Sodes

咁好機會都冇乘人之危, 個晚樓主加晒分

Dreswift

引用:

原帖由 Sodes 於 2015-2-5 03:52 PM 發表
咁好機會都冇乘人之危, 個晚樓主加晒分

我以前都幾怕羞，係後期做咗地盤先愈嚟愈粗獷豪邁，
同大過自己嘅人拍拖，其實被照顧果種感覺幾好，
當然，自己都唔可以老奉啦:smile_30:

以前大部份拍拖嘅都大過我，啲妹妹仔吸引唔到我，又或者換句話講我吸引唔到啲妹妹仔:smile_30:

小王子

寫的好好，好有電影感……:smile_o06:

Dreswift

引用:

原帖由 小王子 於 2015-2-5 05:24 PM 發表
寫的好好，好有電影感……:smile_o06:

其實之前已經想寫我嘅故仔出嚟，但次次都懶，
同次次都其實都唔知由邊度著手寫先好，
記敘依個形式，係我第一次試，
但因為咁，先可以描述到當時果種感覺出嚟，
可能啲畫面係我腦海現出嚟，所以一路打，一路都好多當時嘅個人感覺可以講得返出嚟，
你話床上果啲嘢中間做過咩其實做完邊叉度記得，
但生活細節真係歷歷在目，所以好容易就刻寫到出嚟:smile_30:

Sodes

引用:

原帖由 Dreswift 於 2015-2-5 05:18 PM 發表

我以前都幾怕羞，係後期做咗地盤先愈嚟愈粗獷豪邁，
同大過自己嘅人拍拖，其實被照顧果種感覺幾好，
當然，自己都唔可以老奉啦:smile_30:

以前大部份拍拖嘅都大過我，啲妹妹仔 ...

姐姐的確唔錯, 我都覺妹妹仔唔多吸引...雖然樓主個故事到而家冇咩甜, 但我覺得好有追看性, 好真實, 加油

小王子

引用:

原帖由 Dreswift 於 2015-2-5 05:41 PM 發表

其實之前已經想寫我嘅故仔出嚟，但次次都懶，
同次次都其實都唔知由邊度著手寫先好，
記敘依個形式，係我第一次試，
但因為咁，先可以描述到當時果種感覺出嚟，
可能啲畫面係我腦海現 ...

可能我都經曆過icq年代，所以好容易代入師兄寫的情景……
師兄繼續加油，期待你的第二，三章的回憶。

nameless333

個故事真係好吸引!
快D寫落去啦!

