賈子story

七不思議食女事件 Vol. 37

「Mu…ah！」

「乖喇。大眼妹高聳既胸脯，隨住佢扔石既韻律跌蕩，令德仔完全停晒手，如入迷霧。忽然間，一聲槍響，打碎左德仔既春夢。德仔擰轉頭，見佢身前高佬，咽喉中槍，一陣痙攣，就拎住本毛語錄去見馬克思。

「天真既德仔，一直以為葡兵最多都係衰咸濕，摸下閏女屎忽，唔會泯滅人性，射殺平民。點知，當年既葡兵，大多數係係非洲打完仗，殺人多過德仔打飛機。德仔瞇起近視眼，見唔到有人，淨係見到一枝枝西洋槍管。」

「葡國佬做咩學埋共產黨D野？」

「究竟係葡國佬學共產黨，定係調返轉，我真係唔明白。德仔企係到，拎住本毛語錄，兩隻腳好似打左樁咁，一時郁唔到。第二聲槍響，德仔褲檔一濕，彷似被蚊咬左一啖，然後手心一熱，轉眼一望，原來係身邊既大眼妹，掉低本毛語錄，拖住自己隻手，好似『阿甘正傳』入面既湯漢斯咁，轉身就跑。」

「Run Forrest？浪漫得黎，又幾搞笑丫，你唔好同我講，德仔跑跑下入左大學隊，跟住去打越戰呀？」

「睇故唔好駁故，聽我講埋先。大眼妹拖住德仔係咁跑，係咁跑，當時槍林彈雨，水炮步槍裝甲車，好似打仗咁。佢地兩個一直跑，跑到去板樟堂既某鋪頭門口，同中國人老闆講：『西洋鬼開槍殺人呀，可唔可以入黎避一陣呀？』

「點知，個老闆驚驚青青，大聲咁講：『收左鋪喇！唔招呼呀！』，德仔同個女仔又跪又求，個老闆先肯開閘，俾佢地坐係樓梯避風頭。

「咁衰既個老闆？大家都係中國人，包容下啦。」

「老闆雖然流中國人既血，但係受葡式教育，主張個人主義，思想前衛，你同佢講包容，你識條春咩。」

「之後又點呀？」

「德仔當年十七歲，第一次見到死人，提早體會到鏡花水月，人間五十年，不過滄海一粟。德仔坐係樓梯默哀，好想喊，但係唔知點解，眼淚掛係眼尾，久不掉落。忽然間，大眼妹話：『你……可唔可以放開手？』，原來，德仔全程都同大眼妹十指緊扣；到底德仔有心定係無意，要返番去一九六六年先知。」

「大眼妹隻眼大D，定係我隻眼大D？」

「幾十年喇，大眼妹都變阿婆啦。德仔放開手之後，突然聽到大眼妹格格嬌笑：『你嚇到瀨尿呀？』，德仔一望，見到佢條黑色布褲右邊褲管，濕左一大片。起初，德仔覺得好奇怪，明明自己仲係好急尿，心念一轉，今次仆街喇，摸下右邊大脾，驚覺自己少左忽肉。

「大眼妹好驚，即刻搵老闆求救。老闆一知道左德仔流血，就話：『好走喇，唔好死係我呢到呀！整污糟晒D地方！去鏡湖去山頂啦！』。」

「咩係鏡湖同山頂？個老闆真係好仆街呀！」

「即係澳門既兩間醫院。大眼妹一咬牙，無求過個老闆，望一望出面，係無咁多警察既時候，拖住德仔，拐下撞下，經大三巴牌坊賣手信嗰條街，諗住去鏡湖。豈知，緊張既時刻又黎喇！」

「講你就講啦，唔好講下停下好嘛？」

「佢地兩個經過大三巴腳既時候，有成班葡兵操緊落黎！原來當時大炮台係葡兵營，一知噴水池出事，立時增兵平亂。德仔同大眼妹係被葡兵發覺之前，即刻兜路行，經過個教堂，就去到鏡湖。鏡湖嗰日好似旺角咁多人呀！」

「如果我係佢，我都會陪你一齊走……」

「送到德仔去鏡湖之後，大眼妹話：『我要返屋企喇，我阿媽一定好擔心我。』跟手，德仔係大眼妹耳邊，低聲講左自己個名。

「德仔捉住大眼妹隻手，就問：『我地會唔會再見？』

「大眼妹話：『我屋企好嚴架，我係偷走出黎，唔得喇，好夜喇，我真係要走喇。有緣既話，下星期日，單眼佬前面見啦。』未趕及問咩係『單眼佬』，大眼妹就好似殖民地美好歲月一樣，消失得無影無蹤。」

