七不思議食女事件 Vol. 48
「陳納邦，做緊咩呀，補完習未？今次補咁耐，都唔打俾我既？」牧子溫柔一如往昔，不知男友於情慾禁區妙射得手，做一晚城市花園大帝。
我輕按阿予纖纖玉手，試圖俾唔存在既安全感佢。阿予遇上第二個施立毅，一雙小眼睛向天花板放空，可憐可悲。
「係，個學生今日問題特別多，我私人補多左俾佢，喂，一陣打俾你丫，乖。」只要講多兩句，阿予必定崩潰，我當機立斷，收左牧子線，將阿予一擁入懷，輕吻佢臉龐。
之前講過，我行走江湖，食女無數，素遵父教，「死都唔認」，屌西屌感情，無往而不利。但阿予情感易碎，謊言一旦戳破，北角私樓夢碎事小，華富納邦去勢事大。
周旋二姝，全身而退，對受西化教育既浪子黎講，都不過係權衡輕重既Prisoner’s Dilemma。人天性自私，我由是決定坦白從寬，脫離德仔既羈絆：「岩岩係我女朋友打俾我……」阿予聽罷，指甲深陷我既前臂，幾近見血。
淚水掛於阿予眼尾，欲墮不墮之際，天才小說家逆轉思路，又講左一番蕩氣迥腸既大話：「你進入我生命既時候，岩岩同佢分手，但係識左你之後，中間發生左好多事，唔小心又係番埋一齊，我唔敢同你講，係因為驚傷害左你，變左第二個施立毅。」阿予遭甜言蜜語攻陷，由爪變掃，輕撫我前臂既爪痕，既惱怒，又心痛。
「識左你之後，我一路都寫緊小說。我見親你，都充滿靈感，所以我將個女主角叫做阿杼。
「根據小說既大綱，阿邦以為自己好愛阿杼，點知佢缺乏母愛，鐘意左佢砌過既百佳阿姐，狠飛為左自己而被冰室老細強姦既阿杼。最尾我無咁樣寫，你知唔知點解？」呢一刻，我再肯定自己寫小說，講大話既天賦。
阿予聽到荒誕既劇情，不由得破涕為笑，搖搖頭咁講：「唔知呀，你繼續講啦。」
「我一直以為我會按劇本寫，但係我越寫就越代入，愛上左唔存在既阿杼。直到我係星光燦爛既夜晚，過海渡輪之上鍚左你一啖，我就知道鐘意既係你，唔係存活係Microsoft Word入面既女主角。
阿予被我既說話感動，渾然忘記牧子既存在。
「我嗰日係百佳無砌到你，因為我知道自己有女朋友，你又醉左，咁樣做，對你唔公平。」我捉住佢既手，再講埋呢個大話落去：「現實入面，我已經錯過左你兩次，我又有女朋友，我地無可能係埋一齊，所以我唔會係鍵盤世界再錯過你多一次。」如果HKU有個Major係滾女人，我一定First Hon畢業。
「我鐘意Happy Ending，你俾個好既結局阿杼啦，應承我好唔好？」阿予對Happy Ending有一種無法解釋既執著。
「好，我就黎畢業，上下求索，對前途一無所知，唯有係冰室吊扇之下，邊食雞翼公，邊寫小說，先搵到救續。我有女朋友，我地無可能係埋一齊，你唔係我身邊，我無靈感憑依，蕩氣迥腸既小說注定爛尾，我唔再寫喇。但係我今日先知，我擺脫唔到你。我唔係有心呃你，對唔住。」我講到激動處，諗起牧子，竟然眼角噙著不知真情定假意既淚水。
「有無女朋友，又有咩所謂，只要你坦白，唔好好似施立毅咁呃我就得喇。」阿予被我既大話感動，用指尖掃去我既眼淚，身心都被我征服左。
一番說話，兩個用法，牧子阿予，一雞兩味。就好似好友屌聖森爺話齋，將同一番說話，一次過send畀電話內可食用既囡囡，省時快捷，萬試萬靈，簡直係食女教條，Eating Girl’s Creed。
就係咁，我用三寸不爛之舌，輕易拆解呢個屌感情雙飛死局。
次日，我去銀行兌過支票，步出銀行，按一按袋裡得來不易既銀兩，確保佢不會好似我既感情一樣，易去易逝。我拎起電話，十隻手指好似跳舞一樣，不斷回應二姝痴身短訊，口袋既銀紙忽然變得沉重，竟然令我羨慕山大，佢一出世就住貝沙灣海景豪宅，視富貴如空氣般理所當然。
