第六十一章．似弱實強
過左半個月，期間Joan借啲意就挑剔Lesia嘅錯處然後鬧佢，又係唔係都推好多嘢畀佢做，誓要迫到佢頂唔順，自己離職為止，然而Lesia明知佢係有心咁做，都一一承受，重向佢道歉，不過Joan當然唔會因為Lesia嘅道歉而停止玩死佢。
有一日早上，Joan獨自返到公司嘅大堂，畀幾個公司男同事阻擋，其中一個男同事好惡噉警告佢:「你唔好再糟質Lesia，唔係等於同全公司男同事過唔去。」講完之後幾個公司男自行散去。
原來喺呢半個月，公司嘅男職員開始奇怪，點解好多時都見唔到Lesia，終於幾個男職員忍唔住，即使違反公司規定，都要偷偷地上去Audree辦公室搵佢，因為公司有規定，除非獲得到受權，否則如非必要，職員係唔可以隨便上Audree辦公室，違規嘅職員最嚴重會被即時解僱。
啲男同事上到去，見一大堆文件喺Lesia張枱上，其中一個男同事問:「點解你會有咁多嘢做架?唔怪得知成日見唔到你啦。」Lesia抬頭，見有幾個男同事企喺佢枱邊，反問:「你地上黎有咩事呀?」另一個男同事話:「我地好耐都唔見你落黎，好擔心你呀。」
Lesia即刻好關心話:「唔係因為公事，你地唔可以隨便上黎架，畀Joan姐見到就唔得了，快啲返落去啦。」嗰幾個男同事聽到佢咁關心自己，豁出去話:「唔緊要，再多咪炒囉，我地唔怕佢，一定係佢妒忌你，先畀咁多嘢你做黎糟質你。」
Lesia否認:「唔係呀，係我自己做得慢，唔關Joan姐事架，佢鬧我係應該架，你地返落去先啦，唔好再阻住我做嘢。」嗰幾個男同事一聽到Lesia曾經畀Joan鬧，立刻有個男同事提議:「我地要同Joan理論。」
Lesia好緊張話:「千萬唔好呀，你地走啦。」嗰幾個男同事都唔肯:「我地要等Joan返黎。」Lesia變得有啲激動:「你地再唔走，我叫保安上黎架啦。」其中一個男同事急忙話:「你唔好嬲，我地走啦。」
等佢地走晒，Lesia忍唔住喊出黎，同自己講:「點辛苦都捱落去，我一定要紅。」自從家族生意失敗之後，佢爸爸仍然懷緬家族過去風光嘅日子，奢望有一日可以重返上流社會，所以積極培養佢，希望佢嫁入豪門，等親家可以喺生意上幫到自己。
但係事與願違，Lesia嘅背景，加上佢嘅外貌同埋教養，反而成為城中富豪想玩嘅目標，因為佢地已經玩厭晒啲女明星同埋女模特兒，有唔少富豪搵人接觸佢爸爸，表示要包養Lesia，重表示可以係生意上幫佢，佢爸爸始終係名門出身，當然唔肯答應。
後來Lesia冇意中睇到Newton間娛樂公司嘅Facebook出左個帖，呼籲有興趣拍廣告嘅女仔去公司試鏡，被選中嘅女仔將會成為廣告中嘅女主角，所以佢決定去試鏡，希望藉著個廣告令自己成名，再用自己嘅名聲去幫爸爸嘅生意。
後來個廣告落選，Lesia喺失望之下把心一橫，打算接受十大首富之一嘅億萬富豪包養，因為佢喺眾多富豪之中，開出左最好嘅包養條件畀Lesia，其中最重要嘅條件就係個富豪答應會資助佢爸爸嘅生意。
就喺佢正要接受嗰個億萬富豪包養嘅時候，Newton打手機約佢上娛樂公司見面，向佢開出五年合約，不過條件係要佢先去Audree集團打工，而且唔準坐自己嘅私家車返工，一定要坐公共交通工具。
Lesia問點解，Newton就話:「你自少就受到家庭嘅約束，好少接觸到外面嘅世界，所以你試鏡嘅時候，表現得好唔自然，就係噉先會落選。」Lesia跟住話:「噉我明嘞，你要我去體驗生活。」Newton補充:「而且會好難受。」
冇幾耐，「Joan故意糟質Lesia，而且重鬧佢」嘅流言傳遍整個集團，啲男同事都為Lesia忿忿不平，咁啱呢日Joan冇同Audree一齊返工，畀幾個男同事見到，決定要為Lesia出頭，喺大堂警告佢。
Joan臉黑黑上到Audree辦公室，見Lesia已經喺到做緊嘢，就行埋去Lesia張枱，攞起晒啲文件，Lesia問:「做咩事呀?Joan姐。」Joan就好冷淡話:「我唔敢再勞煩你大小姐做嘢嘞，免得畀全公司男同事針對。」
Lesia唔明:「發生咩事呀?Joan姐。」Joan冷笑一下:「你就威啦，一話我糟質你重鬧你，你啲兵就喺大堂圍我警告我嘞，我重唔知驚咩，你以後就咩都唔做，想點到都得，唔使理我架。」
Lesia估唔到冇意中埋怨左一下，會攪到咁大件事，喊噉口話:「對唔住呀，Joan姐，我真係唔知會攪成噉架，係我唔好，亂咁講嘢，你原諒我啦。」Joan即刻話:「好呀，你辭職我就原諒你嘞。」
