ramhui

超讚~唔理係真人真事定係老作,你呢篇野係我睇過嘅最好,真心講句,我好少會追男性post,但你呢篇真係冇得輸~
我揀J,原因人總是貪新鮮,呢一個係人性的弱點!:smile_o12:

Favovas

樓主, 一定要堅決丫... 拒絕k 啦.

將來的野, 無人知, 你唔能夠預定將來j 會變心而揀k 的, 那是對j不公平, 不要假切將來的野, 要以現在及過去來諗, 過去k是一個不負責的人, 我覺得係自私的人, j 係一個為你設想的人. 一個以你為重的人.

heart_breaker

真係唔好意思, 要大家等咗幾日, 多咗好多comments, 我都睇晒, 多謝大家咁投入我既事, 同真心比意見, 多謝大家, 有睇埋我回覆既朋友應該知道我本來要出trip, 但改咗個客黎香港見面, 其實, 呢兩日都同個客傾個project, 所以無時間update, 依家close deal, 所以即刻同大家報告, 但update前有啲野要講下先,

首先有啲朋友話我係好男人, 但係sorry, 我唔係, 我係一個衰人, 正如之前有位朋友鬧我出去偷食, 佢講得無錯, 出得去偷食已經係錯, 仲要覺得無問題, 係更加錯, 不過當時覺得, 滿足生理需要係好重要, 比咗藉口自己一直錯落去, 同Joanne一齊之後, 我回頭是岸, 相信已經真正做返個好男人啦…………..

另外, 有朋友叫我做檢查, 唔好害咗Joanne, 其實, 我會定期做, 仲幾密既添, 尤其決定同Joanne一齊之後, 我去咗兩間唔同既centre做檢查, 應該好穩陣….好啦, 大家都等咗好耐, 事不宜遲, 係時候update大家啦,

星期日, 約咗Katrina 6點係間酒吧度等, 我未夠6點就到咗, 等緊佢既時候, 就同老闆傾下計先, 個老闆算係我舊朋友, 佢本身係香港人, 但早年係澳洲讀書, 學做bartender, 而家老咗回流返香港開咗呢間酒吧, 以前每個星期同K最少黎一次, 但佢出名唔係啲酒, 係佢啲小食, 尤其烤雞翼, 好食到暈………但分開之後, 我一次都無黎過………..當然都係因為唔想諗返起K啦…….

見返老闆, 第一句就問我…….

老: hey, 好耐無見啦, 終於又出現啦, 點呀? 無野啦嘛?
我: 咁醒既你, 知咩事, 我無野啦, 不過, 今次係約咗K黎呢度, 可能係最後一次見面
老: 說話又唔好咁講, 將來既野話唔定架嘛, you never know
我: 不過, 以我既性格, 分咗手, 一定做唔返朋友架啦………
老: 其實做朋友無壞呀, K係叻女, 話唔定有一日你地係工作上都會有交流呢, 又可以各取所需, 你同佢既工作, 經常都會接觸架嘛
我: 你咁講都無錯, 不過, 可免則免啦…………
老: 早幾個月, 聖誕節既時候見到K一個人黎, 我問佢係唔係發生咗啲咩, 佢只係話一切都唔同咗, 佢話好後悔做錯決定……..
我: 係咩, 就算係, 都無得返轉頭架啦, 要知道每個人都必需為自己做過既野負責………

之後K就到咗, 坐低之後, K好快就入正題…….

K: 我仲好鍾意你, 我知我無同你商量就走咗去, 係我唔啱, 好對唔住, 我真係知錯, 點解唔可以比次機會我?
我: 不如咁講啦, 如果你係我, 你會點諗? 你會點做?
K: 我會原諒囉, 因為如果我係你, 我會知道自己一路都對唔住個女朋友, 只係女朋友一直隻眼開隻眼蔽…….……
我: OK, 你咁講, 我無野好講, 我走啦, 總之我唔會為咗一個傷害我既人, 去傷害一個真正愛我既人……
K: 但你有冇諗過, 邊個先係一直比你傷害緊呀? 我去澳洲, 其實都係因為你, 你一直都偷食, 你以為我會好過咩, 你一直都傷害緊我, 只係我明白, 我有野係滿足唔到你, 而只要你識得返黎, 無真係同佢地搞啲咩出黎, 我都由得你, 因為你始終都好take care我…….,

係, 個刻我好guilty, 但係唔錯都錯咗, 又諗起你地大家比我既勇氣, 做衰人都係做埋呢次者, 人應該係為今日, 明日生活, 而唔係昨日……..

我: 係, 既然你都知, 其實我係點既人, 咁你更加唔應該對我有留戀, 你重新開始你既生活啦, 你咁叻, 你一定會有個更好既人生……同搵到個更好既人……..
K: 我咁講, 唔係要你有咁既反應, 我只係想你知道, 我係好鍾意你, 就算你做過啲咁既野, 我都無變過…….無話過要離開你………..

heart_breaker

我: 咁你又話走就走, 去咗澳洲……..

個刻, 發覺自己問錯問題…………

K: 咁你成日出去偷食, 我點能夠完全無野呀………

K佢開始喊…….係呢度既朋友話佢會一哭二鬧三上吊, 睇黎佢開始一同二, 當時心諗千祈唔好黎埋三呀……….

K: 我都有脆弱既時候, 當時Margaret佢好care我, 佢好了解我, 佢ex都係成日偷食, 佢都同我一樣, 係好唔鍾意性呢樣野, 之後, 佢見我咁辛苦, 佢就建議我去澳洲玩一年, 散下心………….其實我一直都好猶豫, 去唔去…….但係每次你話同朋友去飲野, 我都會諗你又去咗同其他女人上床, 你知唔知個感覺係幾難受……..你以前唔會咁, 但自從你識咗Nigel佢地之後, 你就成日同佢地出去玩女人……….

