少說廢話多做事, 長氣既咩咩CD-ROM開場白我地skip左佢, 日後有機會再講
＜１＞
仲係讀書既年代, 好記得果陣仲係港島果度讀書, 校園生活好沉悶, 上堂等落堂,日日如事.
我唔鍾意係校內參加d咩課外活動, 99%落左堂既時間後我都係返屋企, 返到屋企可以好自由, 可以上下網打下機, 又或者可以彈下琴, 畫下畫, 係, 我認我的確係幾宅
有一日, 我老豆走入我間房, 同我講: "呀仔, 成日困係屋企, 又唔出街, 咁得閒不如夜晚去搵d野去讀下啦, 學下一技之長都好, 唔好成日坐係屋企度勾塵,因住勾出菌"
從細到大我都好聽我老豆話, 因為我覺得佢好叻, 一把年紀應該係等退休既時期. 但佢仲好努力咁進修緊...而我作為呢個下一代呢,..完全比下去...
於是我開始上網四周圍搵下有D咩好讀, 其實果陣真係唔知揀D咩野好...之後諗過既然決定唔到,就去讀一種外語啦, 點都會有D得著掛
打開一間進修學院的網頁...就係語言類別都多到嘔....韓文, 西班牙, 德文, 法文, 意大利文,真係你想學咩野就有咩野
但係再諗真d都唔知讀黎有咩用...再睇真D...咦!! 仲有一個叫做日文基礎課程! 心諗, 呢個 掂啦實無死
就算第日學完應用唔到工作上, 我都仲可以應用係AV上!! :smile_52:
於是一生人第一次的夜校課程, 我就咁奉獻左比呢間學校, 學校位置就係坐落於太古
而我就係因為咁, 注定要同依一位人遇上.....
第一日返學, 醒目既都會早D到間學校, 搵個靚位坐定定等上堂
你知啦,第一日去一個生保地方, 係人都會有d不安, 倒不如早d到 等你望住d同學入黎, 好過到時你最遲入黎等成班同學望住你
講咁多以為我好準時到? 錯!!! 我果日冇準時不特止, 仲要遲左成2個字先到, 一入到去, 哇, 成廿幾個人望鬼住你, 你都咪話唔尷尬
拿拿臨搵個位坐底先, 抖番啖氣先再做d重要野, 係咩? 當然係望下靚靚女同學啦
望左 望右 望前 望埋後 咦?? 喂??? 咁多中女 同呀叔既?? 係我太後生?? 定係....我入錯班房呀!!!?
無錯喎..呀sir的確係講緊日文.......心諗 雖然有d 失望, 但唯有勉勵自己, 你黎學野架咋, 唔係黎識女!
就係咁, 第一堂, 都係果d 自我介紹果d例牌動作....都叫做識左幾個呀媽級既同學仔...
佢地好多野同我講...但我真係冇咩心去答果陣...sorry 我認我果陣係仆街
時間過得好快, 2個鐘既堂亦都上完, 而我亦好似平時係學校咁,一落堂頭也不回咁即閃人...
之後的第2堂,第3堂都係冇咩變化...我仍然照舊會遲到, 上堂仍然照舊同班C9邊吹下水邊下堂, 講真, 都過得去既...
直到有一日, 我唔知果日做咩事睇錯時間, 最後早左成個鐘去左太古, 橫掂都到左, 不如早D上定課室坐住啦, 當溫下書都好
有返過夜校既人都知, 果D學校平日係比學生用, 夜晚只係騰出空間比一D機構去搞一D夜校課程
而我去讀果間係一間中學黎, 由於我果日早左返, 時唔時都見到大堂都有D中學生妹行來行去
哦, 你梗係想話我之後一定係呢度識左個學生妹之後係搞上, 如果你咁諗你錯啦, 雖然我果陣都係未夠2字出頭, 但我又真係對D學生妹冇咩興趣
講番先, 當我準備步入課室之際, 我發現個課室傳出有笑聲....聽落唔止一個, 起碼都成3,4件......我心諗....下, 我,咁早乜仲有咁多人仲早過我上堂搵位坐?!!
入到去, 發現我錯喇...原來係一個好似MISS同埋幾個學生妹係度整緊個壁報板, 我當然窒左一窒, 大佬, 人地工程中喎, 我係咪出番去兜多幾個圈再返黎好D呢??
