上到佢車，我發現佢成日偷望過黎。
我：專心揸車啦你。
耀：被識穿了添。
我：梗係啦，睇住你成日望過黎。
耀指一指我對腳：咁好難唔望架麻。
因為條裙前面高叉，我坐係度時，露出成截大脾。
耀將架車停埋一邊，除左件西裝褸，蓋係我大脾度：為免發生交通意外，比你遮一遮啦。
之後佢又再開車啦。當時我心諗，佢都幾nice喎，亦好自然咁，腦海中浮左另一個亞耀出黎。
去到酒店，我地開始預備，對稿等等，附近就其他兄弟啦，d姊妹就同左新娘去左影相。忽然亞耀又除左件褸同我披住：凍就妳著住先啦。我正想問佢搞乜鬼，佢打個眼色再同我講：我地要去新娘房睇下d遊戲道具呀。
入到去我就問佢做乜，耀：妳突點呀。
我即刻望下，因為酒店有冷氣，真係突左。
我:最衰你啦，我都話要買架啦。
耀:好彩無買就真，唔係我邊有得睇。
我：你仲講喎。
耀：得啦，我幫妳落去買啦，邊度有得買？
我：莎莎。
耀：好近者，妳係新娘房等我啦。
佢去左買時，我忽然諗佢去到莎莎，一個男人買乳貼，場面都幾搞笑。
過左一陣佢拍門，買完返黎啦，遞左盒乳貼比我。見到佢成頭汗又喘晒氣，佢應該係跑返黎。我拎張紙巾放係佢額頭：抹下汗啦。
耀：唔該。唔知盒乳貼啱唔啱呢？
我：咩啱唔啱呀？
耀：size囉，我唔知有無分大細碼。
我推佢出去：衰人，你出番去呀。
我就自己貼返乳貼。貼上去時，諗起係佢買，好似。。。
返出去我地就繼續預備司儀稿。其中一個兄弟，就叫佢X啦，成日過黎撩我，但又講得衰，亞耀都會幫我打完場。
之後無乜特別，係去到遊戲環節，玩新郎新娘時通常都會有d輕微3級既遊戲，d遊戲係兄弟姊妹諗既。我叫新郎玩時，新郎新娘竟然講司儀都要一齊玩，台下又全場起哄。今次捉蟲添。。。
其中一個遊戲係男女兩人用咀運送提子。我同亞耀要全程都貼住身，運送時咀唇都掂到好多次。
玩完後我應該面紅紅，亞耀仲拎住咪同台下講：多謝新郎哥，咁好關照，亦多謝我既靚女拍檔，再做司儀我一定第一個舉手。台下又一陣起哄。
到臨走之前，新娘新郎請兄弟姊妹同司儀飲杯，我其實唔太飲得，咁都有飲d既。飲完後X又倒左杯酒話要我飲，我梗唔飲啦，佢又講“係咪唔比面先”之類既廢話，如果唔係人地婚宴場合，我一定直接答“係”，但當時又唔想咁，加上X都睇落醉醉地，我就只係講唔飲啦就算。
亞耀佢又過黎幫我解圍：我代佢飲。就拎左個杯飲晒。
X：你幫佢頂咁就唔係一杯，一枝啦。
耀就拎起一枝：好呀，多謝你比機會我呃酒飲。
耀就成枝飲，我叫住佢叫佢唔好飲啦。X走過黎推開我，話唔關我事，耀出手隔開X，X忽然一拳打落耀塊面度，其他兄弟就即刻拉走X。
我扶住亞耀，見佢塊面流晒血，應該係比X隻介指割損左，我拎紙巾幫耀止血。
我：痛唔痛呀？
耀：好鬼痛呀。
我係佢被打個邊面輕輕錫左一啖：頭先多謝你呀。
耀：X呢？係邊？
我：走左啦，做咩？
耀：我諗住叫佢打埋我另一邊面麻。
我：去死啦你，自己按住止血啦。
Anne原來企係度一路望住我地，對住我奸笑。
耀同前一個耀最唔同既地方，就係佢比較活潑，把口識引人笑。
Part 2完
依part都係無野睇。
