上文題要，如是者過咗一個禮拜，突然有人add我ICQ...第一句就問我仲記唔記得佢？
當年ICQ，我依稀記得個Profile( info )最潮嘅，同最早期嘅表情符號「-.- -_- =_= XD XP
....等等」
講最潮就一定係星星太陽月亮，加幾句歌詞咁樣，再星星太陽月亮，
其實我當時個Profile係乜都無得個名，可能有啲95-00後嘅唔知ICQ係乜Q，
咁以下ICQ簡介方便你閱讀落去，
( I SEEK YOU ) ICQ 一款好早期嘅即時傳訊軟件，而ICQ於1996年已經有，
直至1998-2000年代頭 ( 無記錯嘅話 )，為港人所愛用嘅電腦軟件之一，
但大勢因幾次改版後就已過，由交換ICQ取而代之就變成交換MSN，當然世人係幾咁善忘。
廢話就講完哂，入返正題，
( 當然...佢係字都唔太識打，睇返Record其實好多篇幅都係英文或者當年嘅至潮火星文為主 )
S：「你幾唔幾得我係邊個呀？」
咁我當然睇一睇佢Profile，都已經估到佢係邊個架喇，我依啲孤獨精真係好少俾ICQ人，
我：「記得...你係上次嚟整電腦果個女仔吖嘛！」
不過我自己都估到無咁好死架喇，其實佢有啲電腦嘢想請教我，
S：「我想問呢，我電腦突然間好慢呀...」後刪唔知幾多字
咁佢問完佢想問嘅嘢，我就好當機立斷覆咗佢，
我：「不如打直接打公司電話俾我啦！我宜家係公司。」
咁佢轉過頭就真係打嚟，咁解釋完佢想解嘅問題，
其實我對佢真係有興趣，我都不彷開門見山咁問佢啲私人嘢，
我：「其實隔住個電話真係好難教你點樣做，雖然好多嘢都Step by Step 順序就可以解決到，
但如果要整我怕你應付唔嚟。」
其實我聽得出佢我一路教佢，佢一路整佢都係一頭霧水，整到近乎應該係想掉部電腦落街，買過部就算。
S：「咁我係唔係要拎過嚟俾你整呀？」
我依啲咁專業誠懇嘅懇樣好老實咁答咗佢一句。
我：「其實唔洗嘅，我公司有上門維修服務，其實你唔洗下下搬部機過嚟都可以嘅，咁你住邊度？」
S：「我住港島架，你公司係九龍架喎...洗唔洗另外收費架？」
我為人人嘅專業精神，為人為到底，我諗都唔洗諗就答佢
我：「咁呀...依次當我私人免費幫你整啦，如果去到咁遠，
我公司收費好貴架，因為啲軟件全部都係用正版。」
其實我果時幫朋友做果間嘢，根本無誇區服務。
劉華都有講，今時今日咁嘅服務態度係未夠，所以我本著既私人既義務嘅性質，就問佢。
我：「咁小姐你地址，電話號碼？同姓咩？聽日兩點得唔得閒？」
咁佢好快就答我住係邊，然後留低咗佢手提電話，全名（當時我仲未有電話，係過咗一個禮拜後，我就開咗一生人第一個電話 ，而且係已經合併咗嘅orange(橙台)，而依個Number，直到現在我都無轉過，應該會用到帶埋落棺材。）
S：「咁聽日兩點鐘我係屋企等你喇喎。」
當然我咁專業就緊係絕無雜念，一心就諗住聽日要帶啲咩上佢度啦！
我：「好啦，咁聽日兩點見，同埋我無手提電話，去到我可能會用電話亭或者搵人借電話打俾你！」
咁佢答完好之後就收咗線，佢把聲都足以溶化我，因為佢把聲好溫柔，
而我淨係同佢傾個電話都掌心霧汗，非常咁緊張，
當然我無由把聲流露出我好緊要嘅情緒出嚟。
一直到第二日，我準時到達佢屋企樓下，
而且佢樓下竟然係無看更！果度係一梯一伙，
97年前建造業最高峰嘅時候係港島區起嘅樓一梯一伙嘅住宅非常之常見，
建築面積由200幾至到300呎，90萬至110萬不等，現在就升值兩三倍，
當時都未有咁多劏房存在（以我記憶中不過我果時其實真係仲細）。
上到去我按門鐘，我非常之記得佢門鐘係「有隻雀仔跌落水」，
響完之後佢一打開門，我亦非常之記得...佢間屋好大陣爽身粉香水嘅味，
( 我點解咁鐘意依陣味其實就係因為依個原因 )
當日，佢一打開門，我個人呆一呆，當然唔係佢無著衫啦....
