第八章
呢幾日, 小麗不停地到處去選購生日禮物黎比文迪叔叔, 雖然礙於自己嘅經濟能力實在有限, 但小麗亦無嗇惜腰間錢咁去選購呢份生日禮物。
一個價值幾千蚊嘅名牌真皮銀包已經包好, 一切都已經準備, 就只等待聽日下午時份準備出發。
正值叔叔普天同慶嘅日子前夕, 但豆室之內, 有人正獨處一角靜靜咁流下孤雛眼淚, 望住牆上嘅鐘, 尚有一分鐘就會到左叔叔嘅生日來臨。
收音機已經響起報時, 已經正式到左星期日零晨, 但此刻其實對自己又會是如何, 小麗呆多一陣, 索性就響床上倒頭而睡。
幾個字後, 小麗個電話響起, 小麗帶住朦朧嘅聲線接過電話, 「喂…….」 另一邊傳黎一把熟悉嘅聲音, 「小麗, 文迪叔叔呀, 唔好意思呀, 原來妳已經瞓左, 等我架車經過妳樓下見妳上面仲有燈光, 所以我仲以為小麗妳…..」
小麗起身望吓窗外, 果然叔叔就響下面望住上黎, 「叔叔咁夜搵我係咪有事呀?」 「無, 唔係…無咩特別嘅事…..」
小麗突然醒起左, 「叔叔不如你等我一陣先, 我有啲野想而家攞落黎比你!」
小麗心想就襯而家先比左份生日禮物叔叔之後, 咁到聽日就唔使再特登搭車入去西貢度比佢。
落到樓下街邊, 已經到左文迪叔叔嘅面前, 「叔叔, 媚姨已經講左比我知今日係你嘅生日, Happy Birthday, 生日快樂!」
文迪有啲愕然, 「多…謝妳小麗!」 兩個人居然顯得好唔自然咁, 小麗摸住自己另一邊手臂, 正雙眼無神咁同文迪講, 「叔叔, 原本我係聽日先搭車入黎送比你嘅, 不過既然而家比左你, 咁我聽日就唔會再入黎架嘞!」
已經回復鎮定嘅文迪, 「小麗, 叔叔識左妳咁耐, 我地都好似未曾正式咁坐低傾過偈, 喂, 不如我地而家買啲汽水薯片去搵個海灘坐低吹吓海風好唔好呀?」 小麗聽到之後就點一點頭。
西貢銀線灣上, 二人正席地享受住沙灘上嘅晚風, 隨住同時嘅海浪聲響起, 文迪亦開始講番以前啲舊事黎比小麗知。
「諗番以前, 仲記得何姑娘果陣同我講, 話妳讀書係好勤力同好聰明, 所以佢就問我願唔願意出錢去栽培呢個小妹妹去外國度讀書, 而當時我諗都無諗過就一口應承, 因為我只係知道, 果個小妹妹嘅童年已經係好慘, 既然何姑娘有咁嘅提議, 所以我都希望呢個小妹妹將來係可以有機會因為咁而去改寫佢嘅下半生!」
坐響隔離嘅小麗聽到已經泣不成聲, 文迪望住遠方繼續地講。
「到我同妳正式見面之後, 雖然果陣時妳係發生左啲唔愉快嘅事, 但果陣我同何姑娘都曾經商量過, 原本我係提議響市區度買個單位黎比妳居住, 但何姑娘同我講, 話佢好了解呢個小妹妹嘅性格, 話佢一定唔會接受, 而且佢亦唔贊成我去咁做, 所以我亦唯有作罷!」
小麗繼續流住眼淚黎靜心聆聽住。
文迪再繼續, 「小麗, 叔叔表面睇落就好似係無欲無求, 相識滿天下, 但其實真正可以交心同做到真正朋友嘅就真係寥寥可數, 坦白講, 我以前做人嘅態度不嬲都係有啲唔認真, 但呢幾年黎閱歷多左之後, 我就開始覺得其實以前我又真係有啲比較任性!」
小麗望住文迪, 「但叔叔起碼可以做倒好多自己想做嘅事先吖!」
文迪嘆住氣咁搖一搖頭, 「唔係樣樣事都可以做得到, 有好多事情係要考慮埋其他人嘅睇法先至敢去做!」 小麗細細聲咁自言自語, 「但都咁總好過我連考慮嘅機會都無吖!」
