第五十九章．機心
當日Joan雖然冇丟棄Jason張紙仔，亦故意唔打手機畀佢，果然過左幾日，Jason再上集團質問搵:「你做咩唔打手機畀我。」Joan反問:「我點解要打畀你?你係我邊個?」重來冇人會噉同Jason講嘢，佢即刻好嬲話:「你既然唔係我邊個，我就叫mommy料炒左你。」
Joan亦立時話:「唔使啦，我依家就辭職。」用部電腦開始打辭職信，Jason本來諗住嚇下佢，點知佢真係辭職，伸手阻止:「唔使咁認真，我講下笑咋，mommy咁重用你，點會畀你走。」
Joan又點會真係要走，佢賣保險嘅時候經常同男人周旋，熟知呢啲有錢仔脾氣，而Jason經Newton教導之下，喺應該女人方面已經大有進步，不過佢溝嘅女離不開老師同女同學，遇到機心咁重嘅Joan，自然比下去。
Joan啍一聲，冇再打辭職信，Jason就提議:「不如我今晚請你食飯當陪罪。」Joan揶揄Jason:「係咪我唔去你又要話炒我，噉我去囉。」Jason搖頭話:「唔係呀，我只係想表示歉意。」Joan扮到勉為其難:「噉好啦，見你咁有誠意。」
Jason以為自己好叻，氹得返Joan，其實佢已經畀Joan引領入佢嘅計劃之中，自此之後，佢地開始多左約會，Joan重對Jason好好，但係就一直都唔肯同Jason上床，Jason雖然有啲唔滿意，仍然耐心等待機會。
直到有一日，Joan去Jason屋企同佢調情，Jason又要同佢上床，今次佢唔再抗拒，重全心全意噉服侍Jason，令Jason得償所願，Joan之後提出要佢返公司實習，再解釋畀佢聽個理由，佢自然樂於答應。
Joan噉做有兩個目的，一係可以慢慢順化Jason，二係一定可以博到Audree好感，因為可以喺暑假日日見到個仔，Jason最終被Audree安排去市場部門做實習生，因為市場部對一間公司黎講係最重要。
Audree重吩咐佢唔可以表露自己身份，一般職員少見到Jason，唔知佢係太子爺，而Jason亦都好醒目，入到部門聽教聽話，而且佢又生得俊朗，把口氹得人，十分之受女同事喜愛，但係就引起啲男同事妒忌。
Joan就扮下關心，不時傳短訊畀Jason，問佢習唔習慣，而Audree對Joan嘅做法好滿意，令到佢可以日日見到個仔，但係佢為人謹慎，冇完全否定Newton對Joan嘅睇法，就提醒Joan:「你只要好好對Jason，唔好有非分之想，我會用心栽培你成為Jason將來嘅得力助手。」
Joan自然知道Audree嘅意思，唔好諗住對Jason好，就可以嫁畀佢:「我明白，將來係點我都冇所謂，只要Jason可以成才就得架嘞。」Audree唔理佢噉講係真心定假意:「你識噉諗就得嘞。」Joan心諗:「你既然對我仍然有顧忌，我就偏要搶走你個仔。」
過左幾日嘅早上，有一個女仔去到Joan張枱，Joan抬頭一望，見個女仔外表斯文，身材高挑，瓜子臉型，皮膚哲白，而且擁有一對大眼睛，就好有啲唔客氣問:「你係邊個?點解可以上黎?」個女仔臉露笑容話:「你好，我叫Lesia，係黎做見習行政助理。」
Joan好冷淡話:「我從未聽過Audree要請見習行政助理。」呢個時候Joan枱上面嘅內線電話傳出Audree把聲:「Joan，有個女仔叫Lesia，今日會黎返工，唔知黎左未?」Joan答:「佢啱啱黎左啦。」Audree話:「好，噉你同埋佢一齊入黎。」
兩個人入到Audree辦公室，Joan即時扮好奇:「點解之前冇聽過你要請人嘅?」Audree簡單話:「係呀，前幾日我個好朋友介紹佢黎，我咪當畀個機會後生女，而且多個人可以幫下你手都好。」
Lesia禮貌話:「多謝Audree姐畀機會我，我會努力工作。」Audree話:「嗯，你以後就跟Joan做見習行政助理，好好噉幫佢做嘢，再從中學習，唔明就要出聲問。」Lesia話:「我一定會跟Joan姐好好學習。」Audree自然噉點一點頭，轉對Joan講:「你都要好好噉教下佢呀。」
Joan心中百般唔願意，仍然話:「知道，噉我同佢去人事部搞埋啲手續先。」佢地一出Audree辦公室，Lesia又露笑容，再伸出手:「Joan姐，以後合作愉快。」Joan萌生妒意，唔同佢握手:「你唔使扮晒嘢。」自己轉身先行去升降機。