Nigel係我上司, Margaret係Katrina既同事……….我自知我自己有問題, 但係都發生咗, 我都改變唔到, 我正想出聲………但K申手, 叫我比佢講晒先……..佢一直keep住講……….

K: 久而久之, 我更加需要人安慰, 就係咁我最後比Margaret說服咗, 同佢一齊去咗澳洲……………
我: 等等先, Margaret喎, 你個同事, 幾靚女下, 但係, 係Les果個喎………咁即係你同佢?

K佢點頭……..個下真係好驚奇, 佢竟然唔係同男人囉, 你話死唔死, 除咗O咀, 我真係唔知有咩反應, 但回過神之後, 我都明白, 就算佢同邊個一齊, 所有野都結束咗, 我同佢之間已經結束咗……….但同K傾完之後, 心裡面留底咗一條痕, 一份永遠都補救唔到既內疚……….我唔會忘記, 我要自己記得自己做過既錯事…………

我: 不過事情都過去, 無論點都好, 都過去啦, 係唔係? 咁都好呀, 你又唔使再忍……..
K: 但係我同Margaret咩都無做過, 佢只係陪住我去散心, 我同佢咩事都無發生過
我: 其實真係唔重要架啦, 因為, 我真心鍾意Joanne
K: 你會為咗佢唔再出去搵其他女人, 玩one night stand?
我: 會呀, 佢真係好女仔, 我唔會做任何野傷害佢, 你唔好再問, 我知我答你啲問題既同時都係傷害緊你, 我要走啦, 希望你以後生活開心啦………

我起身, K即刻捉住我隻手,

K: 你同佢有冇做過愛? 係唔係因為佢肯成日同你做愛? 定個o靚妹好叻做愛? 所以你有咗佢之後, 可以唔再出去搞其他女人?
我: Katrina, 你唔好亂諗, 我認當初我出去玩, 係因為性需要, 但對住Joanne, 我無咁諗過, 我只係唔想傷害佢…….
K: 我知, 佢又後生, 又靚, 你地啲男人個個都係咁………..永遠越大越有market, 我地女人就越鬥唔過時間………但係你有冇諗過我地既經歷, 我地大學開始到而家, 我地一齊行過咁多路, 一齊計劃未來……..你無半點留戀?
我: 咁你去澳洲時, 對我又有無半點留戀?
K 咁當時, 因為你做咗咁多野去傷害我, 我先會咁做, 比著你係我, 你都可能會做同一個決定啦……….
我: 係, 所以既然過去都無辦法改變, 就改變未來, 你未來無咗我, 就會好好多…….
K: 咁我都可以比到個o靚妹比到既野你………我地重新開始啦………我地由而家開始改變呀………..
我: Katrina呀, 真係完咗架啦, 我為我對你做過既野道歉, 真心架, 好對唔住, 一直傷害咗你咁耐, 我唔求你原諒, 我祝福你將來生活愉快

我撥開Katrina隻手, 企起身, 行咗幾步, 佢攬住我, 我即刻推開佢, 之後Joanne打比我, 佢打得正係時候……..

我就即刻同Katrina講, 我要接電話, 係女朋友, 之後同Joanne講咗聲”而家走得”之後, 我就同Katrina講, 要走……….Katrina無應我, 我就行咗去…….呢兩日佢都無搵我………..希望同佢既關係真係告一段落………….

heart_breaker

之後, 我梗係第一時間去搵Joanne同佢食晚飯, 都係個句, 佢太可愛啦, 全程食飯, 欲言又止既表情, 搞到我忍唔住, 刻意唔出聲, 睇多陣………最後我放低隻叉, 開聲講……

我: 你係唔係有野想問我呀?
J: 唔…….係呀, 頭先呢? 你地傾成點呀? 我驚你唔想講呀…….
我: 首先呢, 我想你記住一樣野, 你依家係我女朋友, 你想問咩就問, 唔使怕, 知唔知? 至於頭先同Katrina傾完, 就係我同佢已經徹底結束啦…….
J: 咁........你有冇問佢點解去咗澳洲…………?

其實, 我真係唔想同Joanne講, 但係呢, 我依家覺得兩個人一齊, 坦白真係比任何野都重要, 就算係唔開心既, 但真心相愛既話, 一定會理解同接受…….我捉住Joanne隻手…….

我: 因為我以前唔好, 我因為同K既性生活非常唔愉快, 所以呢, 我就出去識女人, 同佢地one night stand, 因為K佢受唔住, 就同咗一個女仔飛咗去澳洲散心, 但你放心, 上次你見到果個, 已經係最後一個, 除咗你, 唔會再有第二個女人可以瞓係我張床度.

再錫咗佢隻手一啖…………

J: 嘻嘻, 真係既? 你唔會呃我?
我: 唔會, 你放心………..

好啦, 事情總算告一段落, 希望我以後同Joanne都可以咁開心快樂……….再次多謝大家, 希望唔會再上黎update我同Joanne既野, 最多都只係開下post講以前既經歷, bye bye~

阿普

結局後第一帖

阿普

祝你同 Joanne 開開心心

tenderkenji

我撥開Katrina隻手, 企起身, 行咗幾步, 佢攬住我, 我即刻推開佢, 之後Joanne打比我, 佢打得正係時候……..----------> u should spend most of the courage of your life to do so......
good luck and best wishes!

lionking_man

C-Hing 過來人同你講一句, 性生活不協調的情侶或父妻系一定無好結果, 所以你吾需要心軟再想你ex了

睡夢小草

真係好好好sweet!
祝你地永遠幸福快樂 ;)