七不思議食女事件 Vol. 35
「三點即刻落船，靚仔，買船飛呢便……」上環信德中心，中年落魄小混混為左兩餐，不斷兜搭我買飛。
我幫襯大叔買左兩張去澳門既船飛，然後收埋一張係褲袋，擰轉頭同牧子講：「個阿叔話好多大陸佬過澳門賭錢，d船爆晒，所以我淨係買得一張飛。如果我有多一張船飛，你……」
「你會唔會同我一齊走呀？」牧子瞇著眼，笑吟吟咁接左落去。
我大喜過望，鍚左佢額頭一啖，獎勵佢既善解人意。
「會呀，行啦，大導演、大文豪。」佢就拖左我隻手，上左船，駛進幸福既海洋。
對上一次過澳門，我只不過得幾歲，當時仲有快達船呢回事。廿年之後，快達船下層地毯既霉霉爛爛既味，同埋船上既老虎機，我到而家仲記憶猶新。
「歡迎各位乘搭噴射飛航，我地既目的地，係澳門外港客運碼頭……」
「做咩咁好興致，無啦啦帶我去澳門？」牧子小鳥依人，挨起我膊頭問道。
「澳門係故事既起點。」搭唔慣船既我，鬼拍後尾枕，暈下暈下，一時講錯說話。
「下？你澳門出世架咩？」
「唔係。我老豆係澳門過黎，佢成日講返以前澳門既野，所以我想帶你去睇下，順手逃離呢個城市。」
(再順手逃離不斷打俾我既阿予。)
好彩我老豆生得我才思敏捷，有賈寶玉七分俊俏之餘，還有三國賈詡既智計，不致於將當日係諾士佛台，Raymond同野狼所講既「澳門桑拿Grad Trip」向牧子透露半句。
澳門，關愛基金，牧子，野狼，阿Yan，阿予，花柳，牧子，澳門。呢短短個零月發生既事，彷彿被噴射船既劇烈搖晃，一次過係腦海倒晒出黎。
我輕掃牧子既短髮，驚覺人生就好似玩大富翁一樣，我一擇骰，抽中「細佬誤割包皮」呢張機會咭，就帶同故人牧子，回到澳門呢個起點。摸住無左幾舊水既荷包，我好希望賭王會著到大富翁阿伯咁，係碼頭俾番兩舊水我。
「澳門對你黎講，有咩咁特別？」牧子既問題，將我拉返去現實。
「我對上一次去澳門，仲讀緊幼稚園，因為一提起澳門呢兩個字，我阿媽就會好唔開心，塊面黑足幾日……」
「點解既？有咩故仔聽？」
「一陣去到，我就話你知。俾個袋我，我想嘔……」
牧子連忙將嘔吐袋打開，放係我前面，拎紙巾出黎，將我咀角既白沬抹去。
「唔該晒你，你對我真係好。」我係挨起牧子身邊，噴射船上下抖動，彷彿去既唔係澳門，係去極東既蓬萊仙山。
窗外煙雨迷濛，雨點忽化作子彈，打破玻璃，係我身邊擦過。
我張開眼，只見阿予同葡萄牙航海家麥哲倫，係甲板上膛。
「Atirar com rifle！Atirar com rifle！轟落去！轟落去！」麥哲倫以葡文同廣東話吆喝，命令阿予射穿我呢個負心漢。
突然之間，賓妹係暗處撲出黎，撲倒左麥哲倫，令到佢枝火槍走火，轟中左自己；但係阿予既子彈劃破長空，中正我額頭。彌留之時，牧子同賓妹伴屍啼哭，我口中喃喃自語：「渡輪引擎轟隆在轉，濕瀝的情感跳進海裡去，打碎了水中的月亮。」
濕瀝的情感……
濕瀝的情感……
濕瀝的情感……
濕瀝的情感……
我又醒了。
「你岩岩發夢，係咁雨雨雨，傻左呀？未見過落雨呀？」牧子一邊摸我既額頭，一邊安慰我。
「我無咩，尋日知道要見你，緊張得濟，無訓過覺嘛…」諗起阿予，我又唯有敷衍過去。
落船之後，我幾經辛苦，終於同牧子截到部的士，徑往白鴿巢公園駛去。
白鴿巢公園榕樹參天。去到門口，買左包龍鬚糖，一路食住，我就一路同牧子講：「呢個公園，我想黎好耐架喇。馬禮遜都係葬係呢到，拿，你睇下個門口，李小龍當年套『精武門』，都係係到拍，一腳踢爛左『華人與狗不得內進既牌』。」
「唔係搭幾百蚊船，就係黎睇個墓，食龍鬚糖呀嘛？拿，我今晚唔會同你過夜，過夜都唔會同你搞野，費時你太易得到我，當我係鍾無豔呀。」牧子雖口裡說不，但係依經拎起紙巾，幫我抹咀邊龍鬚糖既粉。
「想同你扑野，就唔搭船，直接帶你去百佳算啦。我而家個人唔同左，屌感情，唔屌西架喇。」
於是，我就帶住牧子，一路往公園深處走去，一路講左個蕩氣迴腸既故事佢聽。
西洋鬼帝國既寂寞餘暉，葡萄牙最後既殖民地，不曾投降予西班牙人既「天主聖名之城」。一個鐘之後，短髮既牧子，會因為呢個梳打埠故事，係逝水如斯既生命，永遠記得呢一個比瑪嘉烈葡撻還要甜既澳葡秋午。
(未完待續)