Dreswift

「作為一個人，要學識駕馭自我，對於個人素質嘅追求係不可以缺少。

修養唔在乎你談吐用字幾咁粗鄙去作定論，修養亦唔係你讀幾多書就可以讀得到出嚟。

個人修養係包含好多內在正面嘅因素。你自己去考量下啦。

而做人最忌就無知，無知不單止會累死自己，可能亦會累死人地。」

依句說話係我一位朋友，以前成日同我講經，有日聽返嚟，佢係一位唔錯嘅人生導師，

我有咩諗唔通就會搵佢聽佢講經，又悟到好多道理出嚟，

但宜家已經無機會聽佢講，因為佢已經過咗身。

講起素質同質素，其實並唔係大陸定香港嘅用法上差距，

只可以講字面上解釋好似雷同，但運用上就確有不同。

承接上篇結尾，唔小心整醒咗佢，

整晚除咗瞓著同瞓醒之外，其實都有好多心理上嘅掙扎，

係佢醒咗之後，其實我就將依啲掙扎苦惱石沉大海，無謂再多諗。

我：「起身喇？係唔係我整醒你？」

女人啱啱瞓醒個樣同把聲都特別可愛，然後佢起身伸個懶腰
...答
S：「good moring！尋晚瞓得好唔好呀？」

我望住佢，心入面真係其實好窩心，但我把口真係好鬼口花
我：「瞓得唔錯呀，你張床好軟好好瞓，或者可能唔關張床事，
係因為你係我隔離，所以我特別好瞓。」

佢就捽捽眼望住我咁傻笑，然後就講
S：「好口花呀你...唔理你，我去刷牙洗面先！」

當佢行到入廁所，刷緊牙嘅時候，我就問佢
我：「宜家下晝喇，tea time都嚟緊，肚唔肚餓呀你？」

佢就打開度門，成口泡咁講...
S：「下咁晏架喇？你想食咩？」

我當然無所謂咁答佢無所謂啦，

等完佢換衫，化妝，三點鐘真係夠鐘TEA，

係佢樓下茶記食完嘢之後，就講再見。

然之後三個月內，其實我都經常上佢屋企，又或者一齊出去食飯，行街，睇戲，

有好多次都有啲健康有益嘅戶外活動，例如佢提議過去行山，教佢踩單車( 佢唔識踩 )，

同去沙灘行下，從中其實我都知佢幾時生日，

過咗三個月時間，佢生日果日就正式咁同咗佢一齊，

不得不題，係教佢踩單車，小弟係若干年前都有踩下mountain bike，

玩downhill，宜家轉玩小輪徑，但甚少出車，等我買返部bike friday speeding tikit應該會踩返多啲...

廢話又講完，又入返正題，

大約係果次之後過咗兩個月，已經經常同佢SMS ICQ，行街睇戲食飯，

可以話我將我任何時間都已經交托哂俾佢，而佢都一樣，將佢啲時間完完整整咁交哂俾我，

基本上由起身至到瞓覺中間嘅時間，有九成都用咗係我身上，

有好多源源不絕嘅話題，至於點解不得不題踩單車依樣嘢呢，

就係同佢有一日經過一間單車舖，佢問我..

S：「既然其實你都算鐘意戶外活動，你識唔識踩單車？」

我就望一望佢，
我：「其實我係你瞓緊覺嘅時間，我會出去踩車，有時會朝早會上山玩下...咁囉。」

佢就望住我...好尷尬咁話
S：「其實我學極都學唔識踩單車...不過我都唔知點解...我平衡感會咁差」

我：「踩單車我無記錯的話，只係用咗幾十秒就學識...」

佢就一面驚訝咁望住我話
S：「吓....咁易架咩？點解我學極都學唔識嘅......」

我就好無奈咁樣同佢講
我：「我都係誤打唔撞咁自己學識踩....無人幫過同我教過我。」

佢就質疑咁話
S：「係咪架.....不如你教我踩.....我真係好想學識踩單車.....」

其實佢個人缺少一份堅持，怕輸，怕失敗，所以佢之前就學極都學唔識。

咁係同日嘅下午，我同佢入咗大尾篤，租單車踩，至於點解入大尾篤，其實係貪大尾篤夠空曠，

同上堤壩有一條大斜路....你踩開車都應該知

我初頭教佢平衡開始都係用一啲好正常嘅方法，

我用咗兩個幾鐘時間，但其實佢好怕跌親.....所以就不停咁落腳，所以學極都學唔識，

至於點解我咁快學識踩單車呢，其實係有段故，

我自己都唔記得係七定八歲就已經識踩，

但好記得係基於一次巧合，係條好長同好斜嘅斜路衝落去，

衝到盡頭係一面牆嚟，而架單車係無掣，

唔知係本能丫定自然咁就學識咗平衡，至於我踩咁多年車，其實真係未炒過車....

Dreswift

又入返正題，

咁用咗兩個幾鐘時間佢都學唔識，我逼於無奈咁用一個好極端嘅方法....

就係慢慢咁推佢落斜....

然後係推佢落斜之前，你有租過車都應該會知，

租果啲單車係用V-Brake多，V-brake，要做手腳好易....我就係佢休息緊嘅時間鬆哂佢後掣，

然後叫我...
我：「唔好咁易放棄呀，我有信心我今日一定教得識你踩！」

佢就望住我好想放棄咁嘅樣就話
S：「都話咗我啲平衡力好差架啦........用咗兩個鐘我都未識踩.......」

我奸笑咗一吓然後就話
我：「今次一定得！你信我！今次轉下方法，一陣我係你旁邊扶住你嘅！」

佢望住眉頭緊皺咁話
S：「點解你奸笑.....」

我又用副懇樣咁同佢講
我：「我唔係奸笑呀...我不嬲都笑得咁衰格架啦，
上車先啦.....上車今次實學得識，包係我身上！」

然後佢就抱有好疑惑嘅眼神望住我上車，
之後我慢慢咁帶佢遊花園遊到條斜路前面....
然後就再慢慢咁推佢落去斜路！

我一路推佢，佢就一路好驚咁嗌唔好呀...救命呀...
然後我一鬆手，佢就學識咗平衡，
好順暢咁飛落條斜路，然後我其實一路係佢旁邊跑住....
見佢驚到唔識剎車，我就捉住佢handlebar，幫佢揸實個handbrake...
其實佢驚到真係連學識平衡都唔知，

