行左一陣, 有條茂利突然衝住埋黎, 問都唔問就捉住我同另一個女仔攬住黎咁, 「麻煩呀生, 唔該同我地影張相丫!」 隻死人手係咁掃住我嘅手臂, 個身又係咁挨身挨勢咁, 我想同佢企番開的, 條衰人就將我愈攬愈實, 胸邊已經緊貼住佢, 燈光一閃, 我同另一個女仔即時推開佢隻手閃開, 嘩, 使唔使咁猖狂呀, 跟住見佢又走去第二的女人度重施故技, 果然, 真係一樣米養百樣人。
聚會期間, 一的人就採取積極嘅態度, 努力咁去四圍兜搭, 另一的人就好似我咁, 零願坐響梳化度, 但咁反而仲可以同其他的人傾到計, 有個男仔正攝緊入黎梳化度, 唔小心撞到我隻腳, 「呀, 對唔住, 唔好意思小姐, 妳有無事呀?」 我禮貌咁笑住搖住頭, 個男仔坐低左後, 跟住亦同我點一點頭伸出隻手, 「小姐, 妳好, 我叫 SY Ho, 何兆賢!」 我同個男仔握完手後, 個男仔就無再理我。
聚會好快咁就要結束, 今日唯一嘅收穫就係坐響梳化度識到幾個女仔同幾個較為平凡嘅男仔, 但真正擇偶嘅目的就仲未曾達到, 但我地幾個人就相約左響星期六會番大陸玩兩日, 都算叫做唔使再一個人悶悶地咁啦。
周未早上, 我地一行六人浩浩蕩蕩咁搭火車上大陸, 到左溫泉酒店放低晒的野之後, 我地就一齊出去四圍食野同玩, 同行嘅兩男兩女居然好似咁快趣就撻著左咁, 已經開始手拖手咁行住, 剩番呢個兆賢何嘅男仔, 唔係, 應該係男人至啱, 因為佢都已經成三十九歲, 同我一齊就響後面咁行住。
兆賢同我地講佢係響中環番寫字樓嘅, 講真, 佢個款其實又真係幾普通吓咁, 但份人就無咩點, 對我都係客客氣氣咁, 算係幾尖頭文嘅, 不過我一路以黎都係同佢地講我又係番寫字樓工嘅, 我覺得有時初相識嘅野, 唔需要事事太認真同太過坦白嘅。
已經食到飽飽咁, 同行嘅女仔呀儀提議話不如番酒店去游水囉, 我地出發前晨早講左會黎浸溫泉同游水, 所以我亦都準備左套比堅尼泳衣帶黎, 番到酒店, 我地換過泳衣之後, 就向住酒店泳池方向行去, 我地玩左一陣水無耐, 果兩 pair 已經開始響泳池入面馨馨我我咁攬到實一實, 其中一 pair 直情響水中度打埋車輪添, 我上番水坐響的沙灘椅度, 兆賢走埋黎問我飲唔飲野, 我點左一吓頭, 兆賢跟住就走左去買野飲。
水中嘅呀儀突然走埋我處, 「呀紅, 原本我係同妳一間房嘅, 今晚唔知我地可唔可以掉一掉房, 我想去呀志果邊同佢一齊瞓!」 吓, 呀志原本係同兆賢一間房喎, 咁即係兆賢要掉過黎同我一間房度瞓, 我仲諗緊嘅時候, 呀儀係咁搖住我隻手, 「呢, 呀紅, 唔該妳啦, 當係我求吓妳嘞, 其實 SY份人都唔錯丫, 妳有無認真考慮過佢嘅呢?」 「得嘞, 得嘞, 怕左妳嘞, 掉房就掉房啦, 我都係啱啱識左佢無耐, 佢份人真正係點我都未知道, 唉, 總知今晚妳地響房入面玩得開心的啦!」 呀儀聽到我咁講, 開心到即時跳番落水再攬實呀志。
[ 本帖最後由 mandy2013 於 2013-11-25 09:39 AM 編輯 ]