第五十章．自保
當晚Joan偷拍完Justin同May喺連鎖店所發生嘅事之後，返到屋企睇返條片，終於知晒Justin同May係點呃公司，第二日喺辦公室正打算向Audree告發佢地嘅時候，Justin忽然行埋佢張枱，放低左一個盒，又同佢講:「尋晚唔好意思，就噉走左，送返份禮物畀你補數。」
Joan等佢行返入房先打開個盒，個盒入面原來係一隻高貴手錶，佢望住隻錶諗:「告發佢地，Audree最多讚賞下我，就算升職加薪都唔係咁著數。」合返埋個盒，攞埋入Justin個房:「隻錶我唔要啦，重有啲嘢畀你睇。」喺手機開左嗰段片，遞畀Justin睇。
Justin睇完段片，瞪住Joan:「你想點?」Joan話:「我只係想從呢單工程開始，都可以分錢。」Justin好冷淡話:「你都幾大想頭喎。」Joan扮晒無奈:「冇辦法啦，知道左啲唔應該知道嘅嘢。」再問:「你唔會殺我滅口啩。」
Justin搖搖頭:「黐綫!」Joan:「噉啦，為表誠意，你可以刪左段片，我冇留底。」Justin問:「你唔怕我會反口?」Joan話:「唔怕，始終我知道晒成件事，除非你地收手啦。」Justin明白佢嘅暗示，諗左一刻:「我要同May商量下先。」
Joan話:「好，不過好奇一問，點解你會同May合組公司?」Justin話:「講畀你知都唔怕，其實我之前同佢拍過拖。」Joan忍唔住"吓"左一聲，Justin唔奇怪佢嘅反應:「我認我只係想利用佢同Audree嘅關係，入黎呢間公司。」Joan話:「噉佢除左有呢個誘因之外，都好難搵到男人同佢一齊。」
Justin繼續話:「我入左公司之後表現出色，幾年時間就升到呢個位。」Joan接落去:「噉自然有好多靚女可以玩，重使乜要佢。」Justin只係眉頭一揚，表示同意:「不過我始終係欠佢，所以開公司就預埋佢一份囉。」
Joan話:「哦，原來係噉，我出返去先。」Justin冇刪除段片就將部手機畀返佢:「隻錶你攞埋去啦，送得畀你就係你嘅。」Joan接返部手機，攞埋個盒，笑一笑:「多謝晒，其實我都好鐘意隻錶。」
「唔得。」May好激動話:「點解要益佢。」
「但係佢已經知道晒我地啲嘢。」Justin嘗試說服佢:「而且嗰啲都係街外錢。」
「最多搵人搞掂佢。」May好狠噉話:「睇下佢重點勒索我地。」
「你都白痴嘅。」Justin鬧佢:「諗埋晒啲噉嘅嘢。」
「你梗係唔捨得佢啦。」May發脾氣話:「佢咁正，又可以成日畀你屌。」
「你冷靜啲先。」Justin安撫May:「我只係想解決問題，而且佢真係幫得我手，有佢加入，話唔定一切會更加好。」
「我唔會益佢。」May心知唔可以再拒絕，不過點都係唔鐘意Joan:「要畀用你自己嗰份畀。」
就喺Audree搵人查間公司兩日後，差不多放工時間，Audree部手機收到個訊息，佢睇完之後打畀Newton:「你依家有冇時間，我想你幫一幫我。」Newton話:「冇問題。」Audree就傳左個地址畀:「你去呢個地址，有人會交一份嘢畀你，你帶埋份嘢再上我屋企。」
Newton已經有Audree屋企鎖匙，開門入屋坐左一陣Audree就返到黎，跟埋佢入黎嘅竟然係Joan，Newton見到Joan就轉頭，用眼神詢問Audree，Audree話:「你唔使奇怪，一陣你就明。」又叫Joan:「你都坐低。」
Joan坐低之後，Audree示意佢:「你開段片畀Newton睇。」Joan就攞部手機出黎，開埋段片再遞畀Newton睇，Newton睇完問:「段片應該唔係最近先拍，點解依家先拎出黎?」又話:「我覺得你係知道Audree開始查件事，為求自保先攞段片出黎。」
Audree解釋:「Joan已經向我交待過，佢曾經畀過段片Justin睇，希望佢向我自首，點知佢睇完，反而用錢收買Joan，Joan就衰貪心，收左啲錢之後刪左段片，最近先喺雲端搵返。」
Newton接住講:「佢梗係跟住認衰，又話覺得你對佢好好，噉做好對你唔住，於是主動去搵你，講出晒成件事。」Joan好認真話:「我講嘅全部係事實黎架。」跟住就喺自己個袋攞左一大包現金出黎放喺枱:「啲錢我一啲都冇用過。」
Audree又話:「我信佢，連May都唔知，佢又點會知道我查間公司。」Newton問:「你查都唔查清楚，咁就信佢?或者佢真係咁啱知道你查間公司，一啲都唔出奇喎。」Audree唔接受Newton嘅假設:「邊有咁多咁啱，你諗多啦。」輕輕鍚佢塊臉一啖。
原來嗰日Joan攞啲文件畀Audree睇，留意到佢特別注視Justin同May嘅公司，心諗:「唔通Audree開始懷疑佢地?」到Audree睇過晒啲文件，讚左佢講兩句，佢行出Audree辦公室，轉身閂門嘅時候，
喺條門擘度䁽到Audree用筆寫低啲嘢，就心知不妙。
Joan嗰時已經收左Justin錢，而且刪除左段片，轉頭同May點點頭之後就返落去，但係就一直諗緊如果Audree真係查出成件事，自己有份收錢會好大鑊，心諗:「早知就copy低段片啦，依家唯有叫佢地即刻執左間公司先。」
Joan返到辦公室見Justin唔喺度，就想用手機打畀佢，咁啱見到個雲端Apps，忽然想起之前為免手機啲嘢唔見晒，曾經設定個Apps自動保存啲片同文件上雲端，於是上雲端一查，果然見到段片喺度，佢就將段片下載，然後向Audree主動交待一切，重話會交返晒啲錢出黎。
[
本帖最後由 netsee 於 2017-10-19 04:07 PM 編輯 ]
