七不思議食女事件Vol.22

「喂，你同個私鐘妹搞成點呀？佢捨得搬走未呀？」Whatsapp Group入面，Raymond好關心我之餘，都好關心佢阿爺間屋。

「佢做左我條女，差唔多一個月喇。」

「咁撚不可思議？窮撚都溝到雞？你唔係戇鳩到去借財仔貼女呀嘛？」野狼又廣東話夾住粗口，潤鳩我。

「佢唔係一般既港女。」

「港女咪又係雞。」野狼自從一次戴帽之後，早已看破紅塵，所以佢而家主力屌九五後貪錢小妹妹。

「佢同你溝開係Instagram夾對波出黎，幾千人Follow哥d囡囡唔同。牧子都係窮妹，唔太重視物質享受，佢同我一齊，佢就好開心。我溝過咁多條女，都無試過有條女對我咁好。你試過同條女扑完野，佢落街買M記你食未？」

「Marvin哥，你真係鐘意佢？你要飛落地喇？」Raymond呢個問題，好難答。

Whatsapp Group突然一片沉默，我打左一堆字，backspace，再打，又backspace，欲言又止。每當我將牧子既雙鬢既秀髮圈落佢耳背既時候，我會諗，究竟佢鐘意我D咩野。大概係佢D客，只係當佢一係件工具，好似尿壺一樣，而正常人決不會對尿壺生情愫。

但係我食女都寫得出三萬幾字，有追開文既讀者，都知道作者非凡品，再加上如題目所言，呢個係《七不思議食女事件》，同去倫敦屌賓妹相比，我對牧子心動，又算得上係咩野？

「你知唔知，我細個哥陣，想做歌手？」當現實尚未磨平牧子既稜角，佢曾經係追夢者。夏末既某夜，牧子接我放學，我帶左佢黎HKU孫中山像個荷花池，欣賞荷塘月色。

紐魯詩樓掛住一幅孫中山大海報，寫住：「我有如遊子歸家」，牧子倚偎係我既胸口，快樂得好似有如海報所云一樣，有如遊子歸家。

「我中學哥陣，年年Sing Con都拎獎。我哥陣Solo唱《明知故犯》，都唔知幾多男仔係下面同我打氣。完左場，佢地問我拎電話，我都無理過佢地。」

中學既萬人迷，因為生活，成為只要有千六蚊就上得既神女，放棄左佢既理想，我不得不為牧子感到悲哀，自然摟得佢更加緊。

牧子挨係我身邊，捉住我隻手，一邊係到低聲輕唱許美靜既《明知故犯》，如怨如慕、如泣如訴：「誰也知夜夜與他那內情，可惜我瞎了眼睛…...」唱到最尾，佢忽然好大力咬左我隻手一啖，然後哄塊面埋黎，用食指輕劃我塊面，若有所指咁，繼續唱：「得到你的愛情，還要再得到你任性。」

到而家，我每聽到《明知故犯》，牧子咬我既痛感，同埋佢望住我，深邃既眼神所帶半絲既幽怨，總會係我腦海入面再倒帶一次。

「你會認真對我架，係咪？我遲d搵夠，唔會再做CC架喇，廢事你係朋友前面無面。」牧子捉住我隻手，摸佢軟熟既頭髮。

「我好少真係鐘意一個人，如果我同你一齊長長久久就好喇。你係我架。」牧子又咬左我個鼻一啖。

一齊得耐，牧子每講一次「我愛你」，我都會惴惴不安，只能含糊其詞，蒙混過去，虛怯得好似破戒既小淫僧，將牧子當木魚咁攬住，頌經洗罪。除左搞完野，佢會落街買吉野家我食之外，佢為左我，仲去學彈結他，彈到隻手損晒，都只不過係因為我隨口講左句，Coldplay 既The Scientist真係好好聽，我每次訓之前都要聽一次。

我老豆雖然年輕時到處留情，但係佢情歸我老母，終生不渝。上左年紀，老豆經常鳩UP回帶，講番幾十年前，係風雨飄搖既晚上，於上環樓梯街頂苦候我老母，縱使橫風橫雨，差D將佢吹落去文武廟，但係佢老豆決不失約，等我老母，並自詡為現代尾生。國字口面既老豆，同我既瓜子口面，無半分相似，就連佢既一往情深，我半成都遺傳唔到。望住塊鏡，有時我懷疑自己，究竟係咪o係中環連卡佛個阿差到，被我阿婆執番黎。

我同老豆相反，我係一個浪子、花花公子同仆街，並唔能將我既將來，寄托係呢個短髮女子身上，而呢樣野，同佢係唔係私鐘妹，同埋對我好唔好，一D關係都無。

我並唔知道，究竟係咪到左手既囡囡，就變得越唔矜貴，定係我身為一個浪子，對愛情既最佳食用日期，好似開左既樽裝豆漿一樣，只須幾日，就會凝固，然後腐化。愛上佢既時候，我真心愛上佢，我相信無人會特登變心。呢個美麗既錯誤，令我同牧子遇上，但係我無勇氣同佢講，我不是歸人，是個過客。

「唔係，你知道我呢種男人，好難對女人有真情實感。」鏡頭返番去Iphone入面既Whatsapp Group。

「屌你個撚樣，早幾日先話好鐘意人既，又話人地對你咁痴心，又接你放學，又買早餐你食，一時一樣，你想點呀？」野狼對我既反覆，睇黎有D微言。

「我唔係唔愛過佢，但你知道我條條女都唔長久架啦。可能我好勝心強，淨係想倔強既佢愛上我，無理過個後果，今次大撚獲……」呢個Whatsapp Group，竟然成為左我告解既教堂。

「唉，真係孽，你呢個缺愛既仆街，又扮浪子，仆街就認啦，屌柒你。」野狼又屌鳩我。

「食女專家」Raymond淫心不可收，隨後佢既一番話，更加將我同牧子呢段關係，捲左落流沙入面，直至沒頂，缺氧，然後死去。

(未完待續)