又係收工時間,放假啦各位,第20話~
Abby XX
喺阿星同Elly眉來眼去嘅時候,麻油味Abby忍唔住跨過Miss Tang坐埋嚟阿星旁邊,捉住阿星嘅手臂問阿星:「究竟你哋係咩關係?」呢個時候,Gina再次打完碟,揸住支啤酒一路飲一路行返入嚟坐咗喺阿星大脾上面,用左手攬住阿星條頸,右手揸住嘅啤酒大啖飲入口,然後用口餵阿星飲。Gina嘅舉動已經表明咗阿星同佢哋嘅關係,麻油味Abby冇出聲,直到Gina餵完阿星飲啤酒,開聲同麻油味Abby講:「明冇?」麻油味Abby睇到一幕咁香艷嘅飲啤酒之後,冇即時出聲,而係望住阿星,應該話係厲住阿星先啱。阿星真係冇見過一個女人可以用咁凌厲嘅眼神去望阿星,連阿星老婆都唔會咁做,真係有啲驚驚星。
阿麻油味Abby跟住落嚟講咗一番說話,阿星聽完之後真係心驚膽跳,直頭好似坐過山車咁,一下喺最頂峯俯衝落到地面…………唔係,係到逹地面之後唔停,仲要快速向下落,直逹18層地獄咁,無止境的驚嚇。就連坐喺阿星大脾嘅Gina,用腳係咁撩阿星腳嘅Elly同俾麻油味Abby隔開咗嘅Miss Tang都停咗落嚟,望住麻油味Abby,一句說話都講唔出。阿星俾佢嚇一嚇,當刻都唔識俾反應。大家都知道,阿星喺語法上面都下過一番苦功,基本上有任何人想用任何方式講任何態度嘅說話,阿星都有辦法兜到,有辦法應付,有辦法扭轉局勢;但係阿麻油味Abby嘅一句說話就令到阿星O哂咀,啞咗一樣。
究竟阿麻油味Abby講咗句咩,令到阿星O咗個好耐冇O過嘅咀;阿Gina坐咗喺阿星大脾度飲唔落啤酒;Elly本來撩緊阿星嘅腳停咗落嚟;而原本同阿麻油味Abby傾緊偈,俾佢走咗去前面隔開咗阿星嘅Miss Tang聽到都即刻冇哂聲,如果一番說話一講出嚟之後令到咁多人都沉默哂嘅,呢句說話真係要好小心講。而且好多時候大家並唔知道佢想講嘅說話會有可能令到聽嘅人有咁嘅反應,所以阿星勸大家喺講說話之前,用大約半秒到一秒嘅時間諗下句說話講出嚟嘅時候自己聽到會點,為著聽嘅人著想,修飾下先講出嚟,你會發現以下三件事情會出現:
1. 諗完修飾過嘅說話會令到人聽得舒服,從而令人喜歡聽你講嘢;
2. 一秒嘅思考間隔,有助令人感覺你講嘢有智慧,成熟,更有說服力;
3. 利用一秒鐘思考過再開聲說話,令你大腦習慣快速思考,對答就會更加從容,答得更加工整,應對得越嚟越快。
總之講一句說話,喺講出嚟之前思考下點樣講,點樣用詞,用咩態度表達,百利而無一害。
講咗咁耐,好似仲未講俾大家知阿麻油味Abby究竟講咗乜,其實佢講嘅,就係:「你同我爸爸一樣,氹女人一樣有一手!」
正所謂:
麻子三探星伴情
煎妹行動來說明
攖花知曉情緒伏
傾刻語出場寂靜
披露總裁同類型
欲知後事如何,請看下回分解
(待續)😬
[ 本帖最後由 star_platina 於 2021-7-16 20:21 編輯 ]