各位又收工，星期五在望～
Gina IV
榴槤之國夜晚有好多大排檔式食肆，可以講話你去到邊都有得食。Gina間酒吧附近有兩個呢啲夜市係夜晚先開嘅，阿星知道，因為阿星住喺兩條街後面，有時會同Miss Tang或者Louise過嚟食嘢，所以阿星都幾熟路。Cassy勾住Gina隻手喺前面行，阿星一個喺後面欣賞Cassy左右擺動嘅實體股，至於Gina，佢一件黑色oversized Tee加條鬆身baggy牛仔褲，乜身材都睇唔到。佢已經細粒，仲著到咁鬼鬆身，鬼睇咩？不過阿星知道，禾稈冚珍珠。行咗出嚟，阿星先睇清楚，Gina都係短頭髮，比起Miss Tang長。Miss Tang嘅係短到唔可以紮起，而Gina嘅就啱啱可以紮到條馬尾仔，前面有兩塊頭髮，藍色髮腳，睇嚟都好玩得嘅款。
入到去大排檔坐低，有人走埋嚟問minum，即係飲乜，阿星除咗識叫kopi冰（凍啡）之外，真係冇乜嘢叫得出。Cassy叫咗杯桔仔酸梅水，而Gina就飲薏米水。嘢飲嚟咗，阿星俾咗錢，就行出去睇下每一檔有啲咩食，企咗喺一檔炒貴习嘅檔前面睇下個師傅炒成點，然後發現Gina企咗喺阿星隔離同阿星一齊睇。阿星望下佢，佢又抬頭望下阿星，然後同阿星笑。阿星見佢都笑得幾甜，啲牙都幾整齊，比起阿星棚烏卒卒嘅牙，又真係幾好睇。
「你食咩呀？」Gina捉住阿星隻手搖咗一下。
「都係炒貴习啦，唔要螄蚶（廣東話讀做see hum）」阿星望住個師傅炒緊，口水已經流緊出嚟。
「唔該，要兩份炒貴习，唔愛螄蚶吖！」Gina即時落單，然後捉住阿星返去位度坐。Cassy呢個時候就問阿星：「你嗌咗咩食呀？」點知Gina即刻搶答：「炒貴习走螄蚶呀！你食咩我同你去買啦！」然後Cassy起身笑住同Gina講：「唔使啦，我去睇下有咩食，你同阿星傾下偈先啦。」然後就起身行咗出去揾嘢食。Gina一路望住阿星，望到阿星有啲唔自在。雖然阿星中意俾女仔望，而且越靚嘅阿星越中意，不過好似阿Gina咁主動而且行動咁快捷嘅又真係令到阿星覺得怪怪地。然後電話響起，係Gina個手機，佢接電話同人傾計，一路叫佢早啲瞓，媽媽今晚會遲少少返，聽朝返學記得鎖門咁。唔，有個小朋友喺屋企等門就唔好咁夜返屋企啦，小朋友要媽媽㗎。
Gina講完電話，見阿星望住佢，笑住話：「我個女呀，都成16歲啦，仲要黐住媽咪嘅。」哦，你個女掛住媽咪，都成16歲，吓，佢16歲，咁你12歲生佢？「唔係呀，我23歲生佢嫁，我就嚟39啦。」Gina真係笑得好甜好天真無邪，你話俾阿星知你39歲，阿星真係要頒個美魔女獎過你先得！
（待續）😬
[ 本帖最後由 star_platina 於 2021-10-26 17:25 編輯 ]
