第六十八章．秘查
Joan臨出Thomas間房嘅時候，瞄到佢張枱嘅一邊放左一個小小嘅儀器，心諗:「呢部機好似係用黎偵測偷聽器，要咁小心，一定做左好多唔見得光嘅嘢，怕畀人偷聽。」行左出房之後，佢決定暗中查Thomas，希望可以發掘到一啲Thomas嘅秘密。
佢搵返之前嗰個私家偵探:「有咩辦法可以知道一個人喺講嘅嘢，又唔需要裝偷聽器喺佢間房?」私家偵探話:「有一種遠距離收音嘅儀器，可以收集到最遠300公尺嘅微聲，就算有牆阻隔都冇問題，又唔怕會被偵測出黎。」佢點頭話:「聽落唔錯喎。」個私家偵探:「「係，不過有責任提一提你，噉做可能會犯法。」
佢話:「呢方面唔需要擔心。」再問清楚:「即係只要我喺自己間房，揸住呢個儀器指住某個人間房，就可以聽到晒佢講嘅嘢?」個私家偵探話:「係。」佢話:「噉冇問題，你想辦法將個集音器運入我個辦公室就得啦，之後一切我自己負責，與你無關。」跟住寫低佢巳辦公室地址同埋放低一袋錢就離開偵探社。
過幾日，Joan啱啱返到辦公室手機就響起，佢一接聽對方就話:「件貨已經放左喺個衣櫃裡面。」講完即刻收線，佢行埋衣櫃，打開道門，果然見到有一個中型紙箱放左喺度，佢雙手捧個紙箱出黎，放喺張茶几上，打開個箱，望一望裡面，見到一把形狀似鎗，不過前端裝有一個收音罩嘅儀器，另外重見到一對耳筒。
就係呢個時候，佢秘書辦公室外敲門:「Joan，要開董事局會議嘞。」Joan大聲答:「知道，等我一陣。」即刻想將個箱放返入衣櫃，忽然間猶豫左一下，個秘書繼續喺出面話:「Joan，夠晒鐘啦。」過左一陣Joan匆忙打開門，個秘書就問:「你冇咩嘢呀嗎?」Joan扮到好自然話:「無事呀。」自己行去董事局會議室。
到開完會，Joan行返辦公室，同佢秘書講:「我有啲肚餓，麻煩你去幫我買份早餐。」個秘書話:「唔麻煩。」起身要去，Joan遞張一千蚊紙畀佢:「找返嗰啲錢你唔使畀返我嘞。」個秘書搭左升降機之後佢先返入辦公室。
一入到去辦公室，佢感覺到間辦公室畀人搜過，就攞個微形接受器出黎接落部電腦，再喺部電腦播放出一段錄影片段，片段中只見Joan個秘書搜查佢個辦公室，最後搜唔到嘢先返出去，Joan舒一口氣:「真係好險。」又自言:「啍，早就已經懷疑你係無間道，估唔到真係估中。」
原來嗰日Joan留意到Thomas要偵測偷聽器嘅時候，加上Thomas對佢起疑，令佢亦都怕有人會喺佢辦公室做手腳，而嗰個人最有可能就係佢秘書，因為個秘書係Thomas安排畀佢，而且個秘書都有佢辦公室鎖匙，可以趁佢唔喺辦公室嘅時候偷側入去，於是暗中係辦公室安裝個無線針孔鏡頭，
今早咁啱Joan要開會，個秘書敲門嘅時候佢冇即刻開門，引起個秘書懷疑，個秘書就真係趁佢去開會嘅時候，入佢辦公室暗中搜查，而個秘書之所以搜唔到個箱，係因為Joan作左個冒險嘅決定。
當時個秘書催佢去開會，佢又要將個箱放返入衣櫃嘅時候，諗起個秘書可能會暗中入佢間房，只要稍為搜查就一定會發現個箱，正當佢唔點算好嘅時候，無意中留意到衣櫃裡面一條大絲質圍巾。
於是佢決定博一博，用條絲質圍巾包住個箱，放喺自己將辦公枱上，重特別打左個好靚嘅結先去開門，如果個秘書唔搜查間辦公室就最好，如果佢真係入黎搜查，就睇佢夠唔夠膽解開個結，因為佢都應該知道，解開個結而個箱入冇特別嘅嘢，即係等於話畀Joan知，佢搜查佢嘅辦公室，結果個秘書唔敢博，Joan喺段片中睇住佢對個箱猶豫左一陣就離開。
Joan戴上耳筒，再將個耳筒連接個儀器，揸住個儀器，調交好音量之後企喺辦公室中心，開始慢慢掃射間房，冇幾耐真係收到唔同嘅聲音，其中重包括Thomas，佢慢慢移動位置去到收到Thomas聲音嘅方向，終於聽到佢同某一個人講緊手機。
經過一段時間監聽，Joan終於發現端倪，每次Thomas同嗰個人傾完手機，冇幾耐集團就會接到一間黎自外國貿易同公司嘅訂單，購買佢地集團出產嘅健康飲品，佢心中懷疑:「我地嘅健康飲品喺外國真係咁好賣?」決定搵人暗中調查嗰批健康飲品。
就喺Joan要去搵嗰個私家偵探嘅時候，佢個秘書突然出現截住佢，以冷淡嘅語氣話:「你跟我黎，有人要見你。」佢心諗:「唔通真係畀Thomas知道左我查佢。」正在猶豫好唔好去，個秘書𥇣住佢話:「行啦。」佢心知事已至此，驚都冇用，唯有見步行步，跟住個秘書行。
個秘書帶Joan上左一架客貨車，客貨車司機即刻開車離開，去到一個偏僻地方，個秘書話:「你可以落車嘞。」Joan一落車就見到一個著住整齊西裝嘅中年男人企喺度，個中年男人對Joan微微一笑:「唔好意思，突然間要你黎呢啲地方見我。」
