第四十九章．不動聲色
Newton即使做左一間公司嘅最大股東，都仍然不時返去Coral嘅集團，有一日Coral話:「啲連鎖店嘅工程應該已經完成得七七八八，不如落去睇下啲店嘅進度係點。」Newton贊成:「我都想睇下Audree集團負責嘅工程，係咪真係咁正。」
當佢地突然出現喺其中一間店嘅時候，正在進行工程嘅工人停晒手，有個負責人笑笑行出黎:「Coral，噉得閒落黎巡店呀?」Coral亦都微笑話:「係呀，我都係隨便睇下，唔會阻你地太耐。」個負責人話:「唔會，我帶你四圍行下。」
Coral同Newton跟佢住行，佢邊解釋工程嘅進度，當行到間店嘅其中一範圍，Newton對住嗰個範圍張望，臉上露出左奇怪嘅表情，Coral問佢:「冇咩嘢呀嗎?」Newton望住佢，搖一搖頭。
佢地行多一陣，Coral就同個負責人講:「我都幾滿意，今日麻煩晒你。」個負責人恭敬話:「唔麻煩，歡迎你隨時再黎。」就送左佢地出去，佢地上左車之後，Coral再問:「你侯先冇嘢呀嗎?」Newton先話:「我總係覺得嗰個範圍好唔協調。」
Coral解釋:「噉都唔奇，以我所知，Audree會搵唔同嘅外判公司去幫手。」經Coral一講，Newton忽然諗到點解唔協調:「每間外判公司都應該各自負責自己嗰部份工程，互不相干，但係嗰個範圍畀我嘅感覺係，好似由幾間外判公司合力去完成。」
Coral話:「噉又奇怪喎，照計就冇理由噉做。」Newton話:「不如我去同Audree傾下，睇下喺咪佢地一貫嘅做法。」Coral冇異議:「你去見下佢都好。」吩咐司機開車去Audree嘅集團。
Newton一行入Audree間辦公室，Audree就溫柔話:「估唔到你都做埋公司嘅最大股東喎。」Newton一笑:「都係咁啱啫，我自己都估唔到。」Audree再話:「噉你以後要玩啲女就更加易。」
Newton話:「我今日唔為女人黎搵你。」Audree瞄左手錶一下:「係喎，你又好少呢個時間黎搵我。」跟住問:「噉你搵我咩事呀?」Newton就將喺Coral嘅連鎖店所留意到嘅事講畀佢知。
Audree聽完之後眉頭一皺:「我會叫佢地留意下。」Newton正想解釋，Audree用手指放喺嘴前，做左個噤聲嘅手勢，再指一指度門，示意May喺出面偷聽，Newton點一點頭，表示明白，就只係話:「可能係我多心。」Audree笑佢:「你竟然都知自己多心。」
May係出門外偷聽到Newton講嘅嘢，心中一驚:「唔通佢地知道晒?」後來再聽到Audree冇乜反應，先比較安心:「以後要叫佢地小心啲先得。」跟住聽到Audree把聲喺內線電話同佢講:「你去樓下coffee shop，買兩杯我平時飲開嘅咖啡上黎啦。」May答:「知道，Audree。」
Newton等左一陣先問:「你要我唔好再講，係唔想畀May聽到。」Audree點頭:「你睇到嘅情況，好明顯有人利用職權，為自己賺取利益。」Newton問:「係咩手法?」Audree解釋:「嗰部份工程，本來應該由一間公司負責，但係個有職權嘅人要其他公司做埋佢，而錢就自己收。」
Newton諗左一下:「我明嘞，你又唔肯定係邊個做，即使係May都有可疑，所以唔想畀佢知。」Audreen又點下頭:「所以我要不動聲色，先收集多啲有關證據，再作出行動。」
Newton又問:「May成日偷聽你講嘢咁唔道德，點解你唔炒左佢?」Audree話:「炒左佢，一時間我請唔返個幫到我手嘅人，而且有時有啲嘢，我係特登畀佢知，佢就識做。」Newton嘴角一笑:「最奸嗰個始終係你。」Audree反駁:「邊到夠你"姦"呀。」
有一日Joan再攞啲文件上黎Audree辦公室，Audree睇完啲文件:「唔錯，進度都好理想。」Joan話:「預期重有幾日就會完成晒所有工程。」Audree點頭話:「你跟得好足。」簽完名之後話:「你可以返落去，我會叫Justin提前完成你嘅試用期。」Joan開心話:「多謝，Audree。」
當Joan行出Audree嘅辦公室，同May對望左一眼，點一點頭先再走，而Audree就喺辦公室裡面，寫低左其中一間外判公司嘅名，跟住打手機畀一個人:「你同我查一間公司嘅底細，公司名我傳去你手機。」