「講你就講，唔好加咁多修辭好唔好……」

「呢排寫開小說，職業病。起初頭十幾年，德仔仲記得呢個女仔既樣。但係日子一耐，德仔淨係記得，一九六六年十二月三號，下午五點鐘，有一個大眼妹拖住佢，由噴水池跑到去鏡湖醫院，救左佢一命。可惜既係，不論德仔幾努力去回憶，永恆既始終係時間，德仔記唔到呢個女仔既樣。喂，做咩打人？」

「你咁樣同劇透我有咩分別？劇透死全家呀。仲有，我岩岩先講過，如果呢個故事係悲劇結尾，你唔駛再同我講埋落去咩？」

「點解你一定要Happy ending？我真係望唔透……好啦，唔理你，我繼續講。

「好彩，步槍子彈剛好擦過德仔胯下。德仔只受皮外之傷，如果佢有七寸巨龍，你既命運將會改寫。」

「唔通……？」

「係呀，繼續估啦。德仔出院之後，諗左好耐單眼佬究竟係咩野，佢望住受傷既大脾內側，玩弄佢既傷口，一時諗唔透。的確，就算係有得上網既今時今日，你係Google打『獨眼』，出到黎個答案竟然係『夏侯惇』同埋『伊達政宗』，試問，只得十七歲既德仔，讀書唔多，入世未深，又點知單眼佬係邊個呢？」

「日本戰國同三國人物？即係想點呀？」

「翌日，德仔終於忍唔住，向德仔老豆請教：『喂，老豆，知唔知邊個係單眼佬？』，德仔老豆『屌』左一聲，大聲轟落去：『咁你都唔知，點做澳門人呀？你拎你銀包D銀紙出黎，就有答案喇！』」

「德仔一面狐疑，拎起銀包，係張十蚊紙入面，見到傳說中既單眼佬。德仔老豆一路食住橙，一路就話：『單眼佬，咪葡國鬼李白，賈…賈咩呢？呀！叫賈梅士呀，寫詩好叻架嘛！白鴿巢仲有個賈梅士像呀！』德仔聽完，開心到攬住左德仔老豆，呢次亦都係佢地兩父子唯一一次擁抱。」

「星期日，德仔下午十二點就著住單吊西，係賈梅士像下面等。佢等左一個下晝，點知大眼妹都係無黎。」

「做咩德仔咁蠢，唔問大眼妹拎電話？」

「你估係而家咩？以前澳門申請部電話好貴架。第二個星期日，大眼妹都係無黎。第三個星期日，德仔照樣去等，終於等到大眼妹。」

「大眼妹一見到德仔，就好高興咁話：『唔好意思呀，我阿媽知道我嗰日暴動出左去，關左我係屋企好耐。我係讀聖羅撒架，你呢？』德仔心裡說不出既高興，就話：『我無讀書好耐喇，不如我地去永樂睇戲，去劉德記食個辣魚包丫？』」

「之後，德仔就帶左大眼妹去睇戲，食左個佢一世都記得既辣魚包。

「德仔同大眼妹拍左半年拖，至於有無啪啪啪，我就真係唔知道。好可惜既係，大眼妹好快就要去美國讀書，而德仔亦都要過香港搵食，佢地咁樣，就分開左。

「起初，大眼妹仲有密密寫信俾德仔，點知時間一耐，大眼妹寄既信，字數越黎越少，次數越黎越疏。德仔同大眼妹，隔左個越戰同文革既太平洋。佢地既距離，就好似尼克遜同埋毛澤東咁遠，一次乒乓外交既邂逅，啪啪啪啪，就無疾而終。」

「無喇？唉，好慘。點解你知道澳門咁多野？邊個係德仔？」

「德仔，就係我老豆，大眼妹應該唔係我阿媽。」
「下？你又知既？佢同你講架？咁樣岩岩係油麻地既《大約在冬季》呢？」

「一年班開學日，我阿媽同我老豆鬧交，話要扔晒個賤女人D信同埋老豆d日記。呢次係我第一次見雙親鬧交，我永遠都記得。」

「嗰陣我一年級，冬季來既男生特別聰明，我趁住我老母鬧我老豆，早慧咁偷偷睇晒大眼妹D信同埋老豆d日記。日記到講，老豆為左紀念大眼妹，將我同細佬個葡文名改左做『Senado』同埋『Largo』，你知唔知點解呀？」

