七不思議食女事件 Vol.20
上回講到，係一個無眠既晚上，牧子帶淚打黎我手提。
「我老豆賭輸錢，發酒瘟，又打我同我個媽，我真係唔想再見到呢個人。」
牧子向來都好孝順佢老母。同我傾計既時候，佢周不時都提及佢老母一人打兩份工，供佢同佢個妹讀書；但係，牧子同山大一樣，永遠都唔會提佢老豆。牧子好生性，從來都唔問佢老母拎零用，反而有時會俾家用添。
「屋企日日家嘈屋翳，我真係好撚憎佢。我好想搬出黎住，但係真係無朋友肯收留我。我想問，你屋企會唔會方便收留我幾日？等我搵到劏房租、或者搵到人肯收留我，我就會搬走架喇！我唔係收兵，但係我知你係好人，一定會幫到我。」
「你又知我係好人？」
「我對得男人多，我知道。」
我老豆雖然長期係大陸，細佬又住緊Hall，畢竟我屋企只係區區華富邨，兩房一廳，地方淺窄，要容納一個離家少女，須過我老母哥關，睇黎都唔係一件易事。
「痴線架，無可能。」次日，雖然我阿媽係廚房一路塞住對耳聽收音機，但係一聽到我要帶條女番黎訓，恰似有千里耳咁，一野轟落黎，ban左我。
「屋企好多錢呀？上次我Check你戶口，呢排你已經洗左好多錢喇，屋企邊仲有錢俾你去溝女？仲要帶番黎訓？俾你老豆知道實屌死你。」我阿媽一路剁豬肉，一路隨住菜刀既起伏，屌鳩佢個寶貝仔。
「我有幫人補習架，係搵唔多姐。你知而家d野幾貴架啦，食個常餐都四十蚊….」我嘗試去抗辯，但係始終一日未畢業，一日講野都係毫無說服力。
「睇下？又買件新衫？你一個人得一個身體，著得落幾多件衫？」我老母雖然係好人，但係生活逼人，令佢無辦法唔斤斤計較起上黎。講煮飯，老母已經好耐無煮佢拿手既菜心炒牛肉，理由好簡單，因為牛肉好撚貴，佢唔捨得買。
身為少爺脾氣既浪子，相信「千金散盡還復來」，當買件衫同舊牛肉咁小事都要左度右度，計呢樣計哥樣既時候，我真係好希望我已經HKU畢業，搵到份好工，令我可以隨心所欲，幫輕下阿媽，同埋身邊既人。
然而，我仲日日係薄扶林求學問道，GPA唔上唔落，應付追趕唔完既Reading同Midterm。面對未知既將來，身為一個Final Year BA仔，我上下求索，茫無頭緒，完全唔知來年今日，自己會做緊D咩野工。所以，我好矛盾，既想快D畢業，又留戀係大學入面，做一個長唔大既浪子。
翌日下午。五點五十分。
我趕係下午茶時段完結前，係茶記食只得四舊牛肉既乾炒牛河，「你問下你d公子哥兒朋友，睇下有無辦法幫下你個囡囡啦衰仔。」我媽呢句說話，好似牧子既短髮一樣，係我腦海中徘徊不去。
於事，我厚住面皮，係「HKU Wolfpack」呢個Whatsapp group 入面，向我既兄弟，野狼同Raymond求救。
「我有個女仔朋友，屋企有d事，你地屋企方唔方便，可以幫手收留一下佢幾日？」
「Marvin哥，邊條女呀？唔係賓妹俾事頭炒左呀嘛？」野狼搭嗲，依然恥笑緊我屌過賓妹。
「你唔好問，係兄弟既，就借住間屋黎用住先。Raymond，你阿爺早輪去左，唔係留左間屋俾你咩？借黎住住先得唔得？」
「ok既，你唔介意我阿爺半夜番黎睇你un女，你咪拎去駛囉。但係，係邊條女先？」Raymond答道。
「係牧子。」
「個名好熟，係咪哥個隻援交妹妹？你真係大情聖。唔駛講野，聽日拎條鎖匙俾你。」正所謂物以類聚，人以群分，如果我係Salvador Dali，野狼同Raymond一定係Man Ray同Luis Bunuel，佢地兩個覺得沉船呢件咁超現實既事，竟然覺得好似吃喝拉睡一般平常，並無追問落去。
就係咁，我問Raymond拎左條匙，第二日將佢俾左牧子，幫佢拎齊行李，準備上Raymond阿爺既屋企。
搬入去哥日，我只不過係第二次見呢個短髮女仔。
「Marvin，真係多謝晒，無你我真係唔知點算。」牧子一揚手，將耳鬢既短髮撥去耳背，雪白既前臂露出赤色既傷痕。儘管無錢，我尚有家庭既溫暖。眼前既牧子，家不成家，要安慰佢，都不知從何說起。
雖然我知道呢個短髮美女，只會好似無根既浮萍一樣，係我生活飄泊而過，泛起半分漣漪，終究復歸平靜，但係唔知點解，我竟然盡晒力幫佢，甚至連真名都話左俾佢知，嫖牧子既係麥可，喜歡牧子既，係Marvin。
牧子挽住我既手，上左Raymond屋企，估唔到既係，呢間狹小既公屋，居然成為左我既離宮，為我無事可記既大學生活，又添上一筆絢爛綺妮既色彩，對牧子黎講，不知幸或不幸。
(未完待續)