佢之後就不停鬧我，
S：「衰人！你嚇死我喇！你知唔知我好驚架！下次唔同你出街喇！好嬲呀！」

我就係咁笑....等佢鬧完之後就話
我：「如果我唔做一次衰人，你根本唔會學識平衡...恭喜你！你啱啱係好驚果陣已經學識咗喇！」

佢個樣就好疑惑咁樣望住我
S：「我幾時有學識呀！我宜家仲驚緊....」

跟住我就輕輕咁摸摸佢個頭同佢講，
我：「你宜家上返去平路先，踩一踩咪知學識未囉....」

S：「我先唔信你！推我落去想殺咗我！一陣我撞死咗你就開心啦！」

我：「我點會.....我咁緊張你，點捨得你死，就算我拋個身出去接住你，
我都會攬住我落地先都唔會俾你受傷啦！」

然後佢又笑返，面都紅埋咁話
S：「你又口花花喇！我先唔信你！俾你激死我喇...」

之後我就話...
我：「信我啦，你已經學識咗喇」

然後佢就落車望住我，我就幫佢推架單車，慢慢同佢行返上去，
之後上到平路，我就叫佢上返車踩住腳踏，然後輕輕咁扶住佢，
一推....

佢就係咁笑咁話
S：「好嘢！真係學識咗喎！我真係天才，咁快咁學識咗踩單車！」

經過幾個鐘勞碌，我都根疲力盡，然後我望住佢踩咗幾個圈，
停咗架車係我前面，個樣好開心咁講...
S：「衰人！多謝你教識我踩單車！今晚我要請你食飯慶功！」

然後慢慢一路行返落斜，去交車，之後坐巴士出返大埔，
係一段好短嘅路程，其實佢玩咗成日都好攰，挨落我膊頭瞓著咗，
到落車其實我都差啲唔捨得叫醒佢，然後把心一橫咁又抱起佢....
係抱到落車嘅時侯佢就醒咗話..
S：「好醜怪！快啲放返我落地！」

咁我當然即刻放返佢落地，慢慢陪佢行，係火車站，佢話要去廁所，整一整理個妝容，
然後等咗佢一陣，一齊就搭返火車出去，
去到佢屋企附近，今次佢提議鋸扒，咁我當然話好，
今次食飯，佢叫咗杯紅酒，大家一路食一路傾，
我就講返我學識踩單車果段故俾佢聽，從此，我嘅稱呼多咗一個叫衰人...

食飽飽，送佢返屋企，去到佢樓下，本身我諗住送到佢樓下就返歸，
但係我未同佢講再見之前，佢就提議話

S：「不如上去我度飲多兩杯先走好唔好？」

咁我見都係七點幾，我就答應佢上去佢度飲多陣傾多陣先走
上到佢去度，飲到十點幾，我就話，
我：「你今日都攰喇，早啲休息啦...」


S：「你要走喇？」

然後佢又好依依不捨咁嘅眼神講多句，
S：「不如你今晚留低陪我好唔好？我想你今晚陪我....」

我笑咗笑咁答
我：「好啦，今晚我陪你啦...咁你快啲去沖涼先啦」

佢又一面好惋歎咁講
S：「衰人你唔好嫌我麻煩，襯我沖涼走咗去呀！」

我：「我緊係唔會啦...我點會走...今晚你踢我出門口我都唔會走...」

佢就笑得好甜咁講
S：「嘻嘻，你係先好呀！你走咗去我就嬲你一世！咁我去沖涼先」

然後佢就入咗廁所，我係出面等咗大約九個字左右，

佢就打開道門，同我講...
S：「我唔記得拎毛巾，可唔可以遞條毛巾入嚟...」

咁我當然唔知佢毛巾放係邊...我就問
我：「你啲毛巾放係邊...」

佢就答
S：「放咗係櫃筒入面...第二格你打開就見到架喇...」

我就行去佢櫃筒，一打開，好整齊...
咁我就好快手咁推返埋個櫃筒，
然後遞條毛巾俾佢，當佢接住條毛巾嘅時候，捉住我隻手講咗句，

S：「仲唔捉到你！衰人！」

其實我都唔知點解俾佢捉住果下，我隻手會鬆得咁快，
咁佢好快著返衫出嚟...又係睡裙，但今次依件比上次果件性感啲，
因為係薄紗，下半身好透視，其實真係一覽無遺，
我真係當堂係呆咗望實佢...

