引用:
原帖由 lulu1238899 於 2021-11-22 07:54 發表
男人馨起身上尼乜都要搞下出火,小詩有排嘆
現實唔係咁易㗎。
* * *
3.6.5下3下1
小詩清淡咁妝扮吓就出嚟,喺大學附近間Jen裏面嘅馬來西亞餐廳等。
對於我走咗突然返嚟搵佢,小詩顯得好高興。食飯嘅時候,睇見佢斯文、嬌柔嘅舉止,好難想像可以喺辦公室裏面舞得掂一班牛鬼蛇神。相信太子女嘅身份有實際幫助。
食完晚飯,我理所當然送佢返屋企,佢亦都理所當然咁再次拖住我,由山道入大學站。喺大學裏面,佢由拖手轉為繞住我手臂。由旭龢道出大學,沿住干德道漫步去佢屋企,中途我轉番拖佢手。
妳今日行咗好多路喎。
我頭先搭的士落去嘅。
去到天匯就問我,上次你話下次上嚟參觀,呢次要兌現。
小詩自己一個人住,每次爸媽嚟香港就喺佢屋企小住,唔住酒店,所以屋企嘅設備應有盡有。有一個酒櫃,啲酒有一半係佢爸爸嘅。另外有間房專放衫,裏面掛滿名牌。
佢開咗支酒,問我飲唔飲。我話我唔飲酒,問佢要水。
我哋就坐喺梳化傾偈。
小詩挨到好貼,幾乎想伏喺我膊頭咁滯。我好想好想攬住佢、摸佢,但儘量保持禮貌距離,唔想同佢有太親熱舉動。
咁樣做係有原因嘅。
因為佢公司係我公司嘅客,而我覺得以佢呢種身份嘅女仔,係想認真拍拖,唔係搵casual sex。我有家庭,一但同佢攪上,會好麻煩。既然佢一路唔想講清楚、唔想確認,我就一於玩含糊,享受互flirt同有限嘅身體觸碰,但嚴守界線,絕不侵犯佢,除非有一日佢明知道我嘅狀態都仲要犯規。
我喺佢屋企坐吓、傾吓偈,佢好想俾我了解咁樣講好多佢以前啲嘢我聽,俾以前、好朋友、家人啲相我睇,令我覺得短短嘅相聚已經入咗佢世界裏面。
以小詩講到自己咁乖同埋冇經驗,佢感情掌控似乎非常好,收放自如。小詩從來冇問我感情、家庭狀況,我同佢有好多身體觸碰,拖手、依偎等等佢毫無避忌,亦好積極表達好感、掛念,似乎已經當正同我拍緊拖。但一察覺到我刻意保持距離,又完全冇所謂咁。
一係佢係感情高手,一係佢係慣性放電自己都唔知嗰種。
同小詩喺佢屋企傾到11點,佢仲意猶未盡。我好掛住小予,想走喇。
我話,眼瞓喇,想返屋企休息。
好吖,聽晚我哋仲會食飯㗎呵?
我知道呢種女要小心,稍為有想flirt吓嘅心態,就好容易鍾意咗,然後佢會話你諗錯咗,佢根本冇諗過…etc。
一離開佢屋企即刻睇手機,小予半個訊息都冇,好擔心。
反為小S訊息過嚟。
我走喇,俾肥佬阻一阻,公司啲嘢做唔切。小予全程俾佢監視住,發唔到訊息俾你,佢而家跟肥佬返屋企喇。你去咗邊?
半夜醒咗,我睇吓手機,依然訊息都冇。嗰日係大陸人嘅520,我發個訊息小予,祝佢520快樂。
朝早一醒,第一時間睇手機,仲未見佢訊息。
9點幾我已經喺公司,反而第一個就收到小詩訊息。
佢影咗張相俾我,係佢枱面,上面有泡茶工具。
一早返到公司就泡茶喇。
我已經返到。
有冇掛住我呀?
妳話呢?
冇,你要我女仔發訊息俾你。
我即刻覺得唔妥,咁樣曖昧落去好快出事,我覺得今晚食飯必需要同佢講清楚。
我話,怕打擾妳吖嘛。
唔怕,你有權打擾。
咁好啦。
可以影你喺公司俾我睇嘛?
於是我就喺窗邊selfie俾佢睇。
帥氣,我發俾爸爸得嘛?
我心諗佢做乜要咁?就即刻制止佢。
唔好啦。
點解?
總之唔好,唔好意思。
哦,咁好啦,我唔發,做嘢喇。
好。
過冇耐,再有訊息。
唔快樂。
係小予,佢覆我半夜祝佢520快樂個訊息。
(未完待續)
[
本帖最後由 dcat20 於 2021-11-24 09:56 編輯 ]