睇完日落，我地都動身扮靚靚去食個晚飯再去夜蒲，嗰晚都轉左幾個場。第一個場有水煙食同睇live bar，泰國既女仔都幾nice，好快就有兩個女仔一齊過黎玩，不過睇得出其中一個係同性戀，因為佢對E非常有興趣（個女仔外型上係不折不扣既正常女仔，但後尾聽E講返閒談答過佢地，我同E只係朋友之後，個女仔就毫不客氣地firlt E🤦🏻♂️）所以我同E兩個飲完一杯都咋咋林轉場。
轉左第二個場係有啲變性人做景點既，佢地熱情既程度直頭係世界級，我地坐低都未叫野飲，只係眼神同佢地接觸到咋，佢地已經say晒hello要影相咁款，我揮揮手示意不需要，佢當左我同佢地say hello⋯成班落台走過黎⋯⋯頂⋯⋯又嚇到我同E咋咋林立即離開，又轉場⋯
起嗰條酒吧街轉左個圈就搵左間有Pole dancer既酒bar，同E一邊傾下計一邊欣賞下班Dancer高超既舞技，兩三層樓高既鋼管，望到都覺得危險⋯
傾左一陣計，有兩個鬼仔走黎撩下我地傾計，其中一個都真係幾靚仔，成個之前成日講外國嗰個體操王子咁。唉⋯傾傾下緊係變到E同體操王子傾，我就隔開左同另一個傾下啲無謂野啦，無謂到我都唔記得講過啲乜，途中我都閒時望下E嗰邊，比我見到佢地kiss左一下，我都真係有啲眼火爆。不過反而kiss完一下冇耐E就話要同我返酒店，就同兩個鬼仔道別lu。當然返酒店係假既，E話呀體操王子雖然真係好靚仔，不過太熱情，成個過程都摸手摸腳，仲要kiss，都有啲嚇退佢。
（其實一直同E既相處都係兩人約會，無其他人好似體操王子或者同性戀女仔咁出現起我地之間，我本以為自己當E係同以前其他出軌偷食既女仔一樣，就算E起我面前識其他男仔，我都唔會有感覺，畢竟大家都係有另一半，逢場作興本來就唔應該有愛既成份，但係點解我今次竟然有醋意架⋯）
最後我地返左第一晚去過嗰間Clubbing，依間係唯一一間有舞池，因為今晚比琴晚早左黎，搵到張舞池隔離既枱，點知玩左一陣竟然撞返嗰pair同性戀女仔⋯佢地又好熱情地痴黎張枱到玩，不過E同佢地玩我都放心過體操王子既。
玩左一段時間，幾杯到肚，我都有啲飲到到頂，不過真係基於人在異地，同埋有個女仔起身邊要睇住，所以都盡量保持清醒，不過望見E同都仲好清醒同佢地玩緊，我啲醋意又有少少湧出黎。谷鬼氣，就自己出舞池跳下啦，high下high下有個泰國妹走埋黎同我一齊跳喎，泰國Clubbing既衣著其實都幾輕便，男男女女大都背心短褲，同香港台灣有啲分別，唯一相同就係女仔都依然係著得sexy，吊帶背心熱褲仔，加上我醋意酒意溝埋一齊，我都有攬住個女仔跳，大家有啲身體接觸，個女仔都好主動轉個身同我wet kiss左幾下，當下我有眼尾望下E，我知佢同同性戀女出左黎舞池，而E亦一定望到我做緊乜。kiss完我地繼續跳舞，E襯有些少空位走左埋我旁邊，哄埋我耳邊講
E:威啦,識到女仔啦
我:成晚你威晒我都要有著落架,個女仔（樣貌）得唔得架？
E:麻麻地囉,唔多得架,洗唔洗我幫你（趕走佢）丫？
（老實講，個泰國妹係咩樣我都好模糊，一來太黑，二來我都有多少酒精到頂，三來我同E住埋同一間房，我根本就深知今晚係唔可能掉低E同個泰國妹有啲咩進一步既行為，不過能夠令E對我有多少異性關著，我都開心既）
我對住E點一點頭，E即刻攬實我，攬得好實好實，佢係純粹想幫我趕走個泰國妹，定係想宣洩主權，我都分唔清楚，當下我只係想好好咁感受E既擁抱，我雙手熊抱式咁攬返住E，我望一望泰國妹見到佢同我申一申脷就走開左，我合埋眼好好去享受左半隻歌既時間，到我開返眼，E望住我咪咪眼咁笑，E個笑容我到死嗰日都唔會忘記，每次笑得黎都好勾引人咁款，佢真係一個笑得好好睇好吸引既女仔。當下我地哄得好埋，我內心亦好掙扎，我好想錫埋去，但又怕錫落去會知己朋友都冇得做，我壓抑住自己，用我僅餘既理智哄返埋E耳邊話佢知個泰國妹走左喇。
我地鬆返開大家，互相對望笑一笑，E就拖住我離開間Club，步行返酒店。返去既途中都係跌跌撞撞，我只係依稀記得同E坐左起路邊檔到食碗粉先返去。
入到酒店房我地兩個又跌跌撞撞落左張床到，我成身都好興，亦到感受到E都一樣，我地兩個平訓左起到，再一次互相對望傻笑（又係依個咪咪眼既笑容）
今次我一個反身壓左起E既上面，試探式咁錫左佢個嘴一啖，E成個人呆左幾秒，我再想錫落去，E即刻擰開講左句「你飲醉喇」我繼續想追住佢黎錫，今次E直程用對手頂住我，我掙扎左一輪，感受到E個力度係真係唔想，而唔係欲拒還迎，最後我都無功而還⋯嘴嘟嘟咁講左句「咁小器架」就訓返落張床到，九秒九就訓著左。
（一來已經玩到真係好眼訓，二來我前文都提過依個kiss係盤死咁去馬，嗰一刻真係跌得有多少尷尬，你地見人地唔比我錫我仲話返人小器幾咁過份幾咁九唔搭八就知啦⋯⋯所以除左訓覺都唔知可以做啲咩）
如果大家有同樣被拒絕既情況記得記得唔可以怯，橫掂講啲咩唔好意思呀對唔住呀都冇分別，所以倒不如博一舖話佢小器，記住講完自己都唔可以笑，要揸緊個信念令到個女仔都要疑惑自己唔比你錫係佢小器，咁你情況就會樂觀好多架喇👍🏻
第二朝起身落去食早餐既時候，大家都好似冇事發生一樣，証明E應該都疑惑緊前一晚唔比我錫係佢小器（我估），而唔係我既錯。
食完早餐就要執拾行李，今日係行程既Day3，我地要轉去另一間山上面距離市中心較遠既resort。
[ 本帖最後由 萬洛豬 於 2019-9-1 12:56 AM 編輯 ]
