講到大摩呢位成功男士身後嘅女人,當然係佢新婚妻子FiFi姐,地位無人替代,不過如果話佢身後仲有另一位男士撐住佢,各位知唔知係邊位? 當然大家會諗起佢個寶貝仔小佐治,無疑摩公子近年投入育馬事業,幫佢嗲哋亦都入咗唔少好貨色,但講到最得大摩歡心,就肯定非佢胞弟摩加利莫屬。
其實呢兩年唔難發覺,大摩由過往以英愛馬匹為頂班主力兵源,到呢兩季響比例上,再以澳洲馬匹為重心,無疑歐洲馬價格貴得離譜,但更放心響澳洲方面,有摩加利幫佢睇住呢盤家族生意,兩年前細摩放棄響澳門從練,返回澳洲發展,雖然話係為大仔摩力高日後從練鋪定後路,另一方面就成為大摩靠得住嘅好兄弟,替佢物色良駒之餘,亦有自己馬房設施作為訓練基地,全力支援大摩。
摩氏家族呢個完善一條龍服務,的確令旗下馬主更加放心同佢哋入貨,剛季三料馬王「明月千里」,正係經細摩喺當地入貨,而緊接而來嘅新馬季,「明月千里」馬主程啟信,以至大馬主蘇啟聲、蕭百君等,俱已經摩氏家族喺澳洲入貨,正所謂兄弟同心,其利斷金,兩兄弟天衣無縫嘅合作,相信摩家軍不難再響來季分級賽繼續橫掃。
http://racing.on.cc/news.html?id=20160715143125