第十章
車上, 芷姍成晚都無同子健傾過一句偈, 子健行左一半路, 就將架車停左響路邊之中, 「芷姍, 我唔係怪妳同果個油瓶女一齊, 不過, 當有心人遇著無心人嘅時候, 我驚到時妳知道比人利用完之後, 果陣妳至後悔就太遲嘞!」
芷姍終於開口講野, 「咩你覺得巧兒同佢呀媽都係一樣嘅咩?」「唔係覺得, 係絕對一樣, 芷姍, 聽我講啦, 佢分分鐘私底下成日同一大班朋友每日都係開會咁開, 總之就係無時無刻都係諗緊點去呃人地嘅錢….」
「得嘞, 麻煩你而家可以開車送我番屋企, 如果唔係, 我就自己而家落車去搭的士就得架嘞….」
「芷姍, 妳聽我講啦, 呢的人我真係見過唔少, 以為講的好慘嘅身世比妳聽, 等妳…….」 芷姍真係落車走去車尾後面截的士, 芷姍真係上左的士, 子健見到咁, 亦唯有無奈咁開住車番屋企。
子健正想攞個電話出黎, 咦, 無嘅, 唉, 緊係頭先響果間餐廳度留左定嘞, 子健即時將架車掉頭, 都成十一點幾, 唔知間餐廳關左門未添架? 睇黎都係要快的先嘞, 房車正全速番住回頭路方向。
差唔就到嘅時候, 突然, 一隻流浪狗響路邊衝住出黎馬路中心, 子健即時扭軚閃避, 哇, 房車正高速咁剷左上路中心嘅石壆之後, 繼而再飛起咁凌空翻轉, 再跟住四輪朝天咁猛烈撞番落地, 呯嘭, 汽車所有玻璃盡碎, 雜物亦飛跌到四散一地。
車廂之內, 安全氣袋正將子健迫住響司機位上, 子健額頭正滴住血咁倒轉響車廂內掙扎住, 隻腳好似卡住左咁, 路邊嘅途人正要上前準備幫忙嘅時候, 突然, 「車頭著左火呀, 嘩, 後面個油箱又漏緊油呀, 快的走開呀, 架車隨時都會爆炸架!」
原本打算上前營救正被困響車廂內嘅子健的人, 一見到架車漏緊油同著左火後, 即時全部火速地向後撤退, 「有無人報左警呀, 死嘞, 個司機呢次實死緊嘞!」
突然, 有個女仔響人群之中好快咁衝到過去子健架車度, 跟住見佢係咁拉開度車門, 旁邊的人群正在大嗌, 「快的走開呀, 架車漏緊油, 就黎爆炸架!」
車門已經壓到曲哂, 點開都開唔到, 「快的比隻手我, 等我拉你出黎!」 「油…瓶…女…」
原來衝埋去救緊子健果個就係巧兒, 原本巧兒響餐廳內走左之後, 正響附近公園度一個人呆坐住, 當佢正想開始行番屋企嘅時候, 就見到子健架車正發生住交通意外。
「我…隻…腳…卡住左, 架車著緊火, 妳快的走開啦…..」 巧兒聽到咁, 即時走去另一邊車窗度捐左入去車廂之內, 巧兒正幫子健掹緊正卡住嘅腳, 掹到嘞, 火嘅熱力已經充斥住車廂入面, 地下油蹟亦逐漸向住車頭方向流去。
巧兒好快咁再走番出車廂, 跟住再去番另一邊開始拉緊子健出黎, 子健已經開始比巧兒拉住咁爬緊出黎, 「快的, 唔想死嘅你就快的爬番出黎…..」
子健差唔多爬到出黎, 汽油已經流到車頭著火之處, 「得嘞, 巧兒, 我地快的走…..」
走左幾步, 身後嘅車突然發生住猛烈嘅大爆炸, 子健即時攬實身前嘅巧兒, 但兩個人正同時都比身後爆炸嘅氣流轟到飛彈到前面之處撞左落地, 「啊吓….…..」
兩個人都已經瞓左響馬路之上, 子健摸住個頭, 正響地上一面痛苦咁, 而身邊嘅巧兒就正郁都唔郁咁趴左響地上瞓住, 「巧…兒…巧…兒….…..」 子健響呢個時候亦都經已昏迷過去。
(待續)