七不思議食女事件 Vol. 39
迪士尼童話電影方程式，永遠係王子歷盡滄桑，先同公主係埋一齊，再係片尾由旁白讀出「and they lived happily after」，仙福永享，壽與天齊。王子既屌感情又屌肉體，對公主既感情，永遠唔會過期，又有萬世一系既皇權，毋須為交租而煩惱。
同牧子為住屋問題而鬧交既呢一剎那，我望住盒小魚仙Lego，不禁猜度係電影完結之後，王子到底有無因為小魚仙唔再係美人魚而移情別戀， 或者王子落難，要去花園街賣假Lego搵兩餐。
霍去病年十八而敗匈奴，我今二十三，僅靠微薄之私補糊口，仰賴老母定時救濟。牧子缺錢，投靠契哥，我無可奈何，方明白常以「邦少」自居，餐搵餐食餐餐清，既係自我欺騙，又係自我救贖。呢一點，同我細佬近排沉醉係佢幻想世界，左手同右手打官司，係完全無分別。
有一刻，我將自己抽離至九宵雲外，駭然發覺呢個係典型沉船故事：女主角為世所逼，方不幸作娼，男主角多情種子，欲救諸火坑。但轉念一想，想起牧子對我既種種，我總感到無比愧疚，愧疚於自己既淺薄同醜陋。所以，我決定跟隨我感覺做事，做個屌感情既武士，打左個錯既電話，俾一個錯誤既人。
「喂，阿予，你呢排點？」我骨格精奇，六舊腹肌，玄鐵重劍，有賈寶玉七分俊俏，係天生食軟飯既材料。為左搵錢，我必須打俾阿予。
「Marvin，好耐無聽你把聲喇，電話又唔聽，機又唔覆，你係咪唔掛住我喇？施立毅真係好衰，你記唔記得佢呀，上個月同我分手嗰個ex呀，我早幾日係Sogo門口，見到佢拖住個短髮妹，我真係好唔開心呀。冰室嗰到，我無做喇，你呢排有咩搞呀？」
一諗起牧子同我舊情復熾，阿予呢個問題，就好似我細個背住女友係ICQ溝女，網上囡囡問我「你有無女朋友呀」一樣咁難答。
「無呀，我呢排睇緊紅樓夢，為本小說取下材嘛。你呢？」我又講左個大話，本小說我已經好耐無寫，上次寫到去阿邦同阿妤爆房不成，屌左百佳個阿姐。紅樓夢，我一頁都無睇過。我更加唔會對佢提起牧子。
「我呢排準備緊Ielts呀，我下年要過澳洲讀書丫嘛。我唔想再見到施立毅呢個仆街，你陪下我啦。」
「Ielts？我得架！」打蛇隨棍上，我三寸不爛之舌，輕易說服左阿予搵我補Ielts。至於嗰個施唔知乜，我完全無放到係心上。
世事就係咁荒謬。一個係冰室打工既女仔，竟然係有錢女，請得郁不才在下幫佢補Ielts。不過，當年蜜色女住畢架山，都係打四十蚊一個鐘既兼職，我就知世事無奇不有。當初我為左阿予，日日去冰室食同一個餐，見多佢幾面，去到故事既結尾，於百佳炮房，我先發覺我並唔係佢既白馬王子，我瀟灑揚長而去，又因現實兩字，兜兜轉轉，返回阿予身邊。
我根據阿予俾我既地址，係冷雨紛飛既七點鐘，摸左上阿予北角城市花園既大宅。當初阿予約我晚上七點，雖有一刻感到奇怪，但荷包乾塘，我就無諗咁多。如今憶起，方豁然開朗。
一上到去，就見到久違既阿予，佢之前剪短左既長髮，又生番唔少出黎。阿予雖美，但七分落魄，三分憔悴，一副病容。佢白Tee入面既上圍，細左半個Cup，我望住佢瞇著小眼睛，一面幸福咁望住我，真係我見猶憐，有半秒忘記左牧子，同葡國魂既傳說。
受西化教育，我當然同阿予黎個愛的抱抱，然後同佢行離玄關，逕往餐檯，諗住補習。點知，餐檯之上，擺左個滿漢全席，魚蝦蟹一應俱全。
「咦，原來你有客上黎食飯，咁不如我等你食埋飯先補…」
說時遲那時快，身後一美婦人從廚房步出，約莫四十歲上下，同阿予一樣，有一雙會跳舞的鳳眼，身裁苗條，氣度雍容，同山大老母相比，真係既生瑜、何生亮。
「你就係Marvin喇？好靚仔喎，黎，坐低先，食個飯，再幫阿女補習。」美婦人原來係阿予老母，怪唔知有幾分相似。佢對住我，流晒口水，彷彿就要將我擒住，黎一個「女前目犯」。
「Marvin住華富架，係我做野嗰到識，好叻架，讀港大，中英文都得，仲識寫小說添呀。」阿予對我流露出仰慕既眼神，講到我好似衛斯理咁，精通多國語言，受過嚴格的中國武術訓練。
阿予對我既傾倒，除左因為我才氣縱橫，我諗同當日係百佳，我因為老母打黎，叫我去華富探Larcos，令我無食左佢，不無關係。
「住華富咁近，就多d上黎坐下，食下飯啦，黎啦，d野食都凍喇。」阿予老母急欲將佢個女sell俾我，令我想起《金瓶梅》入面既黃婆，阿予當然就係淫賤潘金蓮，而我陳納邦，當然係狀貌魁梧、眠花宿柳既西門慶。官人，我要呀！
九大筤香氣撲鼻，我恨自己無帶銀針試毒，睇下飯菜入面，有無落春藥。席間阿予老母不斷勸食，招呼周到，我咬住半舊鮑魚，見到阿予情深款款咁望住我，誤入鴻門宴，心諗，做乜鳩？
(未完待續)
