以下繼續...
日子過得好快, 因工作關係, 有兩個幾禮拜我無再固意去Scarlett的診所搵佢. 有時候, 我夜晚會落樓下四圍行下, 希望可以再次遇上佢...
我知道自己隨著時間流走, 對Scarlett的想念只越來越深.
直到有一日, 做完個Project後攞咗一日day off. 諗咗好耐去唔去搵佢好? 好人好姐, 無啦啦睇咩醫生啫? 走入去診症室同佢講, "我想見你", 咁萬一原來當晚我真係認錯人咁咪搞笑? 始終99.9% 唔等於100%. 又或者, 如果佢對我零感覺, 然後好似周星馳句經典對白咁對我講: "執濟藥過你好冇?" 我估我會立即撞頭埋牆.
不入虎穴, 焉得虎子. 就同你賭一鋪. 大大聲同佢講: 我! 無! 事!, 我只係想見你!!!!!!!!!!
入到診所, 俾Michelle探完熱, 等咗十多分鐘後, 我做咗佢今晚最後一個病人.
睇過醫生既人都知道醫生 Call 病人入房前都會睇下病歷, 換言之, 韻兒佢見我前有充分準備, 而我, .... 心跳好似越來越快.
古時, 孫子曰: 凡先處戰地而待敵者佚，后處戰地而趨戰者勞.
................
(我! 無! 事!, 我只係想見你!!!!!!!!!!)
入到去, 或者佢仲未傷心完, 又或者佢做咗一日野, 見到韻兒醫生好似有D攰, 儘管佢既眼神依舊親切.
韻兒醫生: 好耐無見, 今次邊度唔舒服?
我:......(透了一大口氣)........
我: 嗯, 點知點解, 呢排個心成日囉囉亂. 你知啦, A股升咗足足半年, 港交所又到300大元一股. 而家追入又驚佢調整喎. 但係我又真係想賺下快錢, 你知啦, 香港而家咩都貴呀... 係喎, 你幾個禮拜前隻藥真係掂! 我食咗一日就無再肚痛啦. 都唔知點解, 我個friend同我食既明明係同一樣野, 點解佢會無事我會有事? 話時話, 寶礦力其實我以前少飲, 係聽你講架咋. 不過近排又好似鐘意飲佢咁喎...如果再少D甜會更好飲..你知啦,.....呀...有套戲好感人, 係講幼稚園...
(我到底講緊乜鬼野呀!?)
韻兒醫生: ...............
我: 你知啦....呀......上次...樓下見到一個女仔係咁喊, 咁我好心陪下佢啦. 佢同我3唔識7講咗佢好多野我知, 話佢中學年代就識佢男友, 之後一齊上大學, 讀醫, 最後分別開咗自己既診所. 原本打算結婚生仔, 點知個女仔發覺佢男友同佢診所D姑娘亂搞關係. 最後俾佢知道咗, 佢感覺生不如死, 人生無哂方向.....唉, 我心諗, 個女仔咁好, 聰明, 有愛心, 人又靚 (身材又正), 點解個男人唔好好咁珍惜佢? 如果我有咁樣既女朋友, 我一定會好好對佢.....一定, 一定會好好對佢. 這兩個禮拜我好忙, 但我幾乎晚晚都會响樓下同一地方試下運氣睇下可唔可以再見到佢...我掛住佢.
韻兒醫生: ...................................
我: 韻兒醫生, 我...或者能醫不自醫, 你要唔要幫我呢個新朋友睇下個心有無事?
二人陷入良久既沉默.....
只見韻兒醫生慢慢除下了她的眼鏡, 解掉髮髻, 最後, 也除下了她的口罩. 然後, 眼泛淚光, 向我報以一個能將世上任何男人的心都溶掉的微笑. 而眼前的人, 不是那晚的可憐姑娘, 仲會係邊個? 之後, 她從她的椅上站起來, 走到我這邊, 給了我一個深情的一吻.......
待續.
[
本帖最後由 美肌物語 於 2015-5-6 09:30 AM 編輯 ]
