好,收工時間,落住雨講下曵妹Gina先~
Gina I
話說Cassy好中意去一間酒吧度飲酒,話呢度嘅音樂非常勁,酒吧氣氛非常之好,比起平時去嘅酒吧炒熱氣氛程度好高。阿星收工同Cassy兩個拍住拖咁去到,阿星見到未到七點個場已經好爆,人頭爆,音樂爆,氣氛爆,好正。Cassy去同酒吧入面嘅酒保傾咗幾句,酒保就帶咗Cassy同阿星去間貴賓房度坐。間房其實都冇門,只係門口有一排吊鍊輕輕咁遮住,隱約都睇到出面飲酒嘅人同個酒吧,仲有打碟果個靚女。Cassy坐好咗,同阿星咬耳仔傾閒計,啤酒未到,阿星喺度四圍望,八下。Cassy同阿星講,呢間酒吧係佢嘅朋友開嘅,佢朋友係香港人,一陣介紹俾阿星識。阿星都希望可以識多幾個香港人,話哂叫做他鄉遇故知吖嘛。
聽咗一陣歌,飲咗一round酒,阿星就出去酒吧度同酒保講要多兩杯啤酒,叫佢送入去貴賓房,酒保話依家好忙,冇人送酒啦,一係自己攞啦。阿星都見到酒吧真係好忙嘅,咁好生意一定係因為果度打碟果個女仔啦,啲男人個個都走埋去同佢打招呼,又請佢飲酒咁。阿星攞到啤酒,就返入去貴賓房度揾Cassy啦。飲下飲下,都已經九點幾,你個朋友仲未得閒咩?阿星望出去,酒吧依然咁忙,啲人依然咁多,睇嚟Cassy個朋友今晚可能都未必得閒見阿星地。
等咗咁耐,阿星都有啲急,要行出去解決下。穿過人群,行到去打碟台附近嘅厠所,始終榴槤之國嘅厠所設計都係比起香港差啲,而且踎厠阿星都仲係去唔慣。洗乾淨對手,阿星行出厠所,正準備由打碟台行返去貴賓房度,行下行下,有個瘦小嘅身影衝埋嚟,阿星當時真係睇唔到佢衝緊埋嚟:第一,因為人太多;第二,個場燈光好暗;第三,個人影真係好細個,仲要著黑色,以阿星嘅身高,都真係好難睇清楚。
阿星嘅大踏步,瘦小身影嘅急急腳,最後一腳踩落阿星隻腳度,然後阿星因為俾人踩住隻啱啱好番嘅痛腳,唯有嚟個緊急剎車,即刻企定定,不過喺阿星嘅經驗入面,每次阿星因為特殊情況要企定定,通常都會有人俾阿星撞親飛咗去。
(待續)😬