七不思議食女事件 Vol. 34
試紙轉呀轉，思緒光怪陸離。
試紙轉呀轉。令我憶起中學青蔥歲月，與隔離班女同學偷嘗禁果：我思想比晚清留美幼童更開放，係心口有個淫字，後腦剃去長辮既小清兵。
當年，每逢初戀女友既經期遲遲不來，我總會陪住佢，係後樓梯驗孕。年少無知，我曾經諗過，一旦有左bb，毀左人地大好前途，就唯有係華富邨最高層，一躍而下。
究竟呢個暗藏既自殘傾向，究竟同Larcos自割包皮有無關係？思緒行雲流水，任意所至，揮舞起既獨孤九劍，社工姐姐頓變左風清揚。爸爸！爸爸！唔好唔要我！
試紙轉呀轉。大學數載，為謀稻粱，我花左大量時間去誤人子弟。女溝越多，花費日大，補習愈多，天道循環。每每補完習，經過馬會，我總會被吸左入去，然後像扶乩一樣，二郎神齊天大聖關二哥上身，係六合彩飛上鳩畫，去買未知既希望。
金銀雙色既十蚊銀，唔係用黎買六合彩，而係買對社會既無聲吶喊，同埋攪珠之前既美好幻想：每一次，我都會天真咁以為，我會一注獨吞九千萬，結束頹唐既生活，令我無須為前途而擔憂。每次上網查攪珠結果，我都好似迎接係馬槽入面，迎接耶穌降生既牧羊人一樣咁欣喜，莊！莊！莊！莊！莊！買定離手！
買六合彩、我細佬、驗孕、驗性病，隨住窗外既雨水，淅瀝淅瀝咁拍打我既腦門，直到我記憶既盡頭 ---- 就係華富邨既下隔床，只有兩歲幾既我，瞪開雙眼，只見父母對著我笑意盎然。
鏡頭再轉，約莫五、六歲既我，坐左係隔離屋姐姐既黑絲大脾。望住姐姐，我眼神有異樣既興奮：佢既相貌，如今思之，面目模糊，但係我永遠記得，我摸住佢既黑絲大脾，就已經立誓，要好似宮本武藏一樣，他日長大，要用我既絕世好劍遊歷天下，做個屌感情既劍客。點知，故事既結尾，武藏酒醉，誤食毒雞，中道崩殂，貽笑大方。
山中方七日，世上已千年。思緒碰撞之際，試紙上出現了兩條直線。
「拿，結果就出左架喇，你咩事都無，但係以後呢，就唔好再濫交喇。」社工姐姐克盡本份，對我淳淳善誘。
「唔該你，我會架喇！」
我有如重獲新生，立刻離開左間房，去搵係出面等緊我既牧子。
「點呀？有無事呀？」
「落到樓下先講。」我拉住牧子，離開左關懷愛滋。
「社工話我中左招。」油麻地街上，我心情興奮，諗住搞下氣氛，所以講左個大話。
「下？點解會咁架？有無得醫呀？」牧子一聽，手都震埋，一野就攬住左我。佢雙手緊緊抓緊我既後肩，將個頭埋左落我膊頭。
「喂，唔好喊住，嚇下你咋，我咩事都無。」
牧子一聽，一拳怒轟落我個肚。好彩我腹肌護體，淨係受左皮肉之傷。
「好好玩呀？又呃我？呢個第幾次呀？」牧子推開我，擰轉身就走。佢用手輕抹眼角，令我想起上次我同佢分手，心中歉疚無限。
我追上去，係油麻地街角，拉住牧子，同佢糾纏起上黎。
「不如我地由頭黎過？」身為浪子，我真係唔能夠相信，呢句對白，竟然會係我講出口。
以往既我，分左手就係分左手，入土既感情，只能憑弔，永遠存活在記憶之中。我不會揭開棺木，看看屌死左既感情，手手腳腳仲有邊一忽未腐爛，或者痴心妄想，感情會化作倩女幽魂既小倩，黎同我呢個港大寧采臣重修舊好。
今次命懸一線，牧子依然對我關懷備至，我就知道，我應該要聽媽媽的話，好好珍惜呢個女仔。最不可思議既係，我竟然有衝動同牧子結婚。我好膽怯，我驚再遇唔到一個，好似牧子咁愛我既女仔。
「陳納邦，我唔知你邊句真，邊句假，你放過我，唔好再搞我啦好唔好呀？」
「呢個世界唔係圍住你轉架！咩野由頭黎過呀？ 有D野無得返轉頭架！」
「你俾我返企呀，唔好掂我呀！」
牧子越講，就越歇斯底里。唔知點解，呢排我遇到既女人，都係情緒咁唔穩定，牧子如是、阿予如是，甚至連倫敦酒店房既楊太，亦都如是。
「喂，你聽我講……」我大喝一聲，然後用我強壯既臂彎，將牧子一抱入懷。
為左氹番牧子，我又講左一番蕩然迥腸既大話。
「呢個月入面，我寫緊一本小說。個女主角既名叫阿杼，即係你個名拼埋一齊。我每日係鍵盤打字，個腦就諗起你。我越寫，就越覺得同書中既女仔談緊戀愛。
「本身既構思，係阿邦要拋棄阿杼，但係我無咁寫，因為我唔捨得。現實入面，我已經錯左一次，我唔想係我建構既世界，都再錯多一次。
「我就黎畢業，對前途無頭緒，唯有係鍵盤之前先搵到救贖，我一直都以為，我鐘意既係阿杼，係寫小說，係蕩氣迥腸，上下求索既故事。但係我今日先知，我擺脫唔到你。我唔想再寫喇，不如我地由頭黎過？」之後，我深深咁吸左一口氣。
呢個「不如我地由頭黎過」，比之前嗰個更有力，更沉重。牧子淨係識攬住我，只係不斷點頭，久久不能言語。我攬住牧子，短髮幽香，隨雨而來，令我諗起小說既劇情，同埋給予我靈感寫小說既阿予。
呢本小說，究竟係為自己、為牧子、定係為阿予而寫，我一時一樣，真係全然不知。
「好似係我擺脫唔到你……」牧子破涕為笑，成為左世上最幸福既女人。
我拖住牧子，行下行下，係油麻地街角，經過一間快要執笠既VCD鋪。VCD鋪入面，播緊齊秦既「大約在冬季」，我聽得出神，牧子望住我，大惑不解。
然後，我拖住牧子去到櫃員機，提光戶口所有既錢，同佢講：「我想你同我去一個地方。」
「同你一齊，去邊都得，你開心就得喇。」呢個似曾相識既對白，使我不禁諗起阿予。
油麻地天空放晴，我拖住牧子，袋住漲卜卜既銀包，又回到最初既起點。
(未完待續)
(按：早起的鳥兒有文睇。新年極忙，未能按時出文，敬希見諒，另再祝新年快樂。)
