番外篇1 - 黃太第1話~
黃太1
飛嚟榴槤之國之後都冇乜嘢做,安頓好行李,都係時候飲杯紅酒,揾啲嘢搞下。阿星中意睇交友程式,因為好多古靈精怪嘅嘢睇。睇女就當然啦,不過阿星唔多會同人傾計,一嚟唔太相信相中人係真人;二嚟睇下就好,一揾就好多麻煩嘢。唔放樣尤自可,一放樣就即刻就會有好多人嚟睇嚟八卦。阿星八卦人地放啲咩相,睇下睇下都學到唔少嘢。有時候你睇下人地,人地睇下你,睇下睇下,就會有好多人睇到你,然後知道你係乜水。阿星睇埋睇埋唔少,都有唔少人睇番阿星想知道究竟係乜水睇緊佢哋,而當中嘅一位就係佢,黃太。
阿星成日覺得黃太唔多知自己做緊乜,因為佢同阿星傾咗幾日之後,就係咁問阿星覺得佢點。或者你會話:好多人都會問人地覺得佢會點啦,有幾咁唔閒?大夫,你俾阿星講埋先啦。黃太個樣唔算差嘅,而且睇落都保養得幾好,睇落應該大阿星一兩年。同佢傾落先知,佢起碼大阿星五六年,正式係徐娘。不過冇所謂啦,睇下啫,眼看手勿動就好,都係果句,免費係最貴,傾計吹水冇所謂嘅。
阿黃太問阿星覺得佢點,阿星望下佢個樣,都算係中等之姿,就話俾佢聽外貌都唔錯啦,副膽就唔知喇。然後黃太話阿星:「你都唔知人地講乜嘅!」咁你問阿星覺得你點,阿星有碗話碗,有碟話碟咋喎。你係中等姿色,唔通要阿星讚你靚咩?黃太話:「我係叫你睇下我似唔似呀。」似唔似咩呢?似人妻?你好似係叫黃太喎,唔係人妻唔通老作?黃太話:「我當然係人妻啦,所以我先問你我似唔似嘛。」咁似唔似咩先得㗎?
黃太有啲嬲,雖然只係短訊,但係阿星睇得出黃太嘅言詞係對阿星有不滿。之但係不滿啲咩呢?似唔似啲乜,定佢想阿星話俾佢知佢似邊個明星呢?又唔係吖,雖然黃太嘅外貌喺佢嘅年紀嚟講算係比較後生,真係要俾分嘅話10分滿分都有6分左右嘅。大家唔好話阿星奄尖聲悶,阿星都叫做成日訓練自己嘅審美眼光,幾時?咪就係成日開啲交友程式喺度睇女仔囉。阿星睇人樣都有番咁上下,叫做有一顆觀眼之心,望住人地對眼都睇到唔少嘢。之但係單憑一張相,又真係好難判斷一個人喎,你話如果可以真人面對面,甚至可以哄埋啲或者摸下嘅話,準確性就會大增喇。阿星講緊摸下塊面咋喎,你哋諗咗去邊?
(待續)😬