又到星期一喇，又係返工努力嘅時候，寫一段同大家努力下先～
Erieann XXIV
阿星其實都算唔話得，今朝兩點幾就出門口一路揸車落去獅城隔離嘅牛佛州Erieann屋企接佢，去到嘅時候其實都只係朝頭早八點左右，Erieann已經喺屋企門口伸長條頸左望右望，成舊望夫石咁。簡單咁介紹一下Erieann間屋，佢住嘅係獨立式洋房，個花園由大閘揸車上山去到屋企都有五分鐘路程，而且沿途又有樹林又有園丁喺度做嘢，令到阿星懷疑究竟Erieann有錢到咩地步。去到大門口嘅時候阿星見到Erieann已經走咗出嚟企喺度望，一見到阿星架車到逹，即刻笑容滿面咁走上嚟，一路笑一路鬧阿星咁遲先到。阿星望住佢笑，落車行埋佢度同佢話：「唔好意思，少少塞車，阿星諗住半夜兩點半出發應該會早到，點知都係遲咗。」Erieann一聽到阿星一路都冇瞓揸咗六個鐘車嚟接佢，有啲開心，又有啲唔好意思，開聲同阿星話：「你唔攰咩？不如叫車去機場啦？」阿星呢啲做好人做到底，蛇咬都話冇問題啦：「唔怕，一陣你陪阿星去食個早餐飲杯咖啡就得。」Erieann聽到非常之開心，即刻叫人陪阿星入屋幫佢搬行李出嚟。阿星入屋望兩望就見到兩大個行李喼同一個手拖喼，行到阿星架車度幫Erieann打開車門上車之後，工人就幫阿星將幾件行李放上車尾箱。
上車之後，阿星發現Erieann一路望住阿星笑咪咪咁。阿星忍唔住笑咗出嚟，問阿Erieann：「阿星個樣好殘咩？」Erieann話：「唔係呀，做咩咁問？」阿星摸下個下爬話：「咁你笑到見牙唔見眼嘅？」跟住Erieann笑笑口咁話：「見到你，今個星期日日見到你咪開心笑囉。」你話啦你話啦，通頂揸六粒鐘車落嚟接Erieann，聽到佢呢句說話個心都甜哂，抵哂，開心哂。阿星撻著架車，慢慢駛離呢間豪中之豪，成間酒店咁樣嘅豪宅，同Erieann一路揸車向獅城嘅機場出發。查實阿星要將架車泊喺獅城嘅機場度一個星期先可以返嚟。大家唔知有冇留意，機場泊長期車嘅話查實都唔平嘅。長期嘅意思一般就係停泊三日以上，而且會有一啲特定嘅地方俾你泊，價錢都由每小時變成每日計算。阿星同Erieann一路揸住架車，Erieann周不時望住阿星，瞇晒眼咁笑，隻比起冇骨海南雞仲要軟仲要滑嘅右手，就搭住阿星放咗喺波棍上面嘅左手，果啲親蜜程度直頭好似新婚旅行咁款，阿星望住Erieann，真係會心郁。Erieann其實比起Cassy年紀大5歲，細過阿星三年左右，係一位有錢嘅媽媽，屋企有幾個工人照顧小朋友，啱啱仲見到有個花王添 。不過阿星查實真係唔想問佢任何有關佢自己唔想俾阿星知道嘅嘢，話哂Erieann份工都係身居要職，係成日放假咁解啫。阿星同Erieann就咁樣拍住拖揸車過關去到獅城嘅飛機場，泊低架車攞咗行李，拖住手去搭飛機渡假去喇。
今次去嘅地方，阿星唔講係邊樹啦，因為查實阿星都唔係好識，全程Erieann精心安排，阿星一啲都唔使諗，既然你諗得咁周到，阿星當然表示非常之高興，而且用心享受啦。不過老實講，去旅行嘅嘢真係要自己做下功課，揾定啲資料穩陣，唔係一陣有啲咩意料之外嘅話，就好難控制喇。去到島上面嘅渡假酒店，當然要睇下今晚同Erieann瞓邊樹啦，個浴室正中間果個大浴缸，你估夠唔夠阿星同Erieann兩個今晚一齊浸呢？
（待續）😬
[ 本帖最後由 star_platina 於 2021-6-21 08:02 編輯 ]
