一大清早，發覺身邊個死佬夠晒鐘都未起身，一腳伸落佢度先醒，跟住又要叫小朋友起身返學，佢地又係產極都唔醒，都係比你地昏迷多陣，攪掂自己先，妖! 原來個死佬霸住個廁所，唯有攞定小朋友套校服出黎，冇野做潻! 再產多佢地一次，佢地卒之起身，但又要等佢地回魂，個死佬終於出黎，都係攪掂自己先!

個死佬望下小朋友就出門口，妖! 攬都唔攬下我。又到我地出門口，卒之送完小朋友返學校，又到自己忙，打個電話比亞媽無聊兩句先，又打比亞妹無聊兩句先，都好似冇人可以打比佢無聊下，又要去街市，唉! 今晚又唔知煮乜好，諗到頭都爆! 好不容易先買完餸返到屋企，又洗又切，攪完又輪到洗衫，妖! 都話左買部大少少洗衣機啦，又要洗多轉，攪完部洗衣機，又要到吸塵拖地，唉! 救命呀! 點解我好似個 “賓妹”咁!

攪完一大餐，又到午飯時間，約下人食飯先，食完飯返屋企休息下，上下網先，妖! 咁快又夠鐘接放學，放學返黎又話肚餓，食完又要洗，洗完又要趕佢地去沖涼，攪完一大餐又要同佢地做功課，嘩! 你…乜野題目黎架，點解咁深架! 你學校考你定考我呀?

比學校考完又到煮飯時間，煮好飯個死佬剛好返黎，大家食完飯，個死佬又祇係識同小朋友玩，碗又唔洗! 唉!

到個小朋友訓左，佢又掛住打電腦，咁我重唔訓呀，到我想訓你又走入黎話要，妖! 又成日唔理人，依加話要就要，你估我唔攰架，你自己攪掂佢啦，唔好黎攪我呀!

拿! 我有 jj 架，我用第一身去寫之麻!