「我點知呀？開估啦。」

「議事亭前地，即係噴水池，係大眼妹同老豆相遇既地方，葡文係『Largo do Senado』：Largo係解Square，即係廣場；而Senado解Senate，即係議事既地方……你話我阿媽係咪嬲嬲豬喇。大個左之後，我同細佬都因為咁，改左英文名，費事我媽唔開心

「嗰日之前，我老豆日日哼齊秦既『大約在冬季』，呢隻歌，亦都係我人生第一隻識唱既歌。

「沒有你的日子裡 我會更加珍惜自己
沒有我的歲月裡 你要保重你自己

你問我何時歸故里 我也輕聲地問自己
不是在此時 不知在何時 我想大約會是在冬季…」

「識你之前，我識左個黎exchange既韓國妹，同佢發生左段朝露般既感情，體會到離別既黯然銷魂。之前我唔明德仔點解咁仲掛住大眼妹，而家我就明喇。不過，我會好似德仔咁，將大眼妹擺係床下低，然後專一愛惜佢老婆，我老母。」

「仲有呀，大眼妹話，葡國習俗，只要帶意中人去賈梅士像前面，鍚佢額頭一啖，就會得到《葡國魂》既祝福，永遠咁係埋一齊。我Google過呢段說話，雖然完全搵唔到根據，但係，我真係好想帶你黎，講個蕩氣迥腸既故仔你聽，睇下大眼妹有無鳩up，同埋等你一世都記得我。」

「大文豪，都唔知你邊句真，邊句假，兜咁大個圈，就係為左氹我？賈梅士翻生都唔夠你黎喇！你就叫賈子啦！」

白鴿巢秋風悉悉作響，短髮牧子於賈梅士像前，於最好的黃昏，提高腳尖，向賈子額頭，送上最真誠的吻，將澳葡年代的傷離別，俱俱相忘於江湖之中。
[未完待續]

[ 本帖最後由 賈子story 於 2014-2-8 01:04 AM 編輯 ]

s987358

完了?

賈子story

引用:

原帖由 s987358 於 2014-2-8 12:56 AM 發表
完了?

未完

luoldeng

嗯，希望呀牧子係你最後一個

[ 本帖最後由 luoldeng 於 2014-2-8 01:13 AM 編輯 ]

sammul_2310

37依個故事離晒題咼師兄 （個人意見）

主音仔

支持繼續

AlpharddrahplA

storm never ends.....

henryhk

呢兩篇伏筆為主？

lovelife1234

support u CHing
keep writing.

賈子story

七不思議食女事件 Vol. 38

身為食女無數既浪子，自從玄鐵重劍初出鞘始，我從來唔駛去為女人做D咩野，討佢地歡喜。今時今日，男人自貶身價，為「女神」俯首當兵，我更深痛惡絕。唯一既例外，大概係Year2嗰年，韓妹允雅要返泡菜國，我一時動情，親手為佢做左個相架，一次咁多，絕無下次。

舊愛蜜色女曾經批評過我既懶惰，話我從來唔為佢付出。其實，我只問唔係懶惰既人，否則都不能以極度規律既生活，鍛鍊成六舊腹肌。平時，我好憎人批評我懶惰，干涉我既生活：當三姑六婆將做緊ibank、AO既仔捧出黎，再指桑罵槐，將我不明既前路，歸咎於我既飽食終日、無所用心，我都會黑面，然後暗暗講句「你識條春咩！」，榕樹樹影斑駁，我拖住牧子，回憶蜜色女既責難，我可以挺起胸膛咁講，我唔係懶，只不過係愛佢唔夠深。

而家我兜左咁大個圈，從油麻地帶左牧子去白鴿巢，從2013年帶左佢返1966年，從淪為匪區既香港，帶佢返去西洋鬼話事既澳門，將上代人既羈絆，帶俾牧子，氹到佢好似剛出世既鴨仔，勉力張開眼，只見到我呢隻偶爾降落地既雀仔，就跟實我唔走。牧子的確係好女仔，令我不由得低飛，為佢做咁多事，簡直不可思議，六四無死人，袁木最誠實，Marvin好專一。