自此之後，我一三五就陪阿予，二四六就陪牧子，星期日我再無打j，令自己玄鐵重劍稍作休息，過住忙碌兼荒唐既大學生活。我游刃於兩女之間，踩綱線如履平地。
有一日，牧子接我放學，陪我係港大荷花池食Subway。我將Sub of the day食到一半，牧子忽然同我講：「你係咪唔鐘意我喇，你而家好少主動掂我喇。」
我分身侍二女，須知再鋒利既玄鐵重劍，都會有生銹既一日，牧子竟然用我行房既次數，質疑我對佢既愛。我對呢句說話極其敏感，彷彿傷害左我既尊嚴。
「我咁辛苦去搵幾份補習，俾錢你租屋住，等你唔駛再住係契哥到，你而家話我唔鐘意你？」呢幾個星期，我瘋狂替人補習，俾錢牧子，好似王爾德既《夜鶯與玫瑰》入面既夜鶯一樣，用自己有限既生命尋找玫瑰，送俾意中人，令佢幸福。
「你咁大聲鬧我做咩？好啦，我返番去契哥到，唔再要你幫我喇。」牧子受軟唔受硬，竟然想拋疾我。呢個牧子，我真係又愛又恨。
我好嬲，諗起對阿予費盡唇舌，方呃呃騙騙到些許補習錢，南水北調，歷盡艱辛，供給正印。於是方丈好小器，將半個sub of the way怒轟落荷花池，對住牧子咆哮：「走囉，走左以後唔好返黎！」
牧子拎起手袋，轉身就走，頭也不回，經Run Run Shaw與中山階，行落開心公園。係開心公園中間，牧子步伐稍為放慢，但係我真係好小器，放唔低男人既尊嚴，無追到上去，牧子既短髮，就同開心公園既榕樹一樣，消失得不留半點痕跡。
我係荷花池踟躕不前，牧子去契哥到住，我就要去阿予屋企過夜。恰鳩我丫拿，恰鳩我丫拿。
巴士上面，我偷偷地check牧子既last seen，發覺時間凝固，佢竟然嬲到3G都熄埋。身為浪子，我當然唔會死死地氣打俾佢先。
愛郎兼女婿夜訪，阿予羅太均極高興。當晚，我將留俾牧子既子孫，雙倍俾左阿予，正是：「港大雲佩斯作客城市花園梅開二度」，羅太一定係球證韋比，無視雲佩斯對寶貝女粗野蹂躪，反為我既球技暗暗喝彩。深愛我既阿予，則希望呢場球場永不終結，Until we score。
我摟住嬌小既阿予倦極入睡，夜來竟無夢，不知預告甚麼。
次日朝早，我check whatsapp，牧子既last seen係05:00，我一時倒並無放在心上。阿予見到我，就好似蜜蜂見到蜜糖，對我千依百順。日上三竿既時候，我知道我該走了，離別之際，阿予眼睛發紅，就講：「我好唔捨得你，你俾我送你返屋企好唔好？我都好耐無去華富喇。我地去冰室食野丫好唔好？」
陰西神功收服阿予，令佢上癮，無法自拔。佢曾經講過，要見到我，先感到生命既存在，見唔到我既時候，就頓覺生無可戀。我一番戲言，就屌左阿予感情。
我拖住阿予，思念牧子，內心同現實一樣糾結不清，牧子嬌柔，阿予痴心，可惜人生唔係出奇蛋，無法一次過滿足三個願望，我知道終有一日要逼我揀，我知道。
落車。
阿予拖住我，甜蜜地向冰室行去。「等陣，我有驚喜俾你。」阿予話畢，係袋中拎出一條手織淺藍色頸巾，掛係我頸上，眼睛充滿快樂：「我織左好耐架喇，你睇下你幾靚仔！」
雖然條頸巾手工好差，錯晒針，畢竟係一番心意，我心裡無限感激，只好攬住阿予，一野轟落去。
對住女人，除左一野轟落去，我仲識d乜？
奇遇往往係我身上發生。我轟下轟下，感覺一股涼氣，抬頭，只見不遠處，牧子冷冷咁望住我同阿予，眼神充斥忿恨與失望，秋風發微涼，我卻感寒風刺骨。
阿予望住牧子，眼神堅定，用頸巾索住我，將我摟得更緊，向牧子示威，一定知道發生緊咩事。
牧子轉身狂奔，阿予大力捧住我臉龐，一野轟上黎，不自覺流淚，不容我挪移半步。華富邨空氣停頓，阿予瘋狂吻我，遭受刺激，不斷叫我「阿毅」，我無法呼吸，好像返回童年，於華富邨與野狼遭飛仔欺負，不知該不該拔足逃跑，從愛情逃離，再追趕愛情。
(未完待續，就黎完，就黎完。)
