七不思議食女事件Vol. 42
「邦，你細佬嗰日溫溫下書，無啦啦拎起部電話，影我煮飯……」
「影你黎做乜？有乜好影？」
「佢話我煮野好叻，要影黎偷師，第日去做廚房喎。我咪鬧鬼佢個衰仔囉，話你要去廚房，讀完中三就好出黎做喇，做咩要浪費時間讀大學呢？」
「你煮黎煮去都係嗰兩味，咁都好影，真係傻得勻循……」
「跟住你細佬忽然間好正經，迴光返照咁樣講：『阿媽，我唔做律師喇。』，我問佢點解，跟住你細佬就跪係到，係咁打自己，話咩野國際律師行Contract，全部都係佢作出黎，仲話自己係一條讀唔到PCLL既可憐蟲，打自己塊面，打到塊面紅晒呀……陰公。」
我聽到呢到，將食到埋口既隔夜燒肉，成舊跌左落地。阿媽將青春奉獻俾呢個家庭，嫁俾我老豆，以為執到一副靚牌，又俘虜又蛇，點知一隻牌都未出過，就俾人四炒，繼續過窮困既華富日與夜。
到佢生左兩個港大生，諗住今次做十三么，叫夠十三飛。BA大佬浪蕩靠唔住，總靠到LLB細仔開糊，食出每月四皮幾野既國士無雙，豈料大相公，多左隻痴線既Joker，左砌右砌，如意算盤都打唔響。
「唔緊要啦，做唔到律師，都好多出路既我諗……」我好似孩提年代一樣，把玩肥手臂，安慰我老母。
「佢話佢Year2完左嗰陣，已經知道自己成績太差，無可能入到PCLL，但係又唔敢同我講，真係傻仔黎架，唉。」
「阿邦，你好快D搵工喇，你同細佬都畢業，大個仔喇。拿，慳d洗，你細佬出唔到黎做野，頭家就係你揹，我都知好委屈你……」對人地黎講，畢業就代表拎住畢業公仔，跳高一聲「Yeah」，留下青春倩影；對我黎講，畢業只不過係爛尾既牌局，人地出沖，仲要我交埋學費。
我頹然行返出廳，鍵盤達達聲響，見到Larcos仲玩緊逆轉裁判之餘，專心抄寫筆記，要戳破證供之間既矛盾，透過鍵盤，重建未及揚帆，就早早沉沒既法律號。我望住Larcos長期讀書，缺乏運動既佝僂背影，心中無比淒苦，其初入港大，誓做律師既霸氣，受諸父母既半塊包皮，一併被無情既GPA磨蝕得蕩然無存。我暗暗祝禱逆轉裁判長出長有，細佬長醉不用醒。
「喂，你做緊咩？」心情沉重，我打俾牧子，傾訴下家事。
「我係中環，遲d打俾你好唔好？」
「原來我細佬一直都講緊大話。佢無Training Contract如餘，仲做唔成律師。」
「有咩野，一陣先講好唔好？」
「你咁夜仲係中環搞咩野？」佢既漠不關心，令我有些許不滿。
「我契哥介紹我去做私影Model，而家影緊相，乖啦，一陣打俾你好唔好，好多枝炮等緊我呀。」
「屌！又拋頭露面，都話我搵錢囉！佢俾幾多你呀！又契哥！我俾夠兩倍呀好未呀！」
「咩『又』呀！你講好難聽呀！」牧子就收左我線。
我既心，係二戰日軍「神風敢死隊」所用既櫻花型戰機，無起落架，一飛上天，就無法降落，一降落，就玉石俱焚。我飛呀飛，每見空中加油機，就從後進入，打個冷震，搭載加油，直到我見到牧子呢個隻暴風中既孤舟，越飛越低，越飛越慢，係空中盤旋，久久不去。我向來都以為自己係浪子，係無腳既雀仔，係櫻花型戰機，一個女人，竟然令我糾結起黎。
我內心清楚明白，牧子係獨立個體，佢做咩，我管唔到，亦都唔到我理，但係，我竟然去屌柒佢做私影搵快錢，呢樣野，完全係有違我本性，亦都證明我呢部櫻花戰機，一野轟落風雨中既孤舟，形象化咁沉左船。
而家，佢仲要Cut我線，方丈真係好小器，我好嬲，好嬲，好撚嬲。於是，我打俾阿予，約佢聽日又補習，搵更多既錢，塞住牧子同老母把口，用銀紙打佢地塊面，錢丫拿，錢丫拿，恰鳩我。
「又補？今日先補完，篇文我仲未作晒…….」阿予聽到我打俾佢，先係驚訝，後係甜蜜，心諗一定係呢個咸濕仔，終於忍唔住喇。
「係呀，聽日出文，唔駛做呀？文呢？文呢？」幾個鐘唔夠，我由孔子變左地獄老師，如果我有一把三角尺，一定會一野轟落張檯到，入木三分，要勇者先拔得番出黎。
「哦，好啦。」阿予天生賤骨頭，唔屌唔鬆化，把聲恰熟狗頭咁收左線。
次日，我精神疲憊，胯下一鼓怒氣，直剷北角城市花園。良駒蹄下，光陰飛渡，呢個不可思議既故仔，終於臨近煞科日。
(未完待續)＿
