人夫人妻日誌#29 - 單身日誌2
我: (心聲)啊，原來…….佢真係幾靚，唔怪得之咁多傻仔仆埋去…….. 其實佢唔蠢蠢地都幾吸引既。 ( 那秀髮半遮著瞼，閉上眼仍是好看，但忽然間…… )
Lucy: 望咁耐望夠未。 ( Lucy在說話，好明顯是對著我說，但…..她是閉著眼的。 )
我: 我……..都無望妳，妳咪埋眼都知?? ( 我在試探。 )
Lucy: 女仔係感覺到人地望自己架，而且我聽出你轉身聲，但又無鼻行聲，仲唔係未瞓? ( 佢既聰明，同佢個樣唔成正比，我沒好氣的轉身便瞓。 )
我: good night……………..
其實我有點緊張，亦有些想多了，可能因而半夜醒了多次，望望睡在旁邊的她，由於有風扇和窗吹入的自然風，房間尚算通風的，而且半夜涼意更盛，但Lucy就已”負被”，那衣不襯身的T恤，露出了她的小蠻腰，那over size既籃球波褲，亦出賣了她的長腿，GOD……..至今還有印象，我意識很自然地行埋去為她蓋好被就是，之後我自己上自己床瞓返好了，係，我無更進取的一步，卻原來已進取了一大步。而我們的第一夜，就這樣過了。
早上，早起的我在洗手間，如常的刷牙，剃鬚。對不起，趕返學的關係，沒有什麼浪漫的早餐，只有趕頭趕命的準備。我相信大部份男生也跟我一樣，外表好好的，在家卻另一個模樣，我的睡衣是已爛無可爛的背心，我滿面cream正準備剃鬚之際…….
Lucy: 得未啊?........ ( 邊在抓頭邊在睡眼惺忪的她，無聲無色的站在我背後。 )
我: 真係嚇死人，無啦啦有隻金毛獅王係背後。 ( 對於習慣一個人係屋企既我，忽然多個人，感覺是特別的。 )
Lucy: 咦，幾得意喎。 ( Lucy在玩弄我面上的cream，我不敢大動作因為我在剃臉頰，她就在乘機將多餘的cream搽在我身上。 )
我: 作死妳咩……… ( 剃完後，我當然不甘示弱，也將已不用的cream回敬在她的臉蛋上。在峽小的空間這樣玩，難免會有肢體碰撞，而且cream本身是潤滑的，所以一個不慎，比較大力既我一拉，她已跌入我懷裡，那時和她對望，時間浪漫地停頓起來似的，她有點怕羞的迴避又再望向我，那時呼吸心跳都加快了起來，係男人都知道應該要點做，我都係男人我當然明，我溫柔的望著她，頭趨前，細聲在她耳邊說……… )
我: 妳有眼屎，不如快D洗個面就出門口囉，遲到喇………………… ( 我放開捉著她的手，作狀去為她抹………. )
Lucy: 嘩………….. ( Lucy即時照鏡，趕我出去後，亦立即就去梳洗了，而我在哈哈笑，亦只好讓出洗手間，去開放式廚房的洗手盆抹好那些多餘的cream，及為自己那能人所不能的衝動讚嘆，係，我在讚嘆自己衝動地無下一步，為什麼沒冷靜地去進一步。 )
車她返到學校，我就在忙上堂，中間的break在library忙著做功課，又或叫抄吧…….我聽女仔講，男人專心做野時好有型，唔知專心抄野算唔算呢?當我抄好時，大功告成，方發現對面坐左個人好耐，我定神望向他，而他一直在等我得閑。
我: Roy? ( 即番薯，喜歡Lucy的人。 )
Roy: Dragon，可以問你D野嘛? ( 我點頭，就和他行出library外的草地。 )
我: 咩事?
Roy: 你係唔係已經同Lucy一齊左喇?
我: 唔係喎，點解咁問?
