嗰日嘅夜晚, 同女友出去幾條街之外食半自助餐, 一路上, 女友已拎住個電話鬼鬼鼠鼠咁講不停, 去到餐廳又特登揾個隔離冇人嘅角落位, 我去拎嘢時, 女友就係個邊細聲講大聲笑, 有時又偷望下我, 繼續鬼鬼鼠鼠咁, 睇佢越講越興奮....等我拎佐嘢食返埋位嗰時, 佢又扮神秘咁, 完全唔知佢講緊咩, 同咩人講.....到最後就話咩"睇下佢聽日有冇時間幫我去拎...."
我就知, 係同細妹傾緊計, 見佢咁個樣, 實係傾緊D唔知咩陰謀, 又要我出手相助--做苦力.
我就話: 講到咁興奮架....細妹嚟唔嚟食呀?
女友: 佢唔嚟啵.....係呀, 講你朝早D衰嘢呀(扮好細聲咁)......你冇講佢聽話我講架.....佢仲話....
佢突然見隔離有一對情侶正入座, 就立即收聲...
我話: 仲話咩呀??
女友: 冇啦, 冇話咩呀.....你聽日有時間去阿媽度幫我取番D信, 仲有醫院嘅一個文件袋......
我話: 細妹唔幫手拎嚟?
女友: 你咪咁懶啦, 細妹可能唔得閑, 阿媽可能又挂住你呢....哈哈..
女友阿媽的確對我好好, 所以女友次次佢阿媽叫我上去飲湯, 都話佢阿媽挂住我...
...............就咁樣, 講講下, 冇再問女友, 細妹係電話中究竟"仲話咩咩".......
究竟係咩呢?? 返屋企路上邊, 拖住女友手, 我仲閃一閃呢個問題......
