可惜
我有個男仔好朋友 (簡稱A), 以前我們差不多每天都通電話, 除了我去旅行去左20幾日之外, 我地未試過咁耐唔聯絡, 上個月佢屋企有事我幫不上忙, 之後我們就再無聯絡.
我想如果我們就這樣沒有朋友做,確實有點可惜 !
事件發生係1個月前.........
8月30日星期六
好朋友A來電話佢需要錢, A媽媽要做心臟通血管手術, 通一條血管要$21,000 (兩個月前醫生話要$27,000一條), 醫生話現在要通6條,佢需要十二萬, 問我可唔可以幫佢問銀行借錢, 佢喊住要求我幫佢. 我問佢社會服理處申請成點 (上個月話要做手術既時候有朋友已經教A向社會服理處申請), 佢話上星期一覆左佢唔批, 社會服理處只係話因為收入問題, A話佢想上來我家同我傾, 我問佢係邊, 佢話剛剛係澳門回來輸左萬幾蚊, 我當時嬲爆, 你媽媽有病需要咁多錢, 你仲走去睹錢, 你媽媽需要錢唔係今時今日先知道, 係好幾個月前已知, 佢話想博一博睇下可唔可以博到12萬回來.
8月31日星期日
我打電話俾佢, 話不如試下幾個方法啦 1)問下醫生可唔可以暫時通住2-3 條血管先, 咁就唔洗咁急一次過搵12萬出黎 2)問下區議員幫唔幫到, 有無其他辦法, 唔通無錢醫生就睇住d人死? 3) 如果再唔係, 睇下可唔可以問幾個朋友分別借少少. 佢問我有幾多錢, 我話我得4萬蚊係for寶寶1月出世用.
到左夜晚我自己都好緊張呢件事, 所以訓覺之前我打比佢叫佢上綱搵定d區議員電話, 可以明早一番到公司就打比佢地, 我都唔知佢當時有無聽我講野, 佢只係第一時間叫我過住4萬蚊比佢, 叫我過錢比佢先, 佢話寶寶4個月後出世前會比番哂我, 佢話一個月還番一萬蚊比我, 我話 "咩呀, 你都未問醫生? 如果醫生話暫時可以通住2條咁你唔洗問我借啦", 佢話過左比佢先, 等佢早d準備喎, 叫我聽日過比佢, 我堅持話叫佢問下醫生先. 我問A你同家姐加埋有幾多錢, 佢話佢有2萬, 唔知家姐有幾多, 我話你唔問你家姐既? 佢話佢唔會問, 亦唔打算問, 佢話佢唔想佢家姐再煩咁多野. 講真, 你家姐都唔會要你一個人出哂錢啦!
你自己無好好想下就叫我過錢會唔會有d過份?
我果晚好嬲, 嬲到訓唔著, 3點幾仲諗緊件事.
9月1日星期一
早上我一番到公司自己上網搵左佢住果區既議員, 我打左好多個電話, 聯絡左好多個議員同佢地d助手, 講低左個case 比佢地知, 問下佢地仲有咩辦法, 我當時真係好似自己人咁好落力咁問, 中途10點半, 我打比佢, 因為d議員話幫我地跟進下, 想問下佢住邊座, 因為成個村咁大, 要搵番果座既議員辦事處和想問佢社會服理處果份既申請編號, 佢唔肯講仲 話 "得啦, 我自己會問架喇" 我又問佢搵左醫生未, 問左可唔可以通住兩三條先, 佢話佢未問, 佢話佢家姐下午先去醫院, 我問 醫生叫咩名, 我試下打去醫院問醫生今日幾點番醫院, 佢話佢唔知醫生叫咩名, (你同你亞媽睇咁多次醫生都唔知個醫生叫咩名???) 我真係好嬲!!!