Roy: 因為……我見到你地時不時一齊放學走，今日又一齊返學囉。 ( 他在用一種知道事實又不敢接受現實的眼神看著我，其實我不喜歡這性格，但他說不上是我哪一位，我也不想說多餘的話。 )
我: Roy,你係有心既，就追人喇。你係男人黎架嘛。 ( 男人同男人講呢句，其實係挑戰緊樽鹽。 )
Roy: 即你地無一齊?但我有friend見到你地一齊行超市買野，好似住埋一齊咁。
我: OKok……… 你追得Lucy，唔會唔知佢表哥Tony掛，我同佢好熟，當Lucy係阿妹咁照顧喳。總言之，我無同Lucy拍拖，而Lucy而家亦都係單身既，你要追人，就加把勁。但就唔好用你當初識佢果D屎橋，唔好講女仔，我係男人都最憎。 ( 講緊既係，當初Lucy黎無耐，已引黎好多狂風浪蝶，當時Tony已經在鬧Lucy要好好專心讀書，唔好拍拖，唔好掛住玩，係先入為主既態度下，Lucy無搵Tony幫手，就轉而問我一件困擾緊佢既事情。 )
Lucy: 幫下我得嘛? ( 某日lunch時份，那時我還未和Lucy熟稔。 )
我: 咩事? ( 見女孩認真的問，我都收起平時嬉笑既表情。 )
Lucy: 今日我收到好多不同既人打黎，但都唔係搵我。
我: 咁有趣?咁搵邊個?
Lucy: 一個叫阿Roy既人。
我: 妳識唔識呢個人?
Lucy: 一個我讀緊其中一科既人，不過唔熟。
我: 有意思，咁妳食左飯未?
Lucy: 吓?未…………
我: 我都未，一餐飯幫妳搞掂佢。 ( 係我開車既時候，Lucy手機再次響起，聽得出對方搵阿Roy，而Lucy已沒好氣地說是打錯，對方接著收線，到食飯期間，同我估計一樣，Lucy唔想俾Tony話，所以無講佢知。而手機係新開既，phone no亦都只係俾左幾個同班既女仔，咁究竟係咩一回事，實在太低手，太清楚了。 )
Lucy: 你幫到我?
我: 信唔信我?信我俾妳個手機我。 ( Lucy點頭，就遞上她的手機，得知6,7個不同來電曾打黎都唔係Lucy認識既人後，手機再次響起。 )
路人甲: 喂，唔該阿Roy。
我: 我係，咩事?
路人甲: 你係?我搵阿Roy喎。
我: 小朋友，既然知唔係，你就即刻叫阿Roy打黎，如果唔係，佢應該好快會激嬲一個佢唔想激嬲既人。
路人甲: 唔好意思，打錯……………… ( 對方收線後。謎題已顯而易見了。 )
我: 放心，真正既阿Roy，應該好快打黎。
Lucy: 你點解會知既?
我: 如果我無估錯，應該係有人想識妳，但佢為左引妳注意，就叫班朋友拎左妳電話後，佢既朋友就輪流打黎俾妳等妳認識呢個人，最後，呢個人就會出現解釋係佢班朋友打錯同對妳講唔好意思而識到妳。
Lucy: 咁無聊?
我: 都幾架，不如睇下我中唔中? ( 果然，不到2分鐘，阿Roy打黎。 )
Roy: 唔該，唔好意思我係阿Roy。
我: 阿Roy下嘛，你終於打黎啦，我估你唔係搵我既。 ( 我遞給Lucy接聽，在Lucy對答直到收線後。我都在微笑，作狀問我有無估中。 )
Lucy: 你點知既?
我: 好簡單，個男既想識女仔，追女仔，又無辦法，身邊朋友出屎橘就係呢D。
Lucy: 你都係咁?
我: HAHA……. 呢招我小學已經唔用。 ( 我在為我既猜中而沾沾自喜。 )
Lucy: 咁我請你食飯啦。
我: 做咩請我食飯?
Lucy: 你講一餐飯幫我搞掂嘛。
我: 我意思係，我一餐飯時間就可以幫妳搞掂呀。
Lucy: 呢件事可唔可以唔好俾Tony知啊。 ( 我見Lucy在認真的懇求。 )
我: 梗唔得啦，Tony係我老死黎架嘛。 ( Lucy即時緊張。 )
Lucy: 吓，唔好啦，一陣佢又有排哦我……….. 又話我好亂俾電話number人。
我: HAHA……. 講笑遮，請我飲凍咖啡啦。
Lucy: 吓，就係咁簡單。
我: 加錢轉凍飲好貴架，有得飲，我會俾舊冰封住把口。
Lucy: 咁係架啦，呢個係我地既秘密……… ( Lucy笑返的模樣，是迷人的，可能因為咁，佢對我既感情和態度有別於佢對Tony。而亦因為呢次，她除了自己圈子的朋友外，就時不時都會搵我。回憶完~ )
別過Roy後，我係度諗，在外人眼中，我和Lucy既行為就像行埋了，其實，係唔係太Close呢?而呢個情況係唔係我想出現既呢?太老土了，用左半秒諗呢個問題之後，太長氣，都係考完試先算……….
[ 本帖最後由 dragonbone 於 2018-7-23 09:52 AM 編輯 ]