而係，佢無化妝，個樣都非常精緻，如果你話佢似邊個...我覺得似阿嬌 ( 起碼七成似 )
當然後作為我EXGF，佢唔會好天真好傻，亦無扮過純情...之類，
Ｓ：「入嚟先啦，企係度做咩？」
我咁大個仔，我其實都未試過話上女仔屋企，
咁當然我自己有老母，家姐....我對住啲女人嘅時間都幾長下，
我自己都覺得唔應該去緊張，但我又緊張到隻手出哂汗....
我一行入去，果陣爽身粉香水味，淡淡地幾好聞，同埋我本身鼻敏感，太濃香水味我真係打乞痴打到喊，
咁我嘢都未講....
佢又好快咁問我
S：「你食咗嘢未呀？我啱啱煮咗啲嘢，你唔介意可以一齊食架！」
我就當然有食唔食罪大惡極，抱有一個食咗先講嘅心態答佢！
我：「我趕返公司拎嘢再過嚟，我都未食嘢呀，我真係唔客氣架喎！不過要去一去廁所先...因為有啲急，搭地鐵過嚟果時，忍咗好耐...」
佢就望一望廁所方向，
S：「廁所係果邊....但唔好周圍望喎....」
我一行入去廁所，當年我依啲毛都未出齊嘅細路仔，唔係未見過廁所掛到周天花都Bra under，
我都有好奇心，所以一入去，其實我第一時間唔係望下有咩花款嘅bra同咩size，
我只係望下佢有幾多枝牙刷，同啲有無啲男性用品係度，結果出乎意料之外！
我心諗！呀！原來你一個人住！
咁衝衝忙忙放低哂啲應該放低嘅嘢，洗埋隻手，個人無咁緊張，
行返出去，一個開房式廚房，廳連床...，其實一眼望得哂，
除咗個廁所之外，其實出面都好企理，間屋就只係有牆身少少粉紅色拉花點綴，
唔似得我其中一個家姐(我有兩個家姐)鐘意將啲嘢周圍擺亂到七彩，
而S呢，職業係做OL，幫佢屋企人手，即係唔洗做嘅太子女...我後期先知，
食完依餐飯當然，就無咁著數真係又食有拎啦...
係時候要整完應該要整嘅嘢，整下整下，佢一路都係我隔嚟望住我整...
