七不思議食女事件 Vol. 31
「點呀，阿媽打黎都唔認得呀？其他女人叫你Marvin就認得，阿媽叫你Marvin就唔認得？」半夜三更，打黎既，竟然係我老母。
飲大兩杯，兼見到阿予既年輕胴體，令我連老母都唔認得。
「我同Friend飲緊酒，一時唔知邊個呀。咁夜打黎做咩？」我無Save開阿媽電話，因為佢成日話上台好貴，用電話咭會平d，所以佢每兩三個月就轉一次電話。雖然成日轉電話好唔方便，但係我媽將畢生奉獻左俾屋企，佢寧願死慳死抵，將最好既野留俾兩個仔，連影響到佢日常社交都在所不計。
「你細佬而家訓左係瑪麗呀！唔好講咁多，即刻過黎先講！」
「喂，我而家忙緊，有咩傷風感冒，番屋企先講啦。」我思考左半秒，估計Larcos唔係盲腸炎，就係小腸氣，應該死唔去，最多都係我阿媽大驚小怪。權衡輕重，砌左阿予先係上算。
「你把口係咪咁賤呀！佢而家流晒血，要通宵做手術，你即刻同我過黎呀！」阿媽好激動，令我有錯覺，以為佢下一句就要講「>><<1」。
為左去除「自己老母屌自己老母」呢個悖論，我唯有像死狗一樣，應承左我阿媽，仆去瑪麗醫院。
春宵苦短，佳人如夢，可惜我唔係古時皇帝，不能貪戀美色，從不早朝；經此一役，我更加肯定，人生只不過係煙波江上既一葉孤舟：我以為俾左錢時鐘酒店，就可以屌盡每一分每一秒，點知，事情發展到呢個地步，真係被阿予講中，我地只不過係搵個靜d既地方傾下計。
如今母命難違，我接過慈禧太后聖旨，性慾盡去，情愫漸生，唯有幫阿予著番衫，蓋好被，將佢長長既眼睫毛，掃左一次又一次。阿予睡得香甜，咀角微微向上揚， 定必發緊一個幸福既夢。
我見佢半開半合既咀唇，就想一野轟落去，但係我無咁做，因為咁樣會嘈醒佢，我真係唔想佢知道，一米八零、港大畢業、有賈寶玉七分俊俏既陳納邦大文豪，居然係強姦小龍女既尹志平。我好自私，唔想天真既阿予知道呢個真相，係呢個星光燦爛既晚夜，廉價既時鐘酒店入面，一切都變得美好，因為係阿予心中，我永遠係腳踏七色彩雲既行者孫悟空，拯救自己於情傷之中。阿予係好女仔，佢估中左個開頭，醜陋既結局，佢唔需要知道。
我將阿予既短髮掃呀掃，將佢耳鬢既頭髮一次又一次撥去耳背，唔知點解，又諗番起牧子。我一路掃佢既頭髮，記憶徘徊於灣仔百佳、Raymond阿爺屋企、港大荷花池、華富邨下格床、御龍山同埋火炭划艇會；我記性太好，要記得既我永遠都會記得。我掃下掃下，猛然醒覺，好似阿予咁漂亮既女人，應該有一個童話故事既結尾，等高大靚仔專一既王子，駕住南瓜車黎迎娶佢，而家佢跟住我，只會帶黎不幸。所以，天快亮既時候，我知道我該走了，於是，我鍚左阿予一啖，就消失於空氣之中。
我一去到瑪麗醫院，就見到我阿媽坐左係醫院大堂。阿媽對眼肚，就黎大過對眼，突然蒼老左好多。
「細佬咩事入醫院？」我講完呢句，阿媽就攬住左我，想喊，但係又無眼淚，我先知道事態嚴重。
「Larcos尋日半夜三更，無啦啦係房大叫，我一入去佢間房，就見到佢右渣住把較剪，左手成手都血，撞鬼，你知唔知佢做咩呀？」
「你唔講，我點知佢做咩呀？」
「你細佬呀，話自己包皮太長，要幫自己割包皮，話咩要割左佢……」
「下？屌！割咩呀？」
「……割左佢法律之棒入面，最藏污納垢既地方。唉，都係我唔好，逼個仔讀書，而家讀到痴左線呀你細佬！好彩無記者黎咋，我幾驚呀，唉…」我阿媽講完之後，又攬住我，終於，我廿幾歲人，第一次見我老母流淚。
「醫生話佢而家情緒正常返，你一陣去睇佢，唔好鬧佢呀，知唔知呀？你幾唔鐘意佢都好，佢始終都係你細佬。仲有呀，唔好話俾你老豆知呀，我唔想佢臨老爆血管呀。」
我捉住阿媽既肥手臂，一時語塞。呢件咁不可思議既事，仲誇張過小說情節，所以話，奇遇往往係發生係我身上。屋企既事，往往令我最困擾，由細到大，我細佬做過幾多稀奇古怪既事，我媽統統唔俾我講俾我老豆知，廢事我老豆責怪佢，我夾係中間，鬧又唔係，屌又唔係，有呢個細佬，真係家門不幸，佢LLB未畢業，已經拎左國際律師行Training Contract，點解仲要咁大壓力呢？
好唔容易先黎到中午探病時間，我一入病房，就見到Larcos，望住醫院既天花板，係到發呆。
「點解你要咁做？你係咪痴左線？」一見到佢個撚樣，諗起我傷心既老母，就忍唔住屌柒佢，一野轟落去。
「無，我見把較剪生晒鏽，想睇下佢仲利唔利姐。」Larcos語氣極平靜，相較之下，痴左線既，睇黎係我。
「唉，你好好抖下，讀唔讀到無所謂，唔好俾咁大壓力自己。」我見佢痴得咁勻循，都廢事再落井下石。
「創世紀話，上帝吩咐過，男子出世之後第八日，要行割禮，代表『永久之契約』，呢個係我讀Law and Religion學既，你垃圾BA仔，識條春咩。唉，哥，你一陣番華富，幫我拎本Evidence過黎，我要溫Final喇。
「喂，仲有借部iphone過黎，而家無書，我就影舊屎upload上網…」Larcos一時好正常，一時九唔搭八，我望住雙眼不斷流淚既阿媽，真係唔知點算好。
「好啦，你訓下，我而家番去拎本Evidence俾你。」我唔再忍心睇落去，拍拍我媽肩膀，不回頭，轉身走。
我走到去瑪麗門口，陽光明媚中午，見到花圃既菊花，憶起白先勇既《我們看菊花去》，又頓時諗起牧子，苦命既老母，痴線既細佬，心裡悽苦，不可言狀，眼淚掉下了一地。
忽然，我後腦一熱，冷不提防，竟然俾人一野打左落黎……
(未完待續)