正當我準備180度U TURN想走人既時候, 有把女仔聲叫住我 "喂~~唔好意思呀! 我地就快執埋D野就走架喇"
我回頭一望,原來係果個MISS同我講野, 但我見佢有D大陸口音, 又唔係話咩靚女, 我就應左佢一聲"哦" 之後我就搵個位坐番底
坐底左其實都冇咩野做...本來想拎本書出黎睇下...但後面d人整野同講野聲都有d嘈, 於是乎我就索性寧轉頭望下佢地做咩仲好
唔望由至可,一望扯哂火, 嘩, 個miss原來踩左上張凳度佈置緊d野, 著住一條短裙仔, 成個pat pat 向住我既視線範圍裡, 個pat 好圓潤.
可能我及得佢太耐, 比佢發現到我望住佢, 佢見到我好似有D嬲嬲地...
可能佢覺得我及佢底掛...但係...個高度未至於比我可以望到佢裙底, 都成3,4張檯相隔...一張凳既高度, 又唔係直線係你底下向上望, 邊有咁易望到
不過女人有時就係咁! 就好似一個搭緊車既大波妹著件超低空衫出街行, 唔小心跌左野烏低身執野, 仲好醒咁用隻手暗住個V領位先, 驚死走光比人睇蝕哂, 到佢起番身啦,見到你望住佢, 佢一定認定你頭先一定全程及佢野! 之後佢就會怒啤住你直到你落車!
算...!! 死貓食咪食, 又唔會死!
之後佢地整完都走...臨走時個MISS報以一個係'食屎啦你'既眼神離開左個班房...之後我就如常繼續上我的日文堂....
＜２＞
回到家, 諗番起果個情節, 雖然我好似有錯, 但其實又好似冇咩做錯...唔知......如果真係有機會再見到佢或者同佢say sorry la...
之後為左諗住撞番佢,我都提早返學..當然次次食白果, 返到去都係得我一個.正當我打算放棄之際, 有一日終於比我撞番佢
我地唔係o係課室入面相遇,而係學校門口, 一見到佢, 大家既眼神都流露出好尷尬既眼神...
於是我鼓起勇氣, 打破悶局, 話" 上次我無心的....sorry...."
"你係呢度學日文? " 佢迴避左果件事而咁問我. 我嗯左佢一聲
佢又話 "上次你咁樣及我, 我真係有d嬲, 你而家拉開你條褲鏈比我睇下又得唔得?"
我冇聲出......之後除左sorry sorry 我都唔知點應佢好
"點解你地d男人個個都係咁....!!" 講完呢句之後佢一支箭咁就走左,
追唔追上去好呢? 望望個錶, 仲有成3個字先上堂, 應該仲有時間, 死就死, 於是我就追住佢
見佢跑到咁上下, 佢應該冇氣停左, 我亦都追上. 佢見到我, 有d驚訝, 問我做咩跟住佢
我話我想同你解釋果次既事....我真係冇心, 亦都冇及你裙底 (其實真係冇..). 佢露出半信半疑既眼神, 同我講" 有冇時間, 搵個地方坐底?"
你話去左邊? 梗係去左starbucks啦, 太古喎呢度!!唔係九龍塘呀!
坐底左之後...先知道佢岩岩比人飛...飛佢果個, 就係果間學校既人黎...原來果條仔背住佢出去偷食, 又係例牌結局出去偷食比人撞破....
我安慰左佢好耐先叫做好d, 不過有時覺得有d奇怪. 言談之間佢有時唔係太明我講咩... 就算大陸妹發音幾差都好, 大家諗野既思維應該同出一轍...但我講d野佢有時真係唔明...
喂..我話哂係地道香港人, 雖然我唔係好似人民力量班友咁去七一遊行阻住條街比人屌7都當自己係英雄以視我港人之道咁..但我都認為我d廣東話絕對係地道過地道綠茶!清純過清純蒸餾水!!
一定係佢問題! 我好肯定!
果然! 原來...鬼咩.....
佢係日本人黎
========================
篇野比較長, 之後都會keep住update, 希望借呢度同大家分享番我既一點一滴
你既支持,係我既鼓勵! m(_ _)m
[
本帖最後由 ericwingkit 於 2011-9-29 11:11 AM 編輯 ]
