當晚真係只係攬住訓,冇其他事發生既..
到第二日起身一睇電話有幾個未讀訊息..都係當時男友問去左邊~係未訓左?
我只可以覆:琴晚眼訓早左訓呀
F一直係隔離睇住,最後佢問可唔可以一齊返?
我:比啲時間我
其實當時我都唔知可以點,因為我知自己係好中意佢,但我男朋友好無辜,又唔知點交待。
係之後一個月我同F都有出過黎食飯,電話都有好似普通朋友咁傾計,但就係冇再講一唔一齊既問題,大家就好似冇左件事咁。
有一日都係平常咁出黎食飯,走果刻照常送我去搭車,但果日特別啲,F話想送我返屋企,我都拒絕唔到。
到屋企樓下~
F: 你有答案未?
我:咩答案?
F: 上次你話比啲時間你,你決定好未? 我應成你我以後會對你好好,我地唔好再分開。 之前係我錯,對唔住呀
//好記得當時佢表情真係比好多支針插入心咁,眼又濕曬//
我:唔好咁啦,我唔知可以點。我覺得我地而家好好,我唔想我男朋友傷心,佢好無辜。但我都唔想你傷心。
//我就係咁,樣樣野都唔知想點。到而家大左都係唔知想點。//
F: 咁好啦...我明白啦。你返上樓啦,我走啦。
我: 最後主動拖住佢叫佢唔好再咁,可能會搵到個比我更好既女仔,做朋友係唔會分開嫁嘛~
F: 嗯..你快啲返屋企啦
之後我就上左樓,無耐我收到F msg話唔洗擔心佢,佢冇事。我地之後都係好朋友!
果日之後我同F慢慢冇咩點聯絡,一直同我男朋友一齊。
大約3年後,收到一個msg..大概係咁:
F: 可能你唔知我幾中意你,但喱幾年我真係放唔低,慢慢同你冇聯絡果時仲以為自己真係可以放低你,因為唔會再諗起。但時間一耐左我不自覺咁行同你行過既路,又去一齊食過野既餐廳自己食野。識左兩個女仔,拍拖唔夠一個月就分手。 我決定去冇你既地方過新生活!希望你一切安好,男朋友永遠都錫你。
收到一刻,個心一沉,我都唔知可以點。喊唔出,笑唔出。所有回憶係心深處浮現出黎。我冇覆到,因為唔知點覆。
題外話:我拍過兩次拖姐,一個係初戀,一個係拍左拖6-7年既男朋友。
有咩想問都可以係下面留言問嫁~