第七章 風花雪月就是我最大的幸福
2012年,刁民牛45歲
人到中年,人生總會出現轉捩點,我仍是故我,但我身邊的朋友卻踏上另一個里程碑。
今天聚集了一眾《賤男俱樂部》的戰友,但發起人並不是我,而是健哥哥。健哥哥在內地某間Disco訂了一張長桌,點了好幾枝名貴的烈酒招呼我們。豪華的氣派吸引了很多美女前來討酒喝,她們有些是早已跟我們碰過幾次面,有些是首次慕酒而來,但目的都是一樣,就是找男朋友。
有別於香港夜場的風氣,內地女人不像大多數香港女人擁有獨立穩定的經濟能力,她們多半是失業者,或是經營淘寶店的自由工作者,所以她們不是只追求純粹的一夜情,而是希望找到順眼的男朋友照顧下生計,找不到的可以免費把酒作樂一番亦沒什麼損失。
酒過三巡,健哥哥忽地站了起來,朗聲道:「大家,我想公佈一個重要嘅消息。」
我打趣道:「咁好死請我哋飲酒,一定係中咗六合彩啦!」
「差唔多啦!係我就嚟要結婚啦!」
眾人皆為他而鼓掌,說盡恭喜的說話,唯獨我錯愕地看著他,然後惋惜地道:「哎呀!健哥哥,乜你咁睇唔開呀?咁後生就綁死自己啦!唔係奉子成婚吖?」
「唔係,我哋都行咗咁多年,又夾得埋喎!嘛拉埋天窗,費事搞到佢成日籮籮攣囉!」
「哦!即係條女迫你啦!」
「又唔算嘅!其實我年紀都唔細。」健哥哥拍一拍肚皮,說:「你睇,啤酒肚都有埋,都係時候成家立室。」
「嘩!你轉死性呀?乜你唔係話最鍾意溝女嗰種Feel咩?婚都結埋,仲點出嚟玩呀?」我刻意抱緊旁邊的女伴,藉此刺激他。
朗尼勸道:「算啦!亞牛,人會變架嘛!而家又唔係迫你結婚,你咁緊張做乜啫?況且,健哥哥唔可以溝女啫!仲可以陪我哋飲酒架!」
「咁又係,點都好啦!我都會嚟睇下你啲姊妹團靚唔靚嘅!」
對於早已認定「結婚是愛情的墳墓」的我,是極度不鼓勵男人結婚,所以見到身邊的戰友自掘墳墓,我不免感到洩氣,但人各有志,我亦不好意思跟他爭辯,唯有祝願他得到幸福。
朗尼問:「係喎!健哥哥,聽你講過未來老婆係大陸人喎!結咗婚之後驚唔驚會使你好多錢架?」
「唔怕!其實我照顧佢有一套獨門方法,就係唔直接畀錢佢使,而係用啲錢買貨畀佢自己搞生意,一嚟佢可以自己賺多啲錢,二嚟佢要畀心機打理盤生意,變相無時間落場玩,唔怕佢畀其他仔溝或者攞著數。你話要佢賺大錢、自給自足就無可能架啦!但點都會令自己安心啲,唔怕帶綠帽。」
我不得不佩服健哥哥這個方法,怪不得經常跟我們去消遣的他還有餘錢去籌備結婚。正所謂「一個成功男人的背後必然有一個女人」,能娶到一個精明能幹的老婆固然是一種福氣。因為並不是每個人都能像健哥哥一樣,有著一個令人安心的賢內助,就例如我一位叫老陳的戰友。
有一晚,年逾五十的老陳招待我們到他於位深圳的家吃飯,這個單位算不上大,一房一廳,也不是搬新居,但當我們坐穩之後,才知道今次聚餐的亮點。
「慢慢食吖!」一名樣貌娟秀的女子捧出一碟碟小菜,她溫柔地替眾人添啤酒後,便回到廚房繼續幹活,老陳不忘笑淫淫地拍了她的屁股一下,老夫少妻的關係顯而易見。
朗尼問:「咦?老陳,做乜結咗婚都唔話我哋知呀?」
「唔係結咗婚,係我包起條女啫!佢叫洋洋,我都包咗佢成半年囉!」老陳春風得意。
朗尼說:「包養?乜你咁抌本呀?」
老陳說:「都唔係好貴啫!租間屋畀佢,每個月再畀五千蚊過佢。」
健哥哥驚訝地說:「五千蚊咁少,夠架啦?女人又要食飯,又要買衫,仲要計埋養佢屋企人嗰份。」
「咁我唔喺度嗰時,佢都會去打工架嘛!唔係剩係得你會搵個刻苦耐勞嘅女人嘅!」老陳又跟我說:「嗱!亞牛,而家我就要挑戰你之前教我嘅定律,而家租金連零用錢八千蚊,我每個星期嚟兩晚,平均一個月嚟九晚,除返一晚一千蚊都唔使,仲會煮飯畀我食,抵過你包女過夜啦!係咪先?」
我說:「又唔係咁計嘅!包養條女,你嘛無閒錢玩囉!」
「無所謂啦!我有佢一個已經心滿意足啦!以前我成日畀啲香港女人嫌三嫌四,小小事都嘈交,甚至畀帽我戴。自從我識咗洋洋之後,先至真正體會到愛情嘅滋味,使多啲錢又點話呢?」老陳眉開眼笑,活像新婚的夫婿。
進屋之後,我一直採取被動的態度,並不是因為辯不過老陳,而是心中有愧。
因為那個洋洋是我上個月才透過微信結識,而且還上了她一次!
其實正常人也會想到,對於大部份愛財的內地女人來說,八千元根本無法填補她的開支,背著另一半繼續從事性服務行業是理所當然的事吧!所以,同一個圈子的朋友上過同一個女人,本是不足為奇的事,但如果那個女人是兄弟的老婆或情人就不同說法了,普通的一場性交易就變成勾義嫂的惡行!
身為他的朋友,即使我不告知他真相,也要向他暗示這個女人沒有他想像中完美,免得他泥足深陷,繼續做「老襯」。
我說:「既然係咁,你唔索性長期住喺深圳陪你女人?你哋平時放完工返屋企都會悶架嘛!一個星期扑足七次,條數仲抵啦!係咪?」
我留意到洋洋聽到這句話後立時臉色一沉,剎那間向我流露出不滿的眼神。
老陳說:「咁每個人都要有啲私人空間嘅!仲有洋洋成日要開OT,所以都未必可以返到嚟陪我。」
我又說:「開幾個鐘OT賺得幾多錢吖?不如你再努力啲賺錢,畀多千零二千蚊佢,嘛可以全職陪你囉!」
朗尼突然說:「亞牛,我想出去食枝煙呀!出去陪我吖!」
男人之間總會有一些共同的暗號,雖然我煙癮未至,也不由分說跟了朗尼出去。