整到六點左右搞掂，我好專心咁同佢講解一啲佢電腦嘅問題。
我：「整好喇，你部機太多無用嘅軟件果啲嘢，唔夠ram所以就慢咗，我幫你delete咗一啲無用嘅軟件，裝咗個防毒，掃咗一次，結果就中咗病毒，下次你就唔好隨便上網download啲嘢...小心啲用喇」
我未講完我想講果啲嘢。
佢就問我，
S:「你今晚想食啲咩...我宜家去買，為咗多謝你私人抽時間嚟幫我整電腦。」
我又呆咗一呆望住佢，然後好唔好意思，但又要懶係風趣幽默咁樣答佢，
我：「依啲嘢好少意思...我晏晝都食咗你一餐，宜家又食多你一餐，我真係賣身都俾唔到其他嘢你架喎...」
我都唔知點解佢又會咁風趣咁答返我，
S:「咦呀！請你食多餐飯姐，又唔洗賣身咁嚴重嘅....，都話為咗多謝你囉...，我都唔好意思要你抽幾個鐘時間幫我整電腦啦！」
我真係盛情難卻，所以就答佢
我：「咁好啦，咁呀...一齊落去買啦。」
佢果陣個樣，我到依一刻我都記得，笑得好甜，但依一切其實都仲未係開始，
因為斷斷續續其實過咗幾個月先正式一齊，
我自問唔係咩靚仔同一定唔係身型健碩，
其實我自己果時都想像唔到我有啲咩吸引力吸引到佢，
咁同佢行完supermarket，同行過佢(其實唔算附近)附近個街市，
順便佢又入貨，要買啲意粉即食麵，菜呀之類果啲...其實我真係做阿四...
就行返佢屋企，一路其實傾咗好多嘢，但我都忘記咗實際講過啲咩，
等我記得返，我會將依一段空白填補返落嚟，即係所謂番外篇之類...
上到佢度，真係再三強調！！！陣爽身粉香水真係好好聞！！！
大約七點幾鐘，果時天都黑哂，佢就問我...
S：「呢個呢個你想點煮？」
作為一個男人，係屋企係排行係最細，不嬲都唔到我話事，咁我緊係由佢發板，點整就點整啦
我：「我無所謂呀！你煮返平時你食開嘅口味就得...我真係無所謂...」
咁佢果刻望住我就奏起眉頭...諗咗一諗，就行去廚房，開始整嘢...
咁我坐係飯枱望住佢煮嘢，就諗，其實如果有個女朋友識煮飯真係幾好....
都交代返少少我自己背景先如果唔係你地都一頭霧水點解我會有依個諗法
( 我當時老豆老母已經離咗婚，但仲同居分房瞓，果陣已經好少食到煮家飯，我都成日好夜先返屋企瞓 )
望住佢煮飯，我真係忽然有種好Warm嘅感覺，我突然間流咗啲眼淚水出嚟，
佢望轉頭，諗住問我，食唔食得辣...就見到我兩行馬尿...
之後行埋嚟問我，拎咗盒紙巾過嚟..
S：「你做咩喊...我啱啱係唔係煮得好難食...？」
我邊喊邊笑住咁對佢講...
我：「我望住你煮飯個背影突然有啲感觸姐，唔好意思嚇親你...我無咩事...我嚟幫你手煮啦...」
之後一路同佢煮...一路我就原原本本咁講哂我屋企啲事佢聽...
我真係好似個細路仔咁俾佢氹...
然後食完依餐飯之後，除咗返緊工果時會同佢間中ICQ下...，再見面就係一個禮拜之後嘅事...
續
不過果時我都未知佢大我五年，佢一睇就知我係細過佢...
好笑在，真係好多事都陰差陽錯，好多好少嘅原因係一段因緣嘅開始...，
時至今日我都同佢有聯絡，大家飲完酒都會想當年...補完返當年大家唔記得嘅畫面，
做唔成情人，都可以做朋友，不過其實本身依段情無某一件事發生過，係唔會做得返朋友...。
學侏羅紀公園嘅一句經典對白，Life finds a way，
而當你同你嘅情人講大話嘅時候，不知不覺，你會同你嘅情人產生一個小裂縫，
而裂縫不斷擴大嘅時候，你再做咩，都補唔返依個裂縫嘅差距，因為依道裂縫係你同佢心之間...
都係文筆唔太好請見諒，或者有啲嘢其實係順序錯咗...
字節檢查 7210 字:smile_15:
在此再送上一首歌，希望依首歌你會鍾意:smile_35:
https://www.youtube.com/watch?v=1AoKpTAmdVc
Basick - No more Lies (feat.Lewn)
