待續)😬
[ 本帖最後由 star_platina 於 2021-8-5 20:27 編輯 ]