房策失敗租金貴 劏房教壞內地生
人人都話香港租金貴，到底有幾貴呢？國際發展及人力資源機構不久前公布二○一一年度居住報告，以「無家具三房住宅」為標準，比較全世界一百三十幾個城市嘅租金水平，結果香港以平均月租大約九萬二千港元高踞全球榜首，大幅拋離第二位嘅東京以及第三位嘅莫斯科。
喂，踢波世界第一就話光宗耀祖啫，租金冠絕全球冇乜值得高興喎。租金一貴，問題就嚟，最終可能奪魄勾魂攞你命。
未同大家解釋點解租金昂貴會搞出人命之前，功夫茶同大家介紹一則奇聞。內地學生來港讀書，原來求學不止求分數，甚至係求財若渴。本報記者直擊報道，四名來港修讀碩士學位嘅內地生，將租住嘅二百幾平方呎單位騰出狹窄空間放置碌架床，一次過租畀四名旅客過夜，收費一百五十至二百元人民幣。喪搞旅客集中營嘅內地生，連大廈公用嘅天台都唔放過，一於私有化對外宣稱可以搭帳篷容許旅客入住。咁嘅做法好明顯係違規，法律界人士指出，呢幾個內地生非法經營業務不但違反租約，更加違反逗留條件，入境處可以取消佢哋嘅學生簽證。
好嘞，功夫茶問問大家，點解內地生咁有諗頭，識得分租碌架床謀財？最大機會係受到劏房文化啟發，靈感來源亦有可能係籠屋。你知啦，港式貧民窟遍地開花，尤其係舊區唐樓，豆腐膶單位可以劏出幾個等同於棺材大細嘅空間，咁就可以出租牟利㗎喇。既然劏房文化咁盛行，內地生靈機一觸有樣學樣一啲都唔出奇。
講到呢度，係時候解釋點解租金昂貴會搞出人命。其實好簡單啫，租金貴就劏房多，劏房多就易火燭，結果就出現土瓜灣馬頭圍道奪命大火，花園街排檔火燒連環屋同樣令到劏房居民死傷枕藉。
即係咁，特區政府嘅房屋政策失敗吖嘛，造就地產霸權，導致租金昂貴，蝸居一族苦不堪言不在話下，家陣仲教壞細路，內地生都違規經營碌架床分租單位。再係咁發展落去，功夫茶相信大學宿舍遲早都會出現非法賓館，鬼叫租一間合法賓館嘅收費係高到冇朋友咩！
其實講到尾，一日都係曾蔭權累事，房屋政策咁重要嘅事居然闊佬懶理，淨係識得結交富商巨賈甚至江湖猛人，乘搭私人飛機同豪華遊艇周遊列國吃喝玩樂，呢頭去完泰國，嗰頭暢遊澳門。曾門酒肉臭，路有燒死骨，死於劏房火災嘅冤魂，間接係失敗嘅房屋政策累死嘅。
內地生私竇變賓館，謀財事小，害命事大。萬一再有劏房單位通道被阻塞而燒死人，功夫茶建議曾蔭權劏肚謝罪！
