那一晚係我同呢個同事一齊去，在蘭桂坊，入到去音樂又嘈，我地坐埋一邊，查實我都有啲厭倦呢啲地方，因為坐係度唔知做咩，吹下水都吹唔到咁多次。坐到十一點幾，有個男人行埋嚟好有禮貌咁話可唔可以坐低，佢係一個有少少Ｍ字額的男人，但剪了陸軍裝，就唔係好礙眼，佢幾大隻，黑黑實實，一睇就知有做GYM。
佢好多野講，好明顯係出嚟蒲慣的人，佢話自己做ibank，我一聽唔信，我做果行業務經常接觸到投行啲人，如果吹水呃我唔到，點知佢係咁講佢的工作，又講上司同入面啲野，係真野嚟。咁投行啲人壓力大出嚟玩唔奇，我聽聞呢行好多人做到夜晚十一二點，落蘭桂芳蒲到三點，第朝照樣九點出現返工，好似食咗藥咁上晒電。呢個男人淨係對我有興趣，因為佢係咁望實我同我傾，對我同事就一句起兩句止，唔夠半個鐘我同事醒水，話同我一齊去廁所。入到去同我講話佢走先，我梗唔制，佢話有下文先算，如果你唔想佢唔敢亂嚟。我都唔知點解又信佢俾佢走先。
跟住發生的事極樣衰尷尬，我打算長話短說。
總之係佢在我朋友走後唔夠三個字就單刀直入問我有無興趣參觀下佢屋企。係人都知佢想點！呢個男人我都有啲興趣，一嚟佢好風趣好多笑位，其二佢講野好有sense，真係有啲insight，個樣就普通少少，最後一樣，做投資銀行，應該係叻仔啦，佢個年紀，我估同我差唔多(後來知道佢仲細我三年)。我把心一橫，話好呀，佢跟住就同我出去截的士。
等車時我好後悔，想借啲椅走人，但係又唔知點開口，好似好樣衰咁。但眼前擺明係一個想同我上床的男人，如果我應承，佢就係我第二個男人，如果走人就無。咁幾時先有第二個呢？我當時內心掙扎緊就係呢啲野，未諗完，車到，無辦法跟佢上咗車，一路開一路扮鎮定，其實心都跳到亂晒，佢全程照舊好多野講，又足球又唔知咩，我亂咁應佢，其實個心亂到七彩。
跟住，我要講最爆笑的事了，佢住灣仔一間服務式住宅。入到去，佢係到拉開啲窗簾俾我睇下出面，我查實好唔自然，就話去廁所。入到廁所對住塊鏡，我個人清醒啲，一除褲坐低，個人突然「叮」一聲醒咗，今日套底衫唔見得人呀！個bra同底褲都係舊野，瘀死！我即時成個失晒魂，出番去，佢仲好殷勤問我飲咩，我就突然話唔好意思想返屋企，個一刻佢靜咗，跟住笑住話，從來未試過咁樣情況，問我做咩，我都好尷尬但又唔講得嘛，就堅持話唔好意思好想返屋企。佢做咗啲好奇怪的表情，跟住問有無機會再見，我於是留個電話俾佢。佢就送我落去，幫我截埋的士。
開咗車，我先至回魂，亦因為佢咁君子的風度，令我留低好印象。
