咁多位唔好意思， 因為公司要做年結所以比較忙， 咁耐先出文Sorry！ Sorry！
再沖身後當然係返上床準備正式交戰， 詳情就唔多講.......因為開始有啲壓力.......
聰明嘅你哋應該知道點解！
講返當日我在後樓梯繼續食煙諗緊點應付之際， W send咗個whatsapp比我， 內容如下: 新娘伴娘已經到咗！ 有驚喜！
同W一齊之前介紹過F比佢識， 幾年前由於公司裁員我呢啲比上不足比下有餘嘅中層就死得最快， 甚麼跨國企業上市公司， 要你走只要人事部出一封信上面打上 <基於本集團的商業决定>就話咁易同你講Bye Bye！ 那位直屬上司無論你以前點幫得手， 到咗嗰陣就算變成面對面行過都睇你唔到， 因為你已經再無價值！
雖然裁員話就話補十幾萬遣散費， 但咪又係我自己啲錢， 都唔明邊個茂利諗到可以用MPF對沖咁絕！
當時F話咁咪當休息吓， 休息就更係要去旅行呢啲就常識啦！ 點知去完個日本再去韓國嗰十幾萬已經差唔多用曬！
然後入咗以前間公司一做就幾年， 開頭都係同F一齊， 所以W同S都應該認得佢， 因為薪水差一大截， 馬死落地行之下唯有搬返屋企同阿爸阿媽一齊住， 就係咁我同F的關係開始疏遠起來， 直至有一日晏晝當我手機响起F獨有的來電鈴聲， 接聽電話後我喂咗好多聲F都無回覆， 可能係接收有問題.......當正想收線打返去比F時.........竟然聽到有一男一女正在對話..........(註: 大家要知道當時大多數啲電話仲係用緊有按掣嘅款式， 好有機會係放在手袋時按錯Redail 或者快速撥號掣)
對話内容就唔係咁重要， 反而重要嘅係當時我收咗線後隔咗幾個鐘夜晚打電話比F， 係咁咦問吓佢今日去咗邊..........點知佢個答案竟然係..............講大話！
然後過多兩三個月， 那晚是我爸爸的生日飯， 上兩年都無話買啲乜嘢特別貴嘅禮物，嗰年F買咗樣幾貴嘅禮物送比阿爸， 我記得當晚食飯時F的手機响得比平時多， 回答對方又快又細聲..........
之後連飯都未食完就話有事要走先， 當我送F上的士之後， 過咗唔夠兩分鐘電話响起F的鈴聲............電話中只聽F的透氣聲.......F只係短短的一秒講岀兩個字........分手..........！
就是一聲分手
就在短短的一秒
以往的愛沒挽留
呆呆地退後 誰關心我心傷透..........
[
本帖最後由 aveva 於 2014-5-25 12:17 PM 編輯 ]