佢個樣好怕羞，咁講
S：「做咩呀？唔好睇呀？我諗咗成晚，唔知咁樣著會唔會嚇親你...
第一次對你咁著...」

其實我果刻個心真係亂哂，感覺個人真係錯哂，
不過其實我自己都知，佢對我係有意思，
只差在我點解仲未踏出果一步，
我好糾結嘅心情俾我理智壓制住，係一瞬間又冷靜返咁話...
我：「唔係呀，幾好睇呀，今晚嘅你好性感，依個畫面我會好好留住係我個腦入面...」

佢笑住咁講
S：「你鹹濕呀...鹹濕佬...」

我都唔知好嬲定好笑咁答佢...
我：「我係鹹濕但我仲未係佬囉....」

S：「咁鹹濕仔，你望夠未滿足未？」

我真係理智凌駕於一切，但同時亦都係好口花....
我：「我滿足架喇，你叫我宜家去死我都心滿意足，真係死而無憾！」

S：「邊個準你咁易死！我唔死你都唔死得！」

經過今個夜晚，我真係處於被動狀態，其實我仲保持到理智我真係都唔知自己想點...
無論樣貌身材，都係好好，我真係唔知自己點解把持得住，
當佢行埋嚟，我就好似感覺到佢心跳一樣，
其實我理智間夾雜住好多不智嘅諗法，但我都係講咗一句...

我：「來日方長，如果我咁早感受你嘅溫柔，我驚我會對你唔住....」

佢笑得好甜咁講
S：「你係第一個男人，可以抵受我咁多次誘惑而不為所動！
不過來日方長，我會慢慢教識你咩叫情趣嘅！嘻！快啲去沖涼啦，我見你真係攰喇....今晚攬住我瞓好唔好？」

竟然俾佢打圓場....大家都有總算有一個好落台嘅下台諧
我：「好啦，咁我去沖涼先喇，你今晚小心啲呀！我可能係隻餓狼嚟！」

佢又笑住咁話
S：「我先唔驚你呀！你要食咗我，之前已經有好多次機會啦！」

咁我就走咗去沖涼，而且我鮮有咁沖凍水（我真係好怕凍）....因為真係我怕我做多錯多....
冷靜完之後，我就行返出去，佢落床行過嚟，攬住我同我講
S：「你其實對我好好，真係未試過有男人對我咁溫柔，多謝你為我做到咁樣，同今日教識我踩單車...」

之後我就一手抱起佢，然後輕輕咁放佢落床，
當放到佢落床，雙眼互望嘅時候，
我自己都把持唔住...
我同佢第一次濕吻，
就係咁樣發生，雖然無愛撫過佢，
熱吻過後，佢床頭燈好柔弱嘅光線，令我好近距離咁望清楚佢，
而我壓係佢身上，佢身體果一絲絲暖意，真係係我個心入面揮之不去。
果晚攬住佢，傾咗好多佢嘅往事，
有啲我會鄧佢心痛，有啲我會好想當時已經識得佢，可以保護佢...
直到三點幾，佢終於都好攰咁伏係我心口瞓著咗。

續
佢對於我嚟講每次見面都有唔同嘅新鮮感，
佢可愛嘅地方，真係亳無保留咁將佢一切俾哂我，
而我覺得自己可恨嘅地方，係將佢一切亳無保留咁接收哂。:smile_24:

同作為結尾，送上一首歌，
Prozak - Paranormal - Tell a Tale of Two Hearts (feat. miss Nissa)

https://www.youtube.com/watch?v=XAKBXkaWmpY

Dreswift

我發覺我每篇篇幅都愈嚟愈大，今次8991，但佢已經過我字節多一萬....要分開兩篇:smile_19:
要出文出返慢返少少先，因為仲有好多嘢想講，我諗打哂出嚟可能過三十萬字以上，眼都盲:smile_35:
今篇都仲未係正式一齊，因為一齊果日係佢生日正日，我亦都做咗一次一生人唯一一次去做嘅事....:smile_30: