Cartoonbaby2007

打畀牧子囉

主音仔

支持你。。。

大球

打俾牧子啦

s987358

打俾牧子

賈子story

七不思議食女事件 Vol. 33

老子有云：「禍兮福之所倚，福兮禍之所伏。」係咪中梅毒，又有咩好怕喎。令我同牧子分手既導火線，正係當日，浮木碼頭，酒入愁腸，誤砌阿Yan，今我打電話俾牧子既契機，又係阿Yan，真係成也蕭何，敗也蕭何。

「喂，我係麥可。」為燙平我內心既緊張，我講左一個唔係咁好笑既笑話。

「阿邦？你打俾我咩事？呢排點呀，好耐無聽你把聲喇。」牧子素來燕語鶯聲，但係嗰一刻，佢既聲音竟然有些許抖動。

「好耐無見。有樣野，我想同你講，但係真係唔知點開口……」

「做咩唔開心呀？你講啦，我聽緊。」

「係咁既，其實我分手嗰日，我無返到大陸。我去左Raymond御龍山屋企開Party，之後飲大左，同條新識既女搞左野，我真係唔知自己做緊咩……」

我好友「屌聖」森爺教落，除非斷正，一定唔可以戇鳩鳩招認偷食。因為學讀Law既細佬話齋，One is innocent until proven guilty，若有證據，我死不足惜；但我受港大先進教育，打滾情場，食女無數，就好似冷戰時期既美國特工，就算被蘇聯佬嚴刑逼供，我都會守口如瓶，決不洩密。

今忽歷巨變，人之將死，其言也善，係呢個生死悠關既當口，我決定向牧子坦白。不過，可能出於面子，或者顧全牧子既感受，我並無將野狼幫襯佢既故事，話俾佢知。

牧子無出聲。電話聽筒，一片頹唐。

「我地都散左啦，你仲同我講呢d做咩？」

「我細佬今日入左醫院，我係瑪麗門口撞番呢個女仔。佢同我講，話佢原來中左梅毒，唔知邊個惹邊個……」我鼓起最大勇氣，一揚帆，心中既遠航船，就向未知既將來駛去。

「牧子，聽日我地不如約出黎，一齊去油麻地診所驗下，睇下有無中招……」

「…………」

「哦，你想點就點啦。」牧子平靜得出奇，令我回想起，尚未分手之時，每逢意見不合，佢將會默不作聲。比起患梅毒，變尼采二世，牧子既死寂，令我更加不安。

「好啦，咁聽日晏晝十二點，油麻地地鐵站見。」

翌日下午，風雲變色，大雨滂沱。我係油麻地地鐵站，撐一把雨傘，等待歸人，等待不知幸或不幸既結局。

腕錶之上，時針分針秒針相疊，牧子就好似同我初相識一樣，從後拍一拍我膊頭。牧子短髮及肩，嫵媚依舊；惟細看之下，穿著背心披肩既牧子，與上月相比，清減不少，鎖骨隆起，同佢纖巧既香肩，形成左一雙乾涸既湖泊。

「行喇。」牧子眼神倔強，語氣比秋雨還冷。

「好耐無見，你呢排點呀？」我嘗試一路行去診所，一路打破寂靜。

「我搬左去同契哥一齊住。幾百個Friend，得佢一個收留我。」講咁耐，佢正眼都無望過我。

「契哥？」我心入面第二句，就係「唔撚係掛」。

「關唔關你事？」

「我好怕我地會有事，尋晚我成日係到諗，渣住條Jer，左睇右睇，無訓過覺。上次御龍山單野，我真係唔想，對唔住。」

「算啦，過左去。你呢排做緊咩？」我一扮死狗，牧子即刻心都軟埋，拍拍我肩膀。

「我就畢業，寫緊本小說，當係俾自己既Final Year Project。可能佢會好似《哈利波特》咁好賣，改拍電影，我做埋男主角，賺第一筒金，開電影公司，上市之後再集資，炒股炒樓，跟手再分拆上市，到時喇喎，淨係食股息呀，都食過世啦。」為了緩和心中既不安，我又係到鳩up。

黑面既牧子，聽到呢到，噗嚇一笑，然後就講：「你同以前一樣，咁鐘意周星馳同埋鳩up，無變過。個故仔關於咩架？男女主角叫咩名呀？」

「男主角叫阿邦，同我一樣係港大生，係關於畢業既故事；女主角就叫阿杼……」想起阿予既小眼睛，我頓時失聲，竟然好像錯做事既小朋友一樣，有d膽怯。阿予whatsapp左我成朝，我都仲未覆佢機。

「點解叫呢個名咁撬口既？」牧子越講，就越變番以前既牧子。

「『杼』，木字邊做個予字，即係一個木，一個予，拼埋一齊，咪木予，木子，即係牧子囉。」將故事逆轉既一刻，我覺得我極有潛質去做小說家。

雲下雨，風正飄，傘子內，牧子笑。只要佢見到我，恨意就被風雨洗刷，旁人眼中，我地似係拍緊拖，多過去驗梅毒。

「係呢，點解你咁冷靜既？」我對牧子既出奇既沉著，大惑不解。

「其實我自從同你分左手之後，就無再出黎做喇；之後我做過一次body check，好彩乜事都無。其實我想見下你，陪下你。」牧子一路講，一路食住支煙，將煙圈呼出，煙沒在雨中，語間似有無盡辛酸。

我望住牧子，心裡感動，不能再說些什麼。

行下行下，終於上到去關懷愛滋，一間我係網上面搵既免費驗性病機構。同牧子等lift既時候，我總係覺得個看更會驚嘆：「陰鳩公囉，咁後生就瀨野。」所以，我全程都無望過佢。

一上到去，社工姐姐一見到我同牧子，眼神流露出半分謎樣既眼光。可能佢覺得，驗性病呢d咁私人既事，好少男女朋友會一齊黎驗。

「你地邊位驗？」

「我。」

「你一陣跟我入房，抽血，好快就知結果。」

我見到等候室入面，有幾個男人，都好似我一樣，猶如等待黎明，被午門斬首既死囚，個個年初四咁既樣。

「無事既，一陣你出番黎，我請你食雪糕。」牧子放低我對佢既背叛，好似我阿媽細個帶我去睇牙一樣，話要買雪糕乙水番我。

等左一陣，社工姐姐就召左我入房抽血。

社工姐姐問長問短，問我有無嫖妓、有無女朋友、有無SP、點解黎睇病、有無出去一夜情。我過去一塌糊塗，連賓妹都屌過幾獲，如果有得驗，我想一次過驗埋伊波拉病毒。

「無，不過呢排條JER有D痕姐。」我強裝鎮定，差再未叫社工姐姐，過黎幫手搲下。

「好啦，你伸隻手出黎，滴完血，如果張試紙有一條線，就有事，如果有兩條線，就無事架喇，好快就知道結果。」

我依佢所言，抽血驗身。我雙眼望實張試紙，時針分針秒針，頓然停止。我諗起阿媽同細佬，兄生性病弟倍感高興；仲有出面憂心如焚既牧子，冰室既阿予，未完成既小說，壯志未酬，就星落五丈原，竟一時緊張得說不出話來。

(未完待續)

studio4e

支持~支持~支持~:smile_o12:

abcaba123

支持你呀ching... 又係比你起呢d 位cut ..
Cant wait for the rest of ur nice story! (i mean..Past)

唔知點解有少少鍾意左牧子

N 祝新年快樂 事事順利 快d 出文 keke

sixfour

野狼君有否患花柳啊？

太極廿四味

新年快樂，等你更新呀C兄

主音仔

同牧子一齊返啦