既然有師兄睇得咁過癮，阿星寫多段先～
那些年，星星同學會 第96話
房入面Grace喺度執緊嘢，將阿星啲衫喺衣櫃搬出嚟放埋一齊留出一個空位，再將佢自己嘅衫放入去。唔知點解呢一刻見到Grace咁勤力喺度執衫，阿星對佢有一種莫明其妙嘅憐惜感覺，覺得佢為咗要走嚟見阿星，為咗要同阿星一齊，原來佢犧牲咗好多。
「喂，阿星問你，你交咗幾多錢租俾老豆？」呢個問題真係想問咗好耐。
「好少咋，1個星期£100鎊。」Grace講得輕描淡寫。
「£100鎊？你俾咗£100鎊佢？」阿星眼都突咗出嚟。
「唔係，£100鎊1個星期嘛，我話想暑假完之前都喺度住見住你，俾咗8個星期嘅租包埋伙食嫁，你爸爸都即刻話好，又唔講價，佢真係好人！」Grace一路執衫一路講。
£800鎊喎！兩個月同阿星瞓半邊床仲要包埋伙食，查實你知唔知出面租一個studio flat都係£50鎊1個星期，有剩£50鎊食死你都仲得㗎？
Grace笑笑，然後起身行埋嚟阿星度，雙手勾住阿星條頸攬住阿星，然後話：「冇所謂啦，我覺得值得！」
你知唔知米貴㗎呢小姐？
Grace抬高頭望住阿星，話：「我報咗份part time 呀，喺牛津街Top Shop度做，返10點放6點嫁，你嚟接我收工吖。」
「阿星星期五六晚都要返工喎，五同六接唔到你啦…………咪住咪住，點解你返part time 㗎？同埋點解阿星要接你收工呢？」差啲俾你勾住嚟行，同你傾偈真係要打醒12分精神先得。
Grace繼續以雙手勾住阿星條頸，再施以胸襲嚟到令阿星冇聲出，一路力壓34D，一路用又甜又膩嘅聲線同阿星講：「耶～～～咁人哋都話如果你接人哋放工，人哋會開心死嘛～～～～」
待續😬
