第十四章
終於, 我辭退左福利官嘅工作, 再跟住就真係頂左呢間公司黎開始我嘅另一番事業, 好快地, 三年過後, 經我一番破斧沉舟嘅努力, 呢間公司亦總算比我做到都叫係有的小成, 但最可惜嘅, 就係我同麗芳亦因為呢間公司嘅事, 最終都係攪到意見不合, 而最後大家仲要分手收場。
呢日晚上, 供應商嘅貨物遲遲都仲未送黎, 伙記又已經準時收哂工, 我唯自己留響公司度等的貨物送黎, 已經成九點幾, 貨物終於都等到送黎, 工人正將車上的貨物搬緊落地, 「唔該幫我將全部的貨搬去地下舖頭入面個倉度吖!」
搬貨工人正好心急咁同我講, 「喂老細, 真係唔好意思, 今日全世界都遲哂, 而且我地仲有成半車貨要趕住去送, 其他公司的老細都咋緊我地型, 所以, 呢次我地真係無時間咁幫老細你搬入去嘞!」 我未及發火, 工人已經跳番上車度咁好快就開車絕塵而去。
望住地上呢一大堆貨物, 我開始自言自語咁發住晦氣, 唉, 一個人搬似乎無個幾鐘頭都搬唔哂入個倉度, 呢次慘嘞, 仲未食飯添架, 但又唔可以就咁擺哂的貨響街邊呢度, 都仲係快的郁手開工好過, 如果唔係, 到今晚十二點都唔知搬唔搬得哂入去添架。
已經搬左成個鐘頭, 又攰又餓嘅感覺已經攪到我想死咁滯, 仲有一半貨度未搬, 我繼續咬住牙關咁頂硬而上, 就響呢個時候, 路邊好似有個人正企左響度望住我呢個方向, 係一個著住長裙仲生幾靚嘅長髮後生女仔, 個女仔係咁望住我, 而我又覺得佢好似好面善咁, 但就硬係諗唔起佢會係邊個。
「張生…」 哦, 個女仔響度叫緊我喎, 「妳係…」 「張生, 咩原來真係你黎呀, 黎, 等我幫你一齊將呢度的貨搬哂入去吖!」 講完, 個靚女居然真係走黎搬住我的貨入去我舖頭度, 我仲呆左咁企度, 「張生, 做咩仲停哂手呀, 我係美惠呀, 仲唔快的郁手一齊幫手搬哂入去!」
係美惠? 佢真係美惠, 已經無見美惠三年度, 估唔到佢個樣而家居然變得成熟左唔少咁, 而且, 真係可以講係愈大仲愈靚女添, 我地兩個開始夾手夾腳, 好快, 其餘所有嘅貨物都已經搬哂入去個倉度。
我已經餓到想死, 我嗱嗱林拉埋度閘, 跟住美惠話要陪我一齊行去食飯, 我地去左附近街頭嘅麵擋度食麵, 我二話不說就已經狼吞左兩碗麵, 美惠就只係微笑住咁坐響我對面凝望住我。
終於飽肚嘞, 我開始問住美惠, 「無見咁耐, 真係差的就唔認得妳咁滯, 係呢, 點解無端端妳會響呢度出現嘅?」 原來美惠啱啱同的同事一齊去睇完戲, 咁啱成班人經過呢度, 突然見到我覺得有的面善, 但就估唔到呢個響街度搬緊貨嘅人, 居然真係就會係我。
「係呢, 子健佢幾好吖嗎?」 我關心咁問住, 「幾好呀, 尋日佢仲參加左學校嘅遊學團去左外地, 今年佢都中學畢業囉, 係呢, 你同麗芳姐姐都幾好嗎?」 我苦笑住咁搖住頭, 跟住我地就接住互相講左響呢三年嘅近況出黎。
美惠原來都已經出黎社會度做事, 而家係響中環度番緊寫字樓工, 我笑佢而家生得咁靚, 一定係有大把男仔想追佢架啦, 美惠聽到之後, 就搖住頭咁做左一個奇怪嘅苦笑。
好嘞, 都要埋單走人嘞, 突然, 美惠一個箭步咁就跑左過去幫我比錢, 我話比番錢佢, 美惠搖住頭講, 「唔使嘞, 張生以前成日都咁幫我地兩姊弟, 而家我總算可以有機會第一次請番張生食野, 應該係我開心至啱!」 既然佢都咁講到, 咁我亦都唔再勉強佢嘞。
美惠仲係住緊以前果間屋村單位度, 我揸住公司部客貨車車佢番去屋企, 好快, 已經到左佢屋企嘅樓下, 「到嘞, 咦, 呢度四圍都好似無咩點變到咁, 呀係呢, 有時間嘅, 妳咪得閒就搵吓我出去食飯囉, 我個電話都無改到架!」
我正想同美惠講拜拜嘅時候, 美惠就有的唔係好自然咁同我講, 「張生...不如...可以嘅話, 而家就上黎我屋企度坐一陣先走啦….!」 哦, 咁…都可以嘅, 況且美惠嘅屋企我又係咁熟, 咁我唯有先將部車泊好之後, 然後就同美惠一齊上去佢嘅屋企度坐吓咁啦。
(待續)