第三回：《北戴河巧遇公墓猿》
乜你條友仔去動物園嚟咩？唔係，公墓猿係內地人對公務員嘅虐稱。
話說11年8月，生意淡薄，老細話你條友不如放有薪年假喇，其實我做嘅行業，暑假一完，就會忙到年底，又真係依家唔放，都唔知幾時放。呢個老細都好兩面化，尖酸但唔刻薄，懶正人君子但又好咸濕，不過總算對我幾好，明知我過年鍾意外遊，舊年仲私人醒咗五千銀我去玩，咁你叫我放，咁我咪放囉，加埋應有嘅day-off，前後8日，但最頭痕係唔知去邊喎？國外一支公我冇興趣，打開本中國地圖，周圍都熱到趴街，唯有向北方向望，shit！除咗北京有3支旗，度度都冇，最後盯住秦皇島北戴河一帶，相傳當年老毛俾大躍進同饑荒搞到一頭煙，四面楚歌之際，有晚响北戴河鴿子窩海灘散步，突然靈機一觸，就搞咗場十年浩劫出嚟。好，一於去北戴河，有多餘時間，就去埋錦州睇睇。
上網查完，深圳同廣州都冇飛機去秦皇島，至近就係北京、天津或者瀋陽，加上暑假，啲機票好貴，高鐵開通後，我亦冇癮坐飛機，寧願坐火車或高鐵。第二朝拿拿臨走去火車售票點買下一日去瀋陽經北戴河嘅飛，佢話除咗站票，乜都冇，退而求其次，北京呢？佢睇完電腦話仲有一張硬座，其他冇哂，仲諗？即要，到時响北京轉動車，係咁第二日下晝就坐兩點幾車去北京西，大約24粒鐘。上到車，旁邊座位係個廿零嘅姑娘，都冇咁悶，佢又係坐到北京，然後轉大巴返山西大同。鐵老大真係無良，一個車廂就有成五、六十人站票，有個四川姑娘唔醒目，去到山東先至搵到個空位，我哋唯有輪流俾佢坐吓。
下一日準時兩點半去到北京西站，當時西站仲未有地鐵，對面位個兵哥話去北京站轉動車，最好打的，雖然我有三粒鐘空檔，佢話市內交通好靠唔住，佢一啲都冇錯，打的都用咗個幾鐘。去到北京站，先走去買回程車飛，對唔住，北京始發返深圳，十日內連站票都冇，咁瀋陽或哈爾濱始發經北京呢？非常時期，要去瀋陽買，吹鬼漲！咁只好去到北戴河先至諗計。
坐17:20動車，晚上七點去到北戴河，先走去問火車飛，佢老板，又係嗰句，瀋陽始發，去瀋陽買，痴乜線嘅。事先上QQ訂好客棧，100銀一晚，平日50就OK，冇計喇，暑假。北戴河劉莊係客棧集中地，亦非常近海灘，所以，必定係人山人海。放低行李就去搵食，睇旅遊書話千其唔好錯過呢度嘅皮皮蝦，點知一睇就大失所望，原來係瀨尿蝦，仲係非常細隻，唔長得過中指幾多。正在成條大街都係嘅海鮮酒家門口啲魚缸前考慮之時，旁邊冇幾遠企咗件白色衫裙女人，大約35左右，後生之時應該有幾分姿色，佢又係一個人，响大家討價還價之間，覺得一個人都唔知叫乜，咁我就話不如一齊食啦，埋單二一添作五。一路食一路傾，原來佢係來自吉林遼源，係响食品安全局做嘅公務員，又係今日下晝先至到，咁我食住上話听日不如作個伴，一齊去玩，佢話想去秦皇島嘅樂島行吓，我話冇所謂。臨走佢話想听日玩完返嚟，想搵個另外一個地方住，依家佢間房向正大街，問我介唔介意朝早先將個喼存响我度，咁又無所謂嘅。
第二朝一早去佢度拉個喼，然後去搵嘢食，行哂成條街，間間都係食嗰啲嘢，流質就係小米粥同豆腐花，硬嘅就係包、油條同燒餅之類，冇乜選擇。我哋兩個人首先坐巴士去秦皇島，然後轉車去樂島，全程坐咗成粒半鐘，公墓猿話唔好夾來夾去，不如佢俾入場費（好似係70per head），我就負責lunch，冇所謂。樂島係一個海邊嘅遊樂場，睇吓海洋生物咁，加埋啲呃錢嘅攤位遊戲，同埋一個水上樂園，最變態係有個海狗池，你可以租條魚杆，勾住條魚仔去引海狗，我睇真啲，個魚勾係有倒勾架，痴乜線嘅！中午响里面餐廳食飯，蒸咗條左口魚，貴就唔貴，好似係70蚊斤，但呃秤呃都飛起，佢哋都未算奸，仲有奸啲嘅，一陣先至講。食完，行到去水上樂園，錢就俾咗，冇理由唔玩，我走去買條泳褲，佢去租咗件泳衣，呢次肉帛相見，加埋多咗許多身体接觸，出返嚟後已經可以手拖手。
未完。。。。。。
