我地離開左餐館，我地漫無目的咁行，其實當時三個人都行得好開。大家都冇講過野，又冇人提議去邊定返酒店，我有偷望A同B既表情。A就雙目無神向前望隻手就擺下擺下，B就垂低頭隻右脚踢下踢下咁行。忽然我留意到正前方向原來係個沙灘，咁我就首先打破沉默向住A同B講：横掂食飽飯，不如我地去沙灘吹吹風，當散下步啦。A開口講左聲哦，B就用平聲而冇尾音咁答：是但。我見佢地冇反對，咁我地就行落沙灘。同時我個心梗係想藉呢個機會打破咁恐怖既氣氛，但我又真係唔知講咩好，求其咁講：呢個沙灘夜晚都幾靚，d海風吹埋嚟好舒服。但係A同B都冇比反應我，咁我妙妙嘴唯有收聲。
其實當時沙灘d燈光好暗，正當我地係海邊漫步横行之制，我望望沙灘地下，突然我有隻類似大昆蟲係我鞋邊好快爬過，我第一個反應係曱甴，因為我由細到大都好驚曱甴，覺得曱甴真係好恐怖。所以我成過人彈起左，雙脚離地向前跳起，跟著望番後面。A同B俾我個誇張動作吸引到。
B終於開口問我：仲咩呀你？我仲好驚回氣咁答：冇野啦，原來係隻蟹仔，我以為係曱甴啫。A聽到後就半笑指住我講：比你激死，駛唔駛咁大反應呀，咁大個人都驚曱甴。原來你驚曱甴，第時可以捉嚟嚇你，哈哈。跟住A望住B問：B咁你驚唔驚曱甴架？B答：睇下size啦，細隻我就唔係好驚，但大隻我都驚架。A再講：好彩我唔驚啫，hee hee, 睇下呢度有冇曱甴先，捉隻嚟嚇下你地。
我好快咁答：玩野呀！我跟住用脚掃左堆沙去左A對波鞋到，即時令A對波鞋入晒沙。我跟住好快拍拍身邊既B講：我地仲唔快d跑。B聽到我講個跑字，可能係下意識關係，跟住我一齊向前跑。A就笑住大叫：有冇攪錯，我對鞋入晒沙啦，你地咪走呀，追到你地就知死。跟住A就追住我同B。
