第五十四章.挑撥
Justin得到Newton介紹,終於肯有人請佢,但係May個樣可能冇咁討好,一直再唔返份工,有一日佢又見工失敗,漫無目的喺條街行嘅時候,無意中撞到一個男人,佢正想講對唔住嘅時候,嗰個男人叫:「May,乜係你呀。」
May舉頭一望:「又會噉啱嘅,Danny,唔好意思喎,撞親你。」嗰個叫Danny嘅男人原來就係Coral嘅大哥,佢地之所以認識,係因為之前個集團重係佢控制嘅時候,同Audree有生意上來往,所以有時會同May見到面。
Danny客氣話:「唔緊要,既然咁啱遇到,不如搵個地方,坐低傾下偈呀。」May淡淡話:「都好,反正都得閒,唔趕時間。」兩個人就喺附近搵左間咖啡店,坐抵之後叫咖啡。
Danny問:「係喎,你點解會得閒?照計呢個時候你應該返緊工架?」May唔出聲,Danny話:「你唔想講冇問題,我地謂其他嘢。」May話:「其實我畀Audree炒左。」Danny有啲意外:「吓,你跟左佢咁耐,點解會噉架?」
May嘆一口氣,將成個原因講出黎,最後狠狠話:「最賤都係Joan,為左自保出賣我地。」Danny安慰佢:「唔緊要啦,我有間公司仔,不如你幫我手,不過待遇差好多。」May客氣話:「多謝先,我想考慮下。」
Danny知佢仍然放唔低以前嘅待遇,就話:「冇問題,我遲啲搞大左間公司,一定重金禮聘你。」May嘴角一笑:「多謝你嘅賞識,我都希望有機會打你工。」Danny突然提到:「如果唔係畀個衰女搶左我個集團,你已經有機會。」
May話:「我都有啲戥你唔抵,不過個集團遲早益晒外人。」Danny有啲緊張:「點解噉講?」May就故意話:「Audree之前請左個男人做佢顧問,後來佢地因為Coral反左面,Audree一怒之下炒左佢,但係Coral轉頭就請返佢做高級顧問,我話佢地冇嘢你都唔信啦。」
Danny問:「個男人係咪大約四十幾歲,高高大大又幾Man噉?」May話:「係呀。」反問:「你識Newton咩?」Danny話:「唔識,不過我見過佢,原來佢叫Newton,重搞過我個妹。」就講返佢當日去殺Coral件事畀May知。
May畀佢嚇左一跳,心諗:「本來諗住挑撥下佢兩兄妹啫,估唔到佢係黐黐地。」Danny見佢嘅表情有啲慌張:「你唔使驚,我只係一時衝動,以後都唔會架嘞。」但係May已經唔想再同佢傾落去,隨便搵個藉口先走。
Danny坐喺度自言自語:「我一定要將間公司上市...」忽然間好似想到辦法,掴起手機打去約一個人:「好,一陣見。」佢去到一間獨立大屋門前,工人請佢入去之後,係客廳等佢嗰個人正係Carina嘅爸爸。
Danny一見佢就叫:「外父。」Carina爸爸即刻話:「唔好再噉叫我。」Danny就話:「好,世伯。」Carina爸爸問:「你搵我有咩事?」Danny直接話:「我想問你借一億。」Carina爸爸笑左出黎:「你係咪傻架,我肯見你,只係念在你以前對得我幾好。」
Danny有啲唔高興:「我之前益你都唔止一億啦,依家叫你借返一億都唔得,就算你冇,你公司都有啦。」Carina爸爸好嚴正問:「乜你唔知你個妹做左集團主席之後,叫佢個甚麼Newton,用以前簽落嘅貸款合約迫我還錢,然後吞左我間公司咩?」
Danny又聽到Newton個名,好嬲話:「又係呢條友,佢係都要同我過去。」Carina爸爸乘機再話:「唔止噉呀,條友重委派Carina做公司嘅CEO,佢一上任就炒晒我嘅親信,Carina點解會幫佢先?唔使問一定已經同嗰條友上過床啦。」
Danny再忍住拍枱起身:「你對奸夫淫婦,我唔會畀你地好過。」轉身就走,Carina爸爸等Danny走左之後,自己陰陰嘴笑:「我等住睇你個傻仔地好戲。」跟住又狠狠話:「你個衰女唔好怪我狠心,係你幫埋啲外人黎吞左我間公司在先。」
[
本帖最後由 netsee 於 2017-11-1 03:40 PM 編輯 ]