牧子挽住我手，將德仔同大眼妹既逃亡路線，好似行孫中山事蹟徑一樣，行左一次。

且把閑話休題，只說正話。我地行到去手信街斜路，忽見一極熟悉既女仔，向我走過黎。

「Hey! Marvin how are you?」來者一雙鳳眼，熱褲拖鞋，A&F女神頭，露出半條幼腰，不是別人，正是我大學第一個女友組媽C。佢既A&F香水味，令我彷如置身中環畢打街，使組媽C同蜜色女既淫亂畫面，又湧上心頭。

組媽C無見一排，風騷依然，一見到我，立時推開身邊男伴，張開雙手，C Cup突出，一野就想攬埋黎，渾然忘記我既寡情薄倖。受西化教育既我，他鄉遇故知，正欲張組媽C一抱入懷，只見組媽C忽然退後半步，彷彿見到洪水猛獸，講左聲「Oh, Marvin, we will talk later!」之後，與其男伴落荒而逃，忙忙似喪家之犬，急急如漏網之魚。

我回頭，只見牧子既眼神，比寒冰掌還要冷，眼神透射出寒冰真氣，又推甩兩件。

「條女邊個黎架？講英文既？做咩唔講廣東話？」牧子三個問題，連珠爆發，妒意好比剛出爐既牛肉乾。

「我入大學既組媽，之前同佢拍過拖。」

「講晒英文咁，一定係有錢女啦。」

「係呀，佢中學讀DGS，住禮頓山，畢左業都唔駛做，佢條仔好似仲送左部GTR俾佢做生日禮物，聽講佢下年諗住去英國讀Master……」我一路講，一路將組媽C放上網既身家如數家珍，向牧子說明離開Marvin既下場，比離開阿仙奴，更加幸福美滿。

「佢識投胎姐，有咩咁叻。如果我出身有佢咁好，一定叻過佢。」牧子堅定既眼神，無比倔強。

我一來唔想牧子再問我同組媽C既過去，二來不欲佢想起謀稻粱、覓恩客既回憶，我隨手拎起身邊既試食牛肉乾，咬係口裡，一野塞落去牧子個口，再咬左佢蘋果肌一啖，弄得牧子滿臉油，夕陽之下，牧子嬌嗔：「你整到我成臉都係油，會搞到我生暗瘡架！」，卻越挨越埋，將頭埋藏左我既胸肌裡。

當晚，我同牧子搵左間過左夜。澳門酒店房咁貴，唔少得既當然係啪啪啪，溫馨甜蜜，不在話下。呢個劫後餘生既澳門之旅，雖然只有兩日一夜，但時序橫跨幾十年，盛載住兩父子既回憶，幸運既係牧子，不幸既係大眼妹。如果可以選擇，我會係呢到完左個故事佢，將記憶結冰，令我同牧子永遠幸福快樂咁生活去。

但世事豈能盡如人意，鍵盤裡既陳納邦越立體，現實世界裡既我面對超載既回憶、人事既羈絆，人就越脆弱，情感比玻璃更易碎，但我必須將呢個故事講落去，因為，呢個係《七不思議食女事件》，故事既開頭，我已經開宗明義講左：「利申：BA Final Year，大學就讀左三年，女就食左七件」，聰明的你，數數手指，必知後事如何，我亦不欲立時拆穿。

旅行就像呢個世界所有既關係，總有終結既一日。悲世界如此狹小又逃回。一返到香港，面對畢業既困局，痴線既細佬，家族既擔子放係我肩上，彷似有千斤重。拍拖甜蜜事，話絮休題。萬惡既金錢，殘酷既現實，令到我地破鏡重圓既關係，又再激起千尺浪。

「其實，你可唔可以唔好同你契哥一齊住？」常言道，「認真你就輸了」，我對牧子可能動左真心，有一日，心頭火起，竟然叫佢唔好住係契哥到。

身為浪子同受西化教育，當年對到女朋友為兩餐做援交一笑置之，今時今日，竟然接受唔到佢同契哥共處一室，我越黎越拖泥帶水，完全唔似一個浪子。

「唔住呢到，可以住邊呀？唔通返屋企對住老豆，俾佢打咩？」牧子極有道理，我一時都唔夠講。

「你同我一齊，打多兩份工，我地搵間劏房住。」覆水難收，呢句說話，好似小石投入湖中，激起既水花，竟然比人還要高。

我從來都以為自己踢緊波，係華富邨莫耶斯，換出左既球員唔可以再換入；但畢竟呢個係我美麗既誤會，原來我一路都打緊籃球，換走左既囡囡，會因為現實既巨輪，係場邊伺機換入，為荒謬既故事，更添上幾分離奇色彩。
(未完